محفورة فى الجدان **** يوم فى يوم غريب ممطر

كما ذكرنا سابقا الشباب ضربوا المنقة يوم الكتاحة وكما هو معروف بعد اي كتاحة فى السودان بتصب مطرة ثقيلة .... والوضع فى حلتنا بختلف البيوت كلها كاكي لذلك لم تصب المطرة الناس كلها بتكون اساند باي اي زول محضر الطورية والكوريك *** الناس فى ترقب بعد اي زول فتح السباليق والخيران بتاعت البيوت النور قطع كالعادة البحث عن الفانوس امشى ناس حسن حربي جيب ليك شوية جاز ** المطرة صابة جازف امشي نص الشارع لانه ممكن اي حيطة تقع ** وقفت المطرة المرحوم عثمان الارباب ولع الرتاين وخرج ليتفقد الجيران فى الحلة وشرع الشباب فى مساعدة اي بيت حصل فيه اي شرخ
صبحت الواطة توجهوا البنين والبنات جابوا الرملة فرشوها غطت الطين *** الحطب لين للعواسة شوفوا حطب ناشف ناس محمد الحسن الغنالي عندهم شوية ** طيبة بيت الريد عملت الزلابية ** الجقر طالع بدري بصوت جهور ** الفطور طالع لكن هناك مشكلة فى عمود ناس بدوي لانه حديد الغنم مشوا اتحكوا بعد المطرة فيه ماس ارضى الغنماية لصقت فى العمود جابوا عصاية وبعد عناء شديد اتفكت غنماية ناس محمد على من العمود ** علق عبد الحفيظ نصر بانها دنقلاوية بترطن بس ** اتجمعوا الناس فى ضل ناس خضر الريح وفطروا وشربوا واتهنوا .
الحيطة الوقعت جاء عبد القادر واحمد طوبة وسيد بقيادة الملاحظ المرحوم عبد اللطيف ازرق قاموا بالواجب بلوا الطين واتخت الطوف الاول
رجعت الحلة زاهية كما كانت بفضل اهلها والتعامل مع بعض وكانه لم يكن هناك حالة طوارىء وحتي اذا اصابت اي اسرة ضرر خفيفا بفضل تعاون الناس مع بعضها
كان تكافل اجتماعي رهيب *** محبة زائدة *** لهي اجمل واحلي ايام خالدة فى الوجدان
منعم سعيد

رهيب يامنعم سرد جميل لناس اجمل تسلموانت تذكر العقد الفريد لكبارنا وهم الذين وضعوا البنيه التحتيه لنا لكي نسير علي دربهم بالمحبه والاخاء والتكافل الاجتماعي ونقاء الروح من العدايات وحب النفس لك مني الف تحيه ولكبارنا الاحياء مزيد من الصحه والعافيه وللاموات الرحمه والمغفره شكر منعم مره اخره وانت تعطر ورحنا بالذكريات الجميله