كلمنى عن حالك

...
يا زولة سارح فيك وفي جمال شاِلك
خـــليني أرتاح حــبة خــليني في بالِك
مين غيركـــم بيشغلنا فال الله ولا فالِك
والله موجودين وسائلـــين عن أحـوالِك
يمة الألم ساكن جوانا و أريتــو ما حالِك
ماشة ويــن راحلة يالسمحــة مــن دارِك
لو درتي نرحل نحن شان نطفي بس نارِك
كلمتها الأيام عن حــالي وصيتا إخبارِك
فضحتني ليه عندك ما أسراري أسرارِك
والقلتو في جــواي يايمة أكيد لي وبيبقالِك
إنتي الفرح والنور يا روعة بس مــالِك

كلمات متواضعة إهداء للوالدة نعمات إنشاء الله تعجبك بس

...

كلام سمح بالحيل خلانى أصفالك
سرحت فى الإتنين الكتبو أشعارك
حوّا الجميل قولها الفيهو ترحالك
و ودعمدةً زاهى النّور أقمارك
حاولت أكتب فيك لى قلمى أبرا لك
لكن كلامى قليل ما بيوصف أحوالك
بس كنت عايزة أقول...أحوالنا قدامك
تغنى عن أى سؤال...لو كان هو سؤالك
إلّا الألم قالو....أديهو بعكازك
شان الفرح يرجع ونشوفها أنوارك
بدل ما كنت فى الاول تكوينا بى نارك
ولسه القلب مشغول ..ماليِهو تحنانك
تحنان معاهو فرح ممزوج بآمالك
مابتنطفى الانوار دام فيهو تذكارك
وان شاء الله الفرح دايم يبقالى ويبقالك

وهذه كلماتى وان كانت اكثر تواضعاً الا اننى اتمنى ان تنال اعجابكم
فقد شدتنى اقلامكم الجميلة الى المحاولة

الابن العزيز ابراهيم....

جبت الكلام رائع مشكور عليهو كتير

ماليهو بالاحساس واللة معنى كبير

اصلو الشعر مرقد للحس مريح ووثير

مااروع الابداع يازول جميل واصيل

سعداً يدوم يبراك حالك يكون بخير

بيك تنتعش صفحات ويزيد كمان تطوير

الغالية ام احمد.....ياست جمال الروح

تتبارك ايامك والسعد ديمة صروح

حلقتى بينا بعيد جبتى الفرح مسموح

ياذوق ونسمة ود انسامها هابة تلوح

جانى الكلام معطور من كل روضة يفوح

يشفى العليل وجميل نسامو ردت روح

شكراً كتير ياضى غمر الجميع وصبوح

ياريت نقول كلمات تشفى الغريب مجروح

...
جبت الكلام منك و منك نهلنا كتيــر
ما منبع الإحساس من قلباً فسيح و كبير
ما أصلو الشعر نفحة و للمشاعر يثير
شكراً علي الإطراء يا قيمة بعد هجير
يرعاكِ رب الكون ولي طريقك ينير
بيك يزدهر سوداننا ونودع التأخير
...