المفتش كونان يلقي القبض علي حبوبة..

حجيتك ما بجيتك ..خيرا جانا اكل عشانا و فات خلانا ..كانت في بت سمحه خلاس اسمها فاطنة السمحة ..كانت و هم يتمايلونفاطنة اجمل البنات عشان كده سموها فاطنة السمحة ..كانت سمحة هيئة و سمحة طبع و اخلاق فاحبها الناس كل الناس ..واكان في حلتهم غابة يسكنها غول ينوم سنة و يحس سنة ولمان ينوم يتوسد شعر مرتو عشان ما تشرد منو..كان يختف اجمل بت في الحلة و يعرسها و بعد عشرين سنة يكتلها و يختف بنية تاني و يعرسها ..وكانت كل الحلة تعلم انو السنة ديك كانت سنة الختف ..وكلهم عارفين الدور علي فاطنة…
وفجأة تتعالي الموسيقي
المفتش كونان ترمرم ترم
دفق اللبن ترم رم ترم
ويقبض المفتش كونان علي حبوبة قبل ما تتم الحجوة ويضعها في قائمة النسيان..ويبحلق الصغار في ذلك المفتش الصغير
المفتش كونان كشح اللبن..
في ليلة صيفية جلست سمورة الامورة جنب حبوبه و قالت ليها
- حجينا يا حبوبة
فقالت حبوبة في ليلة ضلامها تخين ، تتكئ عليهو ، كسر البحر اقوي من التساب الاولاني
- يعني شنو تساب يا حبوبة
- البحر لمان يفيض من قيفتو و يطلع العالي و يكسر البيوت بسموه تساب
- وخسرتو ناس يا حبوبة في الحادثة دي
- قلتي شنو
- قلت ليك يعني في ناس من اهلنا ماتو
- لع ما مات زول الحمد لي الله ، لكن فقدنا بيوتنا و فقدنا حاجاتنا
ومن الغرفة المجاورة كان صوت التلفاز يصل بوضوح
-ايتها الحمقاء انك تهدرين وقتك سدا
-لا لا انا اعرف ماذا اصنع يا قصيرة الانف
فتركت سمورة حبوبة قبل ان تكمل قصة التساب الاولاني و اسرعت الي قصص سالي ،و القناص ،واكيرا،وسلاحف النينجا وتركت حبوبة في دروب ريمي وهي تتوسد مغيب شمس ذلك المساء و هي تتحسر علي ايام الاحاجي و لمة الاولاد حولها وهي تحدثهم عن ود مغيب الشمس..
دعونا (كما يقول افليقا) نناقش ظاهرة انحباس اطفالنا امام شاشات اسبيس تون وهم بعيونهم الصغيرة يتجولون بين توم ان جيري وسندباد ويكون ذلك من الصباح الباكر حتي العشية..







[flash][/flash]

والله يا غاده الظاهره خطيره ولها تاثير بالغ علي الاطفال كما ذكر اهل التخصص