الحنك الاصيل دروس وعبر

متعة الكلام بتاعنا , وطلاوة ملامسة الحروف , وخروجها العفوي وهي تنضح
بجمال ريحة دعاش الحِله واللمة وقعدة العواميد وضل الحيط ورواكيب الدكاكين
والبحر المغربية :

ومن الايام الخوالي سنقدم لكم وعلى مدي ايام ليست بقصيرة بعض النصائح
القديمة الجديدة وقت الحنك كان موزون مش زي الايام دي , وقت البنات كانن
بيتخدرن من نص حنك وكمان ماااااااااااا على قد كده وعشان الممارسات دي بقت
تقلل من احترام تقنية الحنك وهيبة الحناكين , ارتأينا " قوية ارتأينا دي " ان نعيد
صياغة ممارسات الحنك القديم المتجدد مع سطوة واحتكارية الشبكة العنكبوتية للافكار
العاطفية و تهميش دور الحنك في لغة التخاطب :

نقدم نصائح شبكة عنكبوتية ( Manual book ) برغم كل شيئ نقدم لك ...

- اي قرنبيت تلقيه فاتح نص القميص وراخي اللياقة
وكافي نص القميص اعملي شتات .

دا ... برلوم جديد دخل قبول " مقبول" ومن مدمني البوش ايام المدرسة
وابوه الصباح بيديهو مصروفو شلوت من ندم ولاتو ..

- اي صيصة يكون قاصي شعرو بالجنبات وراخي القُصه ومطول ضفر
صباع ايدو الشمال الصغير وشايل ميدالية كبيرة في طرفة مفتاح
عربية , عايني ليهو من تحت لفوق واتمختي وامشي بقدامو .

دا... ما من الجامعة وصحبو مرتاح وهو بتاع جيب وودي حتى الضفر
بتا الولد المريش .

- الدروس دي الزامي للجكس والما بتحفظ راح ننقص ليها اعمال السنة
في مادة الشمشرة والحنك الاصيل ..

(ما ناقص نلقي لينا واحدة مكتحة وقاعدة جنب سلا " دي ايام سلا " يوم الاتنين
وبتبكي بالدمعتين , وتفتح لينا اذاعة قال لي ووعدني وحلف لي وقام جاري .

او وحدة ناسيه محطته ولابده في الحافلة اخر كرسي
وكل ما الكمساري يقول ليها نازله وين يا اخت تقول ليهو
لا والله انا فطرته .
ولا وحدة واقفة فوق الكبري عشان واحد حنكه وفكاها فيها
وشتت وكل ما الناس يقول ليها يا بت استغفري ربك تقول الا يرجعو الدينارتاني !!!

- الدرس ده مهم جداً جداً مهم لدرجة ما عادية
كدي عليك الله اتخيلي كده وانت قاعدة في امان الله
ماسكة ليك سندوتش وفجاة وبدون اي مقدمات يجي واحد
قرنبيت ويقول ليك يا عسل يتعملي في شنو ؟ دي اسمها
الاسئلة الخداعة يدخل ليك عن طريق السندوتش وهو عينو
على البارد شباب دنئ .

- وخلي بالك من الشباب المستغل
يعني وانت قاعدة في امان الله يجيك واحد طيطه
ويفعد جنبك ويقول ليك يااااااه دي اجمل عيون
صادفتني في الدنيا ده شنو صوفيا نورين ويقدم
ليك وردة جميلة ويقول ليك شايفة الوردة دي

- اوعك ثم اوعك تقول ليهو شايفاها لان الخطة هنا
لانو لو قلتي ليهو شايفاها راح يرجع الوردة ورا شوية
ويقول ليك وكده برضو شايفاها الطيطه دكتور عيون جديد
وعاوز يجرب فيك فحص مجاني .

- في نوع بستغل لحظة تعب الضهورية ويجيك خاشي
بحنان منقوع في كورية مروءة ويقول ليك ياااه
باين عليك تعبانة ما فطرتي اعملي حسابك , ثم اعملي
حسابك ده النوع العاوز يجكس بسندوتش ويواعد بكباية ليمون .

- مرات الحنك بيكون اقرب مما تتصوري يعني
مره بتكون فيها نسبة الهرمونات عندك عالية جدا
فيتخيل ليك انو في واحد بيحنك فيك طبعاً دي بتكون
اخطر انواع الحنوكات لانك ممكن تقنعي نفسك بنفسك
انو الحنك ماشي ومقسِم فيك وفجاة تصحي بعد انخفاض
مستوى الهرمونات وتلقي نفسك ضحيتي باغلي حاجة عندك
وهي قروش الرجعة ابو الشباب انتهز الفرصة وما قال لا للهدية
القيمة .

- الليلة الدرس عن كيف تقدري تواجهي حنكين في وقت واحد
مرات الشباب بتفقو مع بعض عشان يفكو حنك مقرمش وهش
يعني واحد واحد يجيك ويطلب منك مذكرة على اساس انو نسي
بتاعتو في البيت وطوالي يجي واحد ناطي عامل نفسو سمع بالصدفة
ويدي الحناك قروش عشان يشتري مذكرة وبكره يجيبه ليهو وهنا
تبهلرك الحركة وتخشي في الحناك التاني شمال وتنسي نفسك

احذرك ثم احذرك وخلي بالك لو سمعتي ولو من بعيد اتنين بيقولو
" قرمشة

" قومي جاااارية طواااالي .

ونواصل ...

ياسيف رجعتنا سنين لي وراء
زكرتني ايام ناس الجاحظ واحمد مظهر
بالله عليه لو عندك مسنجر او اي وسيله اتصال
رسلها ليك لانه مشتاق لي ونسه سنين معاك
اخي تحياتي لك ولاسرتك الكريمه

فخري ليك وحشة يا حبيب , معليش انا ظروف عملي شوية صعبة
مع نظامنا الصحراوي ومتابعة خطوط ابا

ر النفط , ان شالله اتواصل
معاك قريبا ....

ربنا يوفقك ياسيف سال عن اخباركم امس كنت اتحدث مع فخري صباحي
في الاسكايبي وقال لي اخبارك ارمكو للبترول وعزام ومسئوليات الكبيره والشيخ عوض ماشاء الله
ودقش شغال في الشويحه وانت كلكم شغالين هناك في ارمكو حبيبنا ربنا يوفقكم ويبارك خطاكم
وانشاالله بنتصل تحياتي واشواقي لشخصكم الكريم ولاسركم وسلامي لي عزام وعوض ودقش وصلاح الصادق

فخري

وصل سلامك للجميع و هم بدورهم يفتقدون جمال حضورك الذي لا يمحي من
الذاكرة , خاصة الاخ / صلاح الصادق ( راس ) الذي يبلغك احر التحايا
والاشواق

بالمنسبة اسم الشركة ( شركة ابوظبي الوطنية

للبترول - ادنوك ) ارامكو دي في السعودية.

الله يسلمكم من كل شر تسلم حبيبنا سيف ما بتقصر من يومك
وانت حاضر ربنا يوفقكم ويحفظكم ويجمعنا في ساعه خير
انشاالله

سيف الاستاذ كتب:: وقعدة العواميد وضل الحيط

...
أخونا سيف الأستاذ
قعدة العواميد دي طوالي الذاكرة ودتني
لي العمود جنب بيت عمنا عمر الفاروق
وعمر أخوي والتيمان أشرف وأمجد عمر الفاروق
وميسرة وأمير محمد صالح والطيب الدالي(كرور)
ومرات علي أخوي كانت شلة مشهورة بالعمود داك تحديداً

وإتذكرت كمان كل وقت وجبة الحاجة الله يديها العافية
تقولي أمش نادي أخوانك من العمود وأجي شايفا شينة
أقول ياعمر الغداء وكدة أقول ليهو المكوة سخنت ولا
في زول دايرك في البيت وبقت معروووفة لمن
يشوفوني يقولو لي عمر الغداء جاء
ههههههههههههههههههههه
والله كانت أيام جميلة
يديك العافية يا سيف
...

» حــــار خـــلاص بـــعد المـســـــــــــافـــــة
» دروس في الحب‏
» دروس في الحب
» 6 دروس في 6 دقائق