جمال الدوبيت وروعة المسدار

السلام عليكم يا ناس منتدى الشعر طبعا انتو ارق ناس لانو في مقولة زمان بتقول الشعر برهف الاحساس لانو الزول البتزوق الشعر بسرح في الخيال كان مع المحبوب وكان مع غيرو وانا راي الشخصي إنو اجمل الشعر هو الشعر الغزل أو بي لغة العولمة والله يكفينا شر العولمة هو الشعر الرومانسي .
لانو اتخيل لي مافي تنفيث للزول البحب وممكون ومضايق غير الشعر لحدي هنا ومافي علاقة بين الكلام البقول فيو وبين العنوان كدي النشوف العنوان
جمال الدوبيت وروعة المسدار

امبارح كان في تلفزيون السودان حلقة طويلة عن الدوبيت وشعر البطانة في برنامج شوارد وكان بدير الحلقة بروفيسر احمد ابراهيم ابو سن ومستضيفين عدد من شعراء الشكرية على رأسهم ود الشوبلي وكانت حلقة جميله جدا جدا فيها دوبيت وفيها كلام عن التراث لدي الشكرية واهل البطانة وكان فيها عرضة الصقرية المشهورة
وانا من هنا بدعوكم للاهتمام بالدوبيت والغوص في اعماق المسادير والنم لانو ده اجمل لون من الوان التراث الشعري في السودان وبالذات حق الشكرية لانو واضح وجميل .
وانا المرة دي بكتفي بالنصيحة لكن في المرة الجاية بجيب ليكم دوبيت جميل في الغزل
وحسي بختم ليكم بي بيت دوبيت واحد قالو الشاعر الشكري حمد ود الحلال
وهو بخاطب محبوبتو عشان كلو واحد ممكن يستفيد منو ويرسلو لي حبيبتو لو عندو حبيبة والماعندو زي انا الله يدي حبيبة
أعضاي إبتلت يا الرايقة بي كسيرك ** سمحة وفاهمة ما اجتمعن قبل لي غيرك
عليكم الله شوفو بلاغة التعبير الشاعر بقول لي حبيبتو اعضائي كلها ربنا ابتلاها واتكسرت فيك لانك سمحة وفاهمة والسماحة والفهم مافي بت قبل كدة لمتن الاتنين وبي راندوق الزمن ده الشاعر بقول لي حبيبتو والله يا الرايقة انا اتكسرت فيك بكل حواسي عيوني وحناني وقلبي وكل حاجة فيني لانك سمحة وفاهمة والسماحة والفهم مافي بت بتقدر عليهم الاتنين غيرك لانو البت السمحة بتكون متكبرة لكن انتي سمحة ومتواضعة
بالله شوفو ده بيت واحد فما بالكم لمن اجيب ليكم قصيدة كاملة من الدوبيت انتو بس ارجوني
أححح يا وحة القلب المعاي قديمة ** أبت لا تنفعك شربة حكيم لا عزيمة

ادريس يا عظيم

بتلقى الحبيبة اتصبر

يديك ربنا

المستورة فيها اتكسر

فتش فى الادب

ما تكوس سماحة المنظر

شا يفاك زول خلوق

فى الدين مكانتك تظهر

امسك سكتك

وبى الكاملة حتماً تظفر

مع احلى الامنيات...................نعومة

[b] ادريس
متعك الله بالصحه والعافية
وصف جميل وبليغ كافي ووافي وموجز وهذا هو السهل الممتنع
نحيك علي هذا النقل الجميل
كما اود ان انقل اليك ان هنالك اهتمام من ادارة المنتدي مشكورة بهذا الضرب من ضرب الفن والابداع وافردت له خيمة مواشاة بروائع القصيد و اول من خط فيها الاخ المبدع ابو العزائم ندعوك لزيارتها واثرائها بما لديك من ذخائر ممتعه
هنالك كتاب جميل اسمه بين الاميرين امرئ القيس والحاردلو يتحدث عن قصة التشابه المذهل بين الشاعرين من تأليف الكتور ابراهيم القرشي
انقل اليك ابيات جميلة للحاردلو من هذا الكتاب :
من غي ام شليخ شوف جسمي كيف منحول
امسيت في لهيب نار الحسار مملول
ليما علي متل قصة وجود الغول
احسن لي النجيع واقعد بعيد مكتول

» سحر الدوبيت
» حدها متين الحرابة
» حتى نفهم الدوبيت في ظل العولمة
» مرحبتين جمال
» من هي ملكة جمال الـــــــكــــــون...؟؟؟؟؟؟