الى حبيبى وائل فى اول عيد بعد رحيلة

الى روح الغالى ...الى شجرة الدر ....اليك يامن الجمت قلمى طيلة هذة الفترة وجعلته يرفض حقيقة رحيلك .

العيد وصل
والغصة تطعن فى الحلوق
زولاً سمح غادر رحل
والآهة تسكن فى العروق
تكسر ضلام حِجْر المقل
واتبدد الفجر الزمان
ضويتو يانجمة زحل

********
العيد وصل
والكل ضهب ضاع الطريق
العيد وصل
يانجدة الزول الغريق
نور الاهل
الليلة فيك كتل الصديق
مكتول على درب الامل
والعبرة ماباليها رييق

ياحبنا
يارونق البيت العتيق
ياريتو نورك لينا عاد
لو لحظة يبرق فى الغيوم
نرجاك فى حلو الميعاد
لو تستريح الآهة يوم
والنظرة فيك تبقالنا زاد

*********
ياحبنا
يادفقة زى نيل ارضنا
يااااااااا....سر ...رحل
خلى الوجوم خيم هنا
ياعزنا
ياحبنا
ياكلنا
يااا,,,بس انا

*****
العيد رحل
لملم خطاك من جنبنا
ياحبنا
ياجزء ضاع من كبدنا
هانى وسعيد
اعلى الجنان ياربنا
عارفنى كيف قلمى الجريح
ماقال حروفه ودونة
صدقنى قاسية الكلمة فيك
ولا حتى بقدر اوزنا
حاولت اهرب من عينيك
واهمس كتير انك هنا
ياحبى بشتاق ليك كتير
ياريت تعود وانت المنى
ياحبنا
وياكلنا
ويا....بس انا

الرئعة الاستاذة نعمات كلام يعجز اللسان عن التعليق عنه
ربنا يصبرك علي رحيل وائل ده حال الدنيا Sad

صااااحبة الأنامل الذهبية (نعمات محمد صالح) ... أولاً ربنا يلهمك الصبر ... وثانياً كما عودتينا داااااااااائماً فالإبدااااااااع الحقيقي في كل المناسبات داائماً ما يكون ما بين حرووووفك الرااااااائعه ... فلك قدرة على التعبير الراااائع والبديع ... تتكلم عنهاااا تلك الصور الجمالية ... التي أتقنتهاااا حروووووفك ... فدااائماً ما تكون الأحزاااااااان سبب للإبداااااااع الحقيقي ... فلك مني كل الود والمحبة ... ودي ومحبتي

ربنا يصبركم ويجعل الجنة مثواه وان شاء الله شفيع ليكم يوم القيامة ..تحياتى أستاذة نعمات .