الريد إختياري

بسم الله الرحمن الرحيم

قصيده بعنوان : الريد إختياري
شعر :إبراهيم العمده

أهدي لكم هذه القصيده المتواضعه و اقول أني لست بشاعر ولكنها معاناه حقيقيه في الإختيار بيني وبين أهلي أختار فلا يقبلون ويختاروا فلا يعجبني إختيارهم وأشياء أخري كثيره لانملك إلا أن نقول لا حول ولا قوة إلا بالله العلي العظيم .........

لو طفتوا الكون وإخترتوا زوله مكمله
لو حتي كان نزلتوا نجمه زاهيه مجمله
لو جات من السماء الحوريه ذاتا منزله
قلبي لا يمكن يبدل لي ريد حبيبه مؤصله
************

************
عن ست البنات ست الحسان ست الحلا
أحكي ليكم قصه وأجمل روايه مفصلا
هي الرزينه الطول حياتي قلبي كان بتخيلا
شفتها ألف مره وكانت معاي قبال عيوني تحصلا
************

************
يوم لقيتا كانت دنيتي ضلمه مليله
شفتها نور وكان نورا شمعه مشعلله
من يوما داك هويتا وصرت بيها موله
وياربي تحفظا لي تصونا من الألم والعله
************

************
زينة الفريق زينة بنات الحله
كان جات في الطريق أو حتي طلت طله
تنقذ زول غريق من الغرق والبله
بي صوتا الرقيق تمد إيدا وتقول بسم الله
************

************
عيونا عيون الريل وكتين تجيك مندله
خدودا دهب عديل لامن تشوفا قبله
رموشا رموش حرير تحلف تقول دي مظله
ويا سلام لو شفتوا إيدا أجمل حاجه ناقصه الدبله
************

************
ست بنات حواء لو مره جات مترجلا
تلقاها قادله علي الأرض ترفع خطاها تبدلا
إن مالت يمين معاها الدنيا تميلا
وإن مالت شمال حتي الغزاله تغازلا
************

************
إن شافا بشر يتمني لو يقدر يشوفا يومي يقابلا
وإن شافا ملاك من السماء لازم يجيها يواصلا
وإن شافا شجر بي كل فروعوا يحتويها يضللا
وإن شافا حجر يتمني ينطق ليها ريدتو يوصلا
************

************
إنتي نخله أعلي من كل الملأ
وإنتي نسمه لطيفه ماره علي الفلا
وإنتي بسمه جميله ماليه الكون حلا
وإنتي ورده عبير رحيقا مجملا
************

************
عشان خاطرك أمد إيدي وأتضرع صلاه
عشان ريدك أخلي ليلي وصباحي مواصله
عشان قلبك ونور عينك تقوي بيناتنا الصله
عشان شأنك عشانك إنتي مستحيل يوم أفصلا
************

************
أتحدي بيك الدنيا يا ست الجمال ست العلا
أتحدي بيك ناس الحاره والناس البقولوا أهلا
أتحدي بيك نفسي ذاتا وروحي ليك أدللا
أتحدي نفسك ذاتا وأوعدك كل الصعاب حأذللا
************

************

أتمني أن تنال أعجابكم كما أنتظر نقدكم

وشكرا ً

حلوة القصيدة يا ابراهيم يديك العافية .

أهدي لكم هذه القصيده المتواضعه و اقول أني لست بشاعر ولكنها معاناه حقيقيه في الإختيار بيني وبين أهلي أختار فلا يقبلون ويختاروا فلا يعجبني إختيارهم وأشياء أخري كثيره لانملك إلا أن نقول لا حول ولا قوة إلا بالله العلي العظيم .........

لك التحية اخي ابراهيم حقيقة قصيدة قمة في المعاناة وانت بين نارين اهلك واختيارك ووصفك لها يدل علي مدي تمسسك بها وعدم الرغبة في اختيار غيرها مهما تكون ولكن اهلك لهم رأي آخر ربنا يعينك وحقيقة قصيدة معبرة ونالت اعجابي والله يكون في عونك

قصيده رائعه جدا ومزيد من الابداع

تسلم ابراهيم علي القصيده

قصيده جميله بس لو شافا ملاك ما اظن بنزل عشان يوصلا يا ابراهيم

مجدى ابوعبدة كتب:: حلوة القصيدة يا ابراهيم يديك العافية .

ويديك ياها وزيادة يا أبو المجد تسلم

عادل طه محمد طه كتب:: لك التحية اخي ابراهيم حقيقة قصيدة قمة في المعاناة وانت بين نارين اهلك واختيارك ووصفك لها يدل علي مدي تمسسك بها وعدم الرغبة في اختيار غيرها مهما تكون ولكن اهلك لهم رأي آخر ربنا يعينك وحقيقة قصيدة معبرة ونالت اعجابي والله يكون في عونك

أخونا العزيز عادل بالظبط حالي كما أوجزت
ولك الشكر أجزلة وكان الله في عون الجميع

ام محمد معتز كتب:: قصيده رائعه جدا ومزيد من الابداع

أم محمد شُكراً جميلاً للعبور من هنا وبكم يكون الإبداع ويزيد

dorzy كتب:: تسلم ابراهيم علي القصيده

الدرزي الجميل الله يسلمك وشكراً يا منقة

عثمان بشير كتب:: قصيده جميله بس لو شافا ملاك ما اظن بنزل عشان يوصلا يا ابراهيم

عثمان بشير شكراً علي الإحساس بالجمال
وأكيد لو شافا ملاك ما ح يهبب ليها زاتو
ولكنها أحساس مني بالمبالغة في الوصف
ونسأل الله يغفر لينا زلاتنا وخطايانا
وُدي

كلامك جميل ونابع من القلب عشان كدا ما تيأس اكيد اهلك حيحسو بيك
وربنا يسهل ليك ويحنن قلبهم عليك

غاده كتب:: كلامك جميل ونابع من القلب عشان كدا ما تيأس اكيد اهلك حيحسو بيك
وربنا يسهل ليك ويحنن قلبهم عليك

أختنا غادة جزيل شكري أسوقو ليك وشهادتك أفرحتني
ولا حياة مع اليأس ولو كنت بييأس لحردت العرس ذاتو

ولكني فوضت أمري كله لله عز وجل وأستخرت كثيراً وتوكلت عليه
فكان حسبي وقد أتمم لي الزواج بالخير وبرضاء الوالدين

وكان وقت كتابة هذه المحاولة ووقت معاناتي قبل عامين
من الآن وأنا والحمد لله الآن أبو محمد وهو اليوم أتم
سبعة شهور بالتمام والكمال والحمد لله كثيراً

ابراهيم العمده كتب:

غاده كتب:: كلامك جميل ونابع من القلب عشان كدا ما تيأس اكيد اهلك حيحسو بيك
وربنا يسهل ليك ويحنن قلبهم عليك

أختنا غادة جزيل شكري أسوقو ليك وشهادتك أفرحتني
ولا حياة مع اليأس ولو كنت بييأس لحردت العرس ذاتو

ولكني فوضت أمري كله لله عز وجل وأستخرت كثيراً وتوكلت عليه
فكان حسبي وقد أتمم لي الزواج بالخير وبرضاء الوالدين

وكان وقت كتابة هذه المحاولة ووقت معاناتي قبل عامين
من الآن وأنا والحمد لله الآن أبو محمد وهو اليوم أتم
سبعة شهور بالتمام والكمال والحمد لله كثيراً

الحمد لله علي التوفيق ورضا الوالدين

وربنا يسعدك مع ام محمد وان شاء الله نتلاقي في ساعه خير

غاده كتب:: الحمد لله علي التوفيق ورضا الوالدين
وربنا يسعدك مع ام محمد وان شاء الله نتلاقي في ساعه خير

الحمد لله علي كل حال
وآمييييييييييين يارب العالمين
ونتلاقي طيبين إنشاء الله

والله نشكرك علي الابداع دة

ام وئام كتب:: والله نشكرك علي الابداع دة

أم وئام أنا من أشكركم علي مروركم الجميل
ومساندتكم لي ودعمي معنوياً

وبالجنبة وئام بقت كيف إنشاء الله شديدة

ابراهيم العمده كتب:

ام وئام كتب:: والله نشكرك علي الابداع دة

أم وئام أنا من أشكركم علي مروركم الجميل
ومساندتكم لي ودعمي معنوياً

وبالجنبة وئام بقت كيف إنشاء الله شديدة

تسلم يارب الحمد لله وئام بلغت الصحة ومشت المدرسة يسال منك الخير
ونحن بنستمتع جدا بابداعاتك