مقطع من قصيدة عجيبة

مقاطع من قصيدة عجيبة "للشاعر الكبير الأستاذ/ هاشم صديق" ،

ألقاها بشجاعته المعهودة بتلفزيون (قناة النيل الأزرق) يوم الثلاثاء 18 يناير 2011م.

مما ادى إلى ضغط اجهزة الأمن على مدير القناة فقام بتقديم إستقالته







هِديمك يا ولِيد

مَقدود

وصابـِحنا الفـَقـُر

والجوع

صِبح باب التـُكـُل

مسدود

كِمِل حتى الملح

في البيت

وشِن همّ

المِلِح في البيت

وكِت مِلح

الدموع موجود؟

دحين يا وليد

هو ديل

موُ قالوا ناس

"إنجاز" !!؟

وشن سوّولنا

ممّا جونا

غير حَرقوا

الفضَل بالجاز!؟

كُل شيتاً

صِعِب في السوق

من الكبريتة

للطايوق

وكان جانا

البخِت تموين

رطيل سُكّر

وصابونتين

نجيب من وين!؟؟

اخوك مرفود

وعدمان الشهر

مِلـّين ؟

أمس زازيت

أكوس الدَين

مَشيت لسميّة

بت مامون

لقيت جابولا

تلفزيون

سَمِح بالحيل

تشوف الصورة

بى كم لون

وكِت في نشرة

الأخبار

ظهر "مك" البلد

يضحك

جضومو كباااار

مُزرّر الكَرِش

بي زرار

لا مهموم

لا مغموم

ولا زعلان

وشيهو

يراري بالألوان..

وَقّدْ في حشايا

تبّاق نار

طِريت رفد

الوليد والجوع

و سال

دمع الغبينة الحااار

أريتك يا ملك

فد يوم

يخلّي الجوع

عينيك ما تنوم

أريتك يا ملك

فد يوم

تحس بي غُصّة المظلوم

دحين يا وليد

هو ديل مالــُم

و مال الدين

وكِت قولـــُم

كلام الله

وفعالـُم

ما فعال صالحين

كتير فيهم

عديل حَقـّار

وبالقرآن

كمان تـُجّار

وكضّابين

أكان بنزين

عِدِمْ .. أو جاز

وتـِعْبوُا الناس

وضاقوا خلاااص

صفوف واقفين

يقولولك..

إرادة الله

وكان عِدِم الرخيص

والغالي

في التموين

يقولولك..

ده.. غضب الله

وكان الموية

صِبْحَت طين

يقولولك..

ده من أمريكا

والعُمَلا

حمونا الشّبْ

ولاد

الكـــــــــــلبْ

عشان الشعب

يحرن تبْ

يقبّل

من صراط الدِين

دحين يا وليد

هو ديل مالـُـــم

ومال الدين

أكان كنـَزوا

الدهب والمال

بلايينـُم

تسوّي جبال

وعرباتـُم تخطف

العين

و بناياتـُم قصور

في قصور

وحاة الله

و كتاب الله

أكان أدّونا

طوبْ فد سور

أكان سوّينا

ألف أويضة

لي مسكين

فترنا من الخُطــَب

يا وليــــــــــــــــــد

ومن طـَيش العقيد

وعميـــــــــــــــــد

ومن قلّ القِرش

في الإيد

ومن تـَعَب الوقوف

في الصَفْ

ومن غـُبْن الرَصِع

بالكـَفْ

ومن حُفـَر الدُروب

واللفْ

ومن خـَتّ الحِلِم

في الرّفْ

كل يوماً

نقيحنا يزيد

دحين يا وليد

هو كم دُغشاً

عشان نلقاهو

دافِرنا

وتِعِبنا شدييييد؟

وكم حولاً

صيامنا صَبَر

عشان يشرق

هلال العيد!!؟؟؟

أ ح ح ح يا وليد

لا حتى الخبيز

إنضاق

ولا هِدماً

كـَسَانا جديد

وشوف المَغـَسة

يا وليدي

سَمّوُا شقانا

"صالِح عام"

وكل دمعاً

نزل من عين

وكل جوعاً

سَكـَت َبالدَين

وكل زَيناً

محاهو الشين

ختـّوا وقعيتو

في الإسلام

حرامـُم يا وليدي

حلال

وانحنا حلالنا

كـُلـّو حرام

يقِلبوا الدِين

نصُل سِكـّين

وناسين

الحِسَاب قِدّام

آخر زمن

يا وليد

نشوف كل البشاتِن

لون

يفوت هولاكو

دوبْ نِرتاح

ينـُط في الكـُرسي

نابليون

أريتك يا أمير

حالي

جـِعّيص في الكرسي

في الخرتوم

وساويلك

ألِف والي

نبايعك للظلم والجوع

نبايعك

وكلُّ ضيم مشروع

نبايعك

وجيتنا جيش ودروع

نبايعك و الحُكـُم مقلوع

نبايعك

والقـَسَم مخدوع

نبايعَك

مِنْ سِجـِن عالي

آخر زمن يا وليد

حَصيف العين

يلاقي ويشوف

زمان

ظـُلم السلف

بالسيف

وحسّه السيف

كلاشينكوف

غير زمن

الهوان والجوع

كمان طالع

زمان الخوف

ديل ما برتو

لي إنسان

كم ولداً

وقـَع نشفان

وكم زهراً

كِتِل واتحتَّ

في رمضان

لا شهراً حرام

إتصانْ

لا كفـَناً سَتـَر صِبيان

لا شاهد

قبُر معروف

لا أمّاً

بَرَدْ نارها

سَكـَتْ وإرتاحْ

نزيف الجوف

دحين يا وليد

أكان حسع

ده ديش مُصعب

وأكان بيرق

علي الكرّار

منو الكفار!!؟؟؟

منو القاصدينـّو

بالتكبير

وبالتهليل

وضرب النار؟

* *

أخاف نحنا

وأكان نحنا

أخير نضحك

كتير سبب

الضِحِك بختهُ

شوف المَغـَسة

يا وليدي

ديل ما حسّه

ناس حُقـّار؟

ده زى دقّ الطبول

للموت

وزي وَقـْد البَلـَد

بالنار

* *

إلاّ نشوف

أكان ساهرين

معاك يا جوع

وأكان ضِيقـْنا

اتـْحَفـَر في ضلوع

وأكان صابرين

علي الفُجّار

وحاة الله

وكتاب الله

وكِتْ نغلي

ونكوس التار

لا سُوراً

بقيف في وشْ

ولا لهَب الغـُبـُنْ

بـِتـْرَش

ولا صفـّاً

يميل بالقـَش

كل ظالماً

يقع وينـْدَش

وسيل دمع البلد

ينقـَشْ

لا بحبس حَلِقنا

الخوف

ولا بنرجع

أكان لعلعْ كلاشينكوف

هديمك يا وليد

مقدود

وصابحنا الفقر

والجوع

صبح جـِلد البطـُن

مشدود

شِن بـِتـْسَوْ

وخيـّك

من شهر مرفود

قالوا صالح عام

عشان قال

العِوَج في العُود

* *

نان ما يقول

أريت يقول

عديل يا زول

هديك

البغلة في الإبريق

ما هامّينا

-صالح عام-

وديش مُصعب

ولا الحجّاج

ولا بـِكْتـُل

قلبُنا الجوع

والله ياكريم القصيدة تودي وراء الشمس مش تعمل استقالة لكن لزم صوت الحق يكون موجود ولا يعلو علية والناس لزم تعرف هذا

الناس عارفه يا ابا موفق وكل ليل لابد ان ينجلي وغدا افضل انشاءالله