ذكريات في تسجيلات الشجره

اسمحو لي اعضاء المنتدي ان اسرد لكم هذا الموقف الذي حدث بحضوري في فترة التسجيلات عندما كان فريق الشجره في الدرجه الثالثه . في هذا الموسم كان فريق الشجره في احسن حالاته حيث صعد في هذا الموسم الي الدرجه الثانيه كاول مره في تاريخ النادي . في ذلك الوقت كان الاخ ادريس(شجرابي الشهر ) كان قد فق قيده من نادي الشجره وكانت هناك عدد كبير من الانديه تتسابق لنيل توقيعه (الشجره- الحمادب- اللاماب- الزومه - الخرطوم 3) وكان افضل العروض الماديه من نادي اللاماب قدم لي الاخ ادريس في حي دلس وقال لي يا بكري والله ناس اللاماب ديل قاعدين في شارع البيت ومستنينيني ودفعو ليكدا وناس الزومه كرهوني الجامعه ناس الشجره قالو لي انت ود النادي لازم تمضي لينا وتعيد تسجيلك لانو اسرتك كلها لعبو في نادي الشجره انا متحير ياخي . ولم يتم ادريس حديثه حتي طرق باب المنزل ودخل علينا الكوتش ود القوي ومعه المدرب عبد المجيد جعفر . فقال له ود القوي يا ادريس انحنا عارفين انو ناس اللاماب دفعو ليك كتير . لكن هل سألت نفسك انت كيف حتلعب ضد نادي الشجره . فسرح ادريس سرحه طويله فقال له والله ماحأقدر العب لكن ناس الخرطوم 3 في الممتاز وعيزني برضو. فقال له ود القوي الشجره برضو عايزاك عشان تصعدا للتانيه . والله والله نزلت دمعة ادريس . فقال خلاص انا موافق فمضي ادريس في نادي الشجره وشاءت الصدف ان تكون مباراة الصعود للتانيه ضد فريق اللاماب . تعامل لاعبي اللاماب مع ادريس بخشونه . انا كنت في الاستاد بقرب عمنا المرحوم عباس ويو . علي فكره عمنا المرحوم عباس ويو كان يلقب ادريس باسم (بيجو) كان ادريس نجم في تلك المباراة وصعدت الشجره الي الدرجه التانيه . لك التحيه يا بيجو لما قدمته لنادي الشجره

وكم حزنت كثيرا لسماع خبر تركك لكرة القدم . والله يا اخوانا ادريس دا لو كان واصل روبرتو كارلوس

الأخ بكري محمد الحسن أيها الرائع سلام شكراً جزيلاً على هذه المعلومات القيمة والتي تثبت وفاء الأخ بيجو أقصد إدريس وأهو يا درسو كل بنكتشف فيك حاجات رائعة فهنيئاً للشجرة بالأوفياء مثلك وبالله يا إدريس طالبين منك خدمة وهي إيراد جدول مباريات الشجرة والنتائج أول بأول وبعدين الحاصل شنو على الفريق ؟ استبشرنا وقلنا يكون لينا اسم في الممتاز نجي نلقي النتائج مخيبة للآمال للدرجة دى؟ المطلوب من كل أسرة الشجرة وأبنائها بالداخل والخارج التكاتف ليتخطى الفريق عنق الزجاجة وبالله أخبار الشاب الطيب الماحي الفلتة المظلوم شنو مع الموردة؟ياخي لو ما عايزين يلعبوه يرجعوه لينا لأنو فعلاً أمتعنا في سنتر ليق الصعود

والله يا بكوري لقيت ذاكرتك قويه جدا دا موقف ليهو فتره طويله جدا . بس تعرف الواحد بعد ما اتخذ قرار التسجيل ماندم
ولك الف تحيه وان شاء الله الواحد يحاول يرجع للكوره لانو عايزين نعمل لينا فريق كرة للمنتدي ان شاء الله وانت حتكون المدير الفني ان شاء الله . ولك الف تحيه واشواقي

الاخ العزيز / بكري ,,,,, اسعد الله اوقاتك بكل خير

نشكرك على هذه المعلومة القيمة التى تكشف لنا المعدن الاصيل لهذا الانسان الرائع ادريس الذى ضحى بالمال والشهرة من اجل الشجرة والدمعه التى سالت من عيون هذا الساحر الاسمر الجميل هى بكل تاكيد تعبر بصدق عما يكنه من حب وشوق واحتراق لهذه المدينة الجميلة باهلها وهذا العرفان سوف يظل تاج على راس هذه العائلة الكريمة التى انجبت من قبل العملاق بشير الذى يعد من ضمن كوكبة فريق الشجرة فى ذلك العهد الجميل فهنئا لك اخي ادريس , لقد قلت لك من قبل ان اجماع الاخوه الاعضاء فى المنتدي بحبهم واعجابهم بك لم ياتى من فراغ بل لشئ خصك به الله سبحانه وتعالى ومن احبه الله حبب فيه خلقه , شكرا مرة اخرى العزيز / بكو ,,,, ونعيد طلب الاخ عثمان ميرغني بان يوافينا الاخ ادريس بنتائج فريق الشجرة اول باول حتى لو كانت غير مرضية حتى نتخطي عنق الزجاجة باذن الله

والله يا ادريس بعد موقفك ده ............رفعت الاقلام وجفت الصحف.

ياموقف جد هزانى

من رجل الكورة الاسمر

البطل الاسمه بيرفرف

فيه حاشى المال ما أثر

يالعالية مكانتك وقيمتك

بيك اصلو الشجرة بتعمر

المع واطلع بالكورة

خليها جيوشك تدحر

خلينا وراك بالكلمة

وخليك القائد الاكبر

الاخوان بالقسم الرياضى. السلام امانة ارجو تبليغ سلامى الحار للاخ الزميل عبد القوى وقد سبق ان قمت بارسال رسالة له عبر المنتدى.

عثمان ميرغني عثمان كتب:: الأخ بكري محمد الحسن أيها الرائع سلام شكراً جزيلاً على هذه المعلومات القيمة والتي تثبت وفاء الأخ بيجو أقصد إدريس وأهو يا درسو كل بنكتشف فيك حاجات رائعة فهنيئاً للشجرة بالأوفياء مثلك وبالله يا إدريس طالبين منك خدمة وهي إيراد جدول مباريات الشجرة والنتائج أول بأول وبعدين الحاصل شنو على الفريق ؟ استبشرنا وقلنا يكون لينا اسم في الممتاز نجي نلقي النتائج مخيبة للآمال للدرجة دى؟ المطلوب من كل أسرة الشجرة وأبنائها بالداخل والخارج التكاتف ليتخطى الفريق عنق الزجاجة وبالله أخبار الشاب الطيب الماحي الفلتة المظلوم شنو مع الموردة؟ياخي لو ما عايزين يلعبوه يرجعوه لينا لأنو فعلاً أمتعنا في سنتر ليق الصعود

نقل مدرب الموردة برهان تيه البشرى للمورداب باقتراب موعد عودة مهاجم الفريق الطيب الماحي الى الميدان خلال الايام القادمة.
ويذكر ان نجم الفريق القادم من فريق الشجرة قد تعرض للاصابة خلال مباراة الموردة امام الخرطوم في الاسبوع الثاني للممتاز.

وقد تم عرض اللاعب الى ثلاثة اخصائيين هم د. وائل.. د. زهير.. د. ريتشارد وبعد الاتصالات بدكتور جار النبي اجمعوا على ان يمنح اللاعب الراحة الكاملة بجانب العلاجات والجلسات مع دكتور العلاج الطبيعي للنادي سمير الوسيلة والذي اخضعه لعدة جلسات بجانب العلاجات المقررة.
ومن المنتظر ان يختتم اللاعب جلساته المقررة مع دكتور سمير ليبدأ برنامج التأهيل التدريبي من اجل العودة ويذكر ان دائرة الكرة بقيادة الرائد امين التجاني قد منحت اللاعب الطيب الماحي راحة مفتوحة الى ان يكمل العلاج بدون تقطع مهما كانت المسببات رغم حاجة الفريق الماسة له الا ان الجميع متفقون على سلامته في المقام الاول والاخير.

كُررررررررررررر علي بريييييييييييييييييية ويقوم بالسلامة.

والله يالثعلب احسن تعملوا ليهو التخريجة بتاعتى عشان يقوم

لانه المعروف اى زول جاى من الشجرة معرض للعين. قل هو الله احد من عين كل حَدْ.

» بشره ساره اناره المساجد في الشجره سوف يقوم بها اثنين من ابناء الشجره الخيرين
» تسجيلات الشجرة
» ذكريات الشجرة
» ذكريات الزمن الجميل !!!
» حبيبتي الشجره