انهم ياكلون لحم الحمير

العثور علي حمار مضبوح في مايقومة الحاج يوسف بشرق النيل بحري.. خبر جابتو واحدة من الجرايد .... شفت الصورة... الراس والجلد.. والكوارع...اولا.. الحمار مضبوح على الطربقة الاسلامية....صراحة لما شفتو مضبوح على الطريقة الاسلامية اتبسطت.. وعرفت انو البلد لسه بي خيرا و فيها ناس حريصين علي الدين.. وما دايرين يغشو المسلمين ويأكلوهم فطايس...
الحاجة التانية شفت الجلد حق الحمار المضبوح لقيت مافيهو ولا خرم.. مما يدل على ان الجزار الضبح الحمار دا جزار حريف...لو جبت ليهو جرادة ممكن بسلخها ليك ويطلع لك الجلد سليم...زعلني انهم رمو الكوارع.. ولي كوارع الحمير فوائد جمة وخاصة للناس العندهم رطوبة ووجع رُكب.....والنيفة برضو.. انا شخصيا احب في النيفة اللسان .. وقرمشة الاضنين... غايتو الله يكضب الشينة.. قبل فترة جبت لي لحم راس عجالي مقطّع ومكّسر,, ومنجض.. وقعدتا اتعشى..وقدر ما أمد يدي امرق لي قطعة اضان.. يعني لحم الاضنين كان كتير وانا في سري اقول ماشاء الله والله العجل دا فيهو جنس اضنين ماشا الله المال ما بيحسدو علا سيدو ... يكون حسي الحمار المضبوح دا اتباع على اساس انو عجالي... و والمكرفون في الجزارة يكورك... " كيلو العجالي عشرة جنية".... تقول للجزار انو اللحم دا غالي يحلف لك طلاق انو راس مالو الكيلو بتسعة جنيه ونص بالقباني...ويجي واحد عامل فيها من اكلة اللحوم وحريّف بتاع لحم ... ويقول للجزار بالله اوزن لي من الدوش خمسة كيلو... واعمل لي كيلو فرم...المشكلة التانية الخايف منها انو الجزار يطلع ما عندو ذمة... ويبيع لحم الحمار على انو ضكر.. و يكون انتاية.. اذ لابدن ان يعرض ما يدل على انو ضكر في خشم باب الجزارة عشان يبري ذمتو و يرتاح بال الزبون...
ايها السادة من اعراض اكل لحم الحمار للناس الما عارفين....
اول حاجة الزول البيكون ماكل لحم حمار... بي ينوم وهو واقف علي حيلو... زي الحمار بالضبط... يعني واحد يكون واقف مستني المواصلات يلقى نفسو دقس وهو واقف...
العرض التاني وهو الاهم ... انو الزول الماكل لحم حمار لما يجي يشهّق" يتثأب"... بيشهق شهقة طويلة.... ويختمها بـــ" وووووووووووااااااخ"... ويسمع الشهقة حتى الجار السابع في الحلة...لانو الشهقة بتاعتو بتكون على نفس الموجة الصوتية بتاعت هنيّق الحمير....
العرض التالت في النوم بيكون بيدفر.. ويرفس.. ويلفخ......
والعرض الرابع... استعمال عضلات الجسم في نش وطرد الضُبان.... يعني واحد ماكل لحم حمار. وركت فوق ضهرو ضبانة ما بيمد ايدو عشان يهشها.... بي يحرك عضلات ضهرو" يرفرف" .. عشان تطير.. او ركت ضبانة فوق كراعو .. برضو ما بيمد ايدو ينهرها ... يدق كراعو بالواطة.. مرتين تلاتة وهي استراتيجية حمارية في محاربة الحشرات...
العرض الخامس... في ضبانة خدرا كبيرة اسمها ضبانة الحمير... دي تجي من بعيد ويكون هو قاعد وسط عشرين راجل من دون الناس تختارو وترك ليهو تحت اضانو.... وهو برضو ما بيطردها بي يدو.. يستعمل حركة الاضنين في طردها....
العرض الخامس.. وهو نفسي..التصالح النفسي مع شتيمة يا حمار,,, يكون هايج ولما الزول المشاكلو يقول ليهم يا حمار,,, بحس بارتياح شديد... ويعاين للزول ويقول ليهو حمار منو؟..داك يقول ليهو حمار انت...دا هنا يرتاح ويتبسط ويقول ليهو شكرا... ويحسبها الناس انها تسامح منو...

الحمار والعياذ بالله صوته من انكر الاصوات ..سبحان الله ..ولله فى خلقه شئون ..يديك العافية
اخى ابو موفق على المعلومات والايضاحات .

الله يعافيك وشكرا ليك ياابوعبدة ( هناك بشر كاللؤلؤ النفيس صحبتهم شرف ورفقتهم ضمان والتواصل معهم حق
ونسيانهم محال والدعاء لهم واجب

ولك مثل ما قلت يا اخى الفاضل والشى من معدنه لا يستغرب فلك منى تحية خاصة وخالصة يا
ابو موفق وفقك الله وزادك نعيما من خيره الذى لا ينضب .

مشكوووووووور على المعلومات القيمه

شكرا اخي ابو موفق بس بنكون اكلنا من الحمار في البلد دي

والله يا أبو موفق شكلك خبير في لحم الحمير وميزاتو واعراضو ما عارفة يكون من شنو من أكلو الكثير
ولا كنت مشروع طبيب بطري؟ الحمد لله هنا مافي لحم حمير في لحوم إبل (ناقة ) يعني الواحد لما ينبزو يا طويل زي الناقة ما بزعل بل بشعر بالفخر كمان..........هاهاها[left]

والله ياالدرزي بكونو مستنسخين حمير البلد دي هههههههههههه

والله ياام عبدو لمن اكلت لحمة حسيت رجلي بركو ونعستة شديد