عليا شوقك طال (البوكس) للشيخ البرعي

عليا شوقك طال
والدمع صب هطال
فى الرسل فرعك طال
يا الخير نبينا

يا ناوى حولك حال
والبيك قط ما حال
خلى الغرور ومحال
واخلي البلد فى الحال
كالسادة اهل الحال
معنى جوار الحال
الينقذ الاوحال
يطيب لك الترحال
بزيارتو نعم الحال
فى الرسل فرعك طال
يا الخير نبينا

لاتتبع الآمال
الجاه وحب المال
افنى شبابك
فى صالح الاعمال
انفق لله يؤتيك
يمين وشمال
رحم الضعاف
ايتام والرمال
حج صلى وزكى
مالك بلا اهمال
ويكون صيامك
للرؤيا او اكمال
عدة شعبان
وقول الرسول اجمال
عند الله يا زمال
ما بضيع اجر العمال

نبياً حليم واعقل
باللي قولهو قال
كان حالى اللهجة
صادق الوعد ومقال
فى بيتو يكرم
مسكينو بيت و قال
ويعين الخادم
فى ادارة الاشغال
لى ناقتو يعلف
وبعير وخيل وبغال
للصحابو يمزح
بالحق ليه مقال
الاكحل الامقال
جاب حبو من سنغال

نبى سخى وكريم
ذو جود وذو تكريم
اتى بى احكام
التحليل والتحريم
ممدوح فى تبارك
وفى سورة التحريم
بيت المراحم
كم حل كفو غريم
يكرم طلابو
كم اغنى جودو صليم
يخدم بى زاتو
مع العبيد وحريم
من كونو اصلو كريم
وصيتو ليهو يلم

كان الكريم سهل
قوم يا خليل نرحل
نركب فوق بوكسى
جديد ولا مهلهل
تصميم مكنتو
كطرازنا الاول
قوديال لساتكو
فى الرملة ما بتوحل
اتنين دفنرشى
مثل البرق واعجل
موزون ومجهز
صامولتو ما بتنحل
تنكيه مظبط وملان
من شركة شل
يمشيبو مسافة
فى الحال ولا بيكمل
سواقو قديرا
ومهندسا اكمل
خابر سلوكو
شغل الربط والحل
مابسوق بالطيش
في اللفه يتمهل
عارف الشوارع
لا بقيف ولا بيسأل
وله مساعد
لإدارتو ما بيجهل
لزيوتو مسارع
تشحيمو يستعجل
عند الصلاة
توضى ومعانا صل
يطوى المسافة
كالرمشة ما اتعطل
جبنا المداين
وفيافى الرحل
وقطعنا بى جدة
كل الصعاب تسهل
طوفنا وحججنا
فى طيبة فورا حل
زورنا النبى المرسل
وطوفنابو كل محل

مولى العباد يا حى
صلى لسمح الزى
عدد الخلايق
الميتين والحى
بى عد الرحل
والساكنين الحى
ماصاح مؤذن فى
الخمسة وقال حى
ماسكن ساكن
او ما تحرك شى
ما عبر عالم
فى شرحه وقال اى
ماعلم الله
او قالو توبوا الى
عدد البهائم انسان
ووحوش الصى
عدد الطيور
والزرع ناجض ونى
ماطلعت شمس
فى الكون ومال الفى
عدد الكواكب
دبرت سمت وثري
ما فى البحارو
والجنه ودار الغى
للبرعى امحى السى
لا تغضب ربي على
عليا شوقك طال
والدمع صب هطال
فى الرسل فرعك طال
يا الخير نبينا