بيان هام شديد

[img] Uploaded with



منقول من صفحة ابناء الشجرة والحماداب

بسم الله الرحمن الرحيم
الاحباب الاعزاء.. بيان هام شديد من الآدمن الجديد
مجموعة ابناء الشجرة والحماداب بالفيس بوك فيها 650 عضو..(ماشاء الله تبارك الله)..لو كل عضو ساهم بي 50 قرش يومياً (500 بالقديم) يعني الزول حايدفع 15 جنية في الشهر ..قمنا لمينا القروش دي لمدة ستة شهور..حاتعمل 58.500 جنية قول تميناها 60.000 جنية يعني معانا 60مليون.. الناس الفي السعودية بقيادة عصام الكنجو وهشام عوض ومحمد لبه قالوا لا نحنا حاندفع بالريال وبدل نص ريال في اليوم حاندفع ريال يعني 15 ريال في الشهر يعني 90 ريال في الستة شهور..قاموا ناس الامارات بقيادة الريس عبد الوهاب وعوض تايوتا وجمال وبقية الرائعيين قالوا نحنا كمان حاندفع بالدرهم وكل يوم درهم..أكيد ناس امريكا حايقولوا نحنا كمان ما اقل منكم وحاندفع بالدولار بس حاندفع ذي ناس السودان نص دولار في اليوم (طبعا نص الدولار بساوي ليهو جنيهين ونص)..اها قاموا ناس فخري وحاكم لموا ناس اوروبا ودفعوهم باليورو وقالوا نحنا بندفع نص يورو في اليوم يعني 15 يورو في الشهر..ناس مصر بقيادة وليد سيد حايساهموا بس بي اتنين جنيه في اليوم(الجنية السوداني اقوي من المصري).. تتذكروا ال60 مليون القبيل ديك؟؟ بتكون مع فروقات اسعار العملات عملت ليها ذي 150 مليون كده..طيب قلنا اي زول ساهم يحلقي ليهو زول صحبو انشاء الله ما من ناس الشجرة يقول ليهو تعال اشترك معاي في عمل خير ويلزمو بدفع نفس المبلغ البدفعوا..بالجنية بالريال بالدرهم بالدولار باليورو بالجنية المصري المهم نفس المساهمة كده حايكون عندنا ذي 300 مليون جنية سوداني..أكيد في ناس حاتساهم بعد الستة شهور من نفسها او من ناس الشجرة الخيرين الكانوا ساكنين في الشجرة ورحلوا منها ..من ده مليون ومن ده 500 ومن ده 300 ..لقينا معانا 350 مليون جنية بعد ستة شهور!!!! قولوا بدينا الشغل ده يوم 1/8 الجاي (بإذن الله) ستة شهور يعني بداية العام القادم انشاء الله بكون معانا 350 مليون جنية سوداني..
نقوم نعمل الحاجات التالية وبدون ترتيب للأهميات:
1- في خور في حي الجامع ليهو ذي 300 سنة كده في نفس شكلو..نقوم نبنيهو من البداية للنهاية قول كلفنا 15 مليون
2- في ذي 8 مدارس في الشجرة والحماداب قول كل مدرسة عملنا ليها صيانة بي 15 مليون دي 120 مليون
3- في كم جامع في الشجرة والحماداب؟؟ قول 7 جوامع كل جامع اديناهو 10 مليون صيانة دي 70 مليون
4- في شوارع في الشجرة والحماداب دايرة ردميات قول مرقنا ليها 15 مليون
5- دفعنا مقدم لشراء ركشات لبعض الاسر وهي تكمل من ايراد الركشة الاقساط قول دفعنا للمشروع ده 40 مليون
6- عملنا مشروع لدعم الرسوم المدرسية والجامعية قول مرقنا ليهو 40 مليون
7- عشان الناس البتحب الكورة نقوم ندي نادي الشجرة ونادي الجماداب كل نادي 10 مليون
8- ساهمنا في اعادة تأهيل المركز الصحي في حدود 20 مليون
9- العشرة مليون الباقية قطعنا بيها تذاكر لناس محتاجة تسافر للعلاج

اتخيلوا الفكرة دي لو نجحت!! نرتاح لينا كم شهر كده ونقوم تاااااني نبداء من جديد ونلم لمدة ستة شهور ونكمل المشوار..
البتعجبوا الفكرة يبداء طوالي يجمع عدد من الناس القريبين منو ويتكفل بجمع نصيبهم اليومي ويكون هو المسئول منهم ..دي نمرتي للتنسيق 0912301405 وده الايميل بتاعي لارسال الكشوفات باسماء الناس الموافقين mohamedalisayed@gmail.com
وتحياتي للجميع

واللة مشتاقين اخي وصديقي العزيز حاكم والله موضوع جميل جدا جدا بس عايزة الناس تبدا وانا حابد اول زول

حمدالله علي السلامه يادرزي مشتاقين حبيبنا ليك وحشه

dorzy كتب:

واللة مشتاقين اخي وصديقي العزيز حاكم والله موضوع جميل جدا جدا بس عايزة الناس تبدا وانا حابد اول زول

الدرزي الف حمدلله على سلامتك ياصديقي والله اشواق اطنان يافردة خليك قريب ورينا اخبارك واولادك انشاء الله طيبين

حاكم الجميل والله مشتاقييين شديد فكره جميله ونحنا بنثني ومستعدين

عثمان بشير كتب:

حاكم الجميل والله مشتاقييين شديد فكره جميله ونحنا بنثني ومستعدين

حبيبنا عثمان بالاكتر كتير يافردة كل سنة وانت طيب تصوم وتفطر على خير

hakim كتب:

عثمان بشير كتب:

حاكم الجميل والله مشتاقييين شديد فكره جميله ونحنا بنثني ومستعدين

حبيبنا عثمان بالاكتر كتير يافردة كل سنة وانت طيب تصوم وتفطر على خير

وانت طيب يا حبوب وانت بخير تسلم ومالك قاطع خبر كده

حاكم ود ناس حاج حاكم بارك الله في مساعيك النبيلة دومأ لجمع الناس من خلف الكواليس وانا عارفة انها لله ماذي حقت الجماعة للسلطة والجاه ارجو من اخواني واخواتي يكونو جادين لاتمام هذا المشروع

بيان هام شديد

هاكذا صدر البيان قبل فترة طويلة من ابن الخال حماده سيد ونزل على صفحة الفيسبوك لابناء الشجرة والحماداب والاخ حاكم مشكور نقل الموضوع على هذا الموقع الفريد لتعم الفائدة ويظل هذا البيان الهام محفوظ على ارشيف هذا الموقع نستطيع ان نرجع اليه كل ما احتجنا اليه . ومن وجهة نظري ان كل ما يكتب على صفحة الفيسبوك من مواضيع هامه لا تجد نصيبها من الاهتمام ؟ والسبب ان الفيس بوك مثل الموية فى قعر الزيز الكبير تشابي عشان تحصل وفى الاخر تخرج بخف حنين , لذلك لو اجتمع ابناء الشجرة والحماداب حول هذا الموقع كل هذه المشاريع ستجد الاهتمام . ولو اننى اشك فى ذلك ؟ ولو رجعت بكم الذاكرة للوراء قليلا وتصفحتوا على ارشيف هذا الموقع ما طرحه الاخ العزيز حاكم من موضوع مهم جدا وهو عضوية نادي الشجرة ولو كان هناك اهتمام من ابناء الشجرة لكان فريق الشجرة اليوم ينافس اهلي شندي فى الممتاز . هاكذا نحن نحمل افكار بناءة ونطرح مواضيع هامة تخص المنطقة ولكن للاسف الشديد لا حياة لمن تنادي ؟ ما السبب تعالوا نقعد تحت ظل هذه الشجرة ونناقش الموضوع من كل جوانبه ونعرف الاسباب التى تحول دون تكملة اي مشروع ونضع الحلول المناسبة لذلك . وكل منا يدلوا بدلوه لنصل الى قاسم مشترك بيننا . ولنا عودة