الكلام ليكم يالمنططين عينيكم

مساكم طلة وردية وين بتفوتوا ياانتـــــــو

صباحكم لى غنائية باكية حزينة لو فتــــو

ماصدقنا جيتونا تفوتو كأنو مابنتــــــــــــو

دخلنا قلوبنا ممكونة حتى عذرنا ماقبلتــو

وجيت شايلة السلام ليكم اغالب دمعى جففتو

وبرضو الناس بعيدة خلاص اريتكم جيتو مابعدتو

...
صباحك فرحة عيدية وين نلاقاها يا إنتي
مساكي طرب عديل حولية دراويش قلبتي
كان صدقتي فتناكي كان جيتينا كان بنتي
مرقتي وما عزرتينا أثرتي قلوبنا مكنتي
وردينا السلام ليكي ولي دمعاتنا كملتي
أريتك لو قربتي كمان ولي أحزانا غسلتي
...

شن الجية ياعمدة

انت انا وتلات انفار

جية فى لمحة زى غمدة

نبحنا كتير فى ليل ونهار

لادايرين يشاركونا

كلام ساكت ملان اشعار

بس جابونا ختونا

كل زول فات محل مادار

قالوا الشجرة حقتنا

احسن اقول كلاماً حار

لاها قطيعة لافتنة

والتقصير دة مابيندار

امرقوا جاى كفاية خمول

كلنا عندنا الاعذار

شوفوا صفحاتنا خالية قول

زى بيتاً خراب ودمار

ارجعوا بفروع واصول

ماقلتو الشجرة درة ودار!!!!!!!!!!

او خلونا نمشى نكوس

مكاناً يبقى لينا الدار

...
صحيح قولك لازم الناس يجوها كتار
كترة الناس علي الشجرة تزيدا عمار
وكتير بنادي قبل ما تصبح لينا دمار
يا ناس الحلة تعالوا علينا وأعمروا الدار
الشجرة الخضرة أضحت يابسة دون إثمار
حرام والله نفوتا خرابا نقول خليناها للأقدار
منو الغير أولادا يجي يرعاها كالأزهار
مهما كانت العقبات ما بتمنع زيارة الجار
خلي زيارة البيت الكبير اللامي للأنصار
كل الناس ظروف لكن للظروف مقدار
ورغم المعايش لازم يكون في إصرار
الداير يجيك بجيك لو يسبح عكس التيار
والداير يقطعك بقطعك لو حتي كان طيار
اللوم بقولو محنة يا أهلنا وما لامك إلا الدار
أستاذتنا أكيد بتلومكم وما قاصدة تخلي الدار
...