امسك نفسك وامسك انفاسك وأقرأ

هذا هو اخذ الثأر الذى وعدت به البعض الذين مازالوا يكتبون عن المراة [ ويشيلو حالا]


ياحليلو الزمان

الكان شهامتو تقيلة

يدفع عننا

كل قاسية يحلف يشيلا

جياب للسمح

مابقول قروشا كتيرة

ياحليلو الزمان

الحُبو كان بديهو

كان بيستر عليو

من الفراق بيحميهو

صاين عشرة ليها

مهما الزعل قام بيه

بيركع للبريدا

غير رضوة مابتجيهو

ياحليلو الزمان

الكان بقرش الجمرة

الدود النتر

والعين شرارة وحمرة

مابرضى العيوب

اب قول بختم الحضرة

سيد الراى سديد

فى صوتو هيبة وجبرة

جونا الليلة ديل

العشرتم منشترة

يااااااااااحليلو الزمان

راجلاً بعدل الميل

ست البيت تجيو
بدلالا ليهو تميل

يدفع للعطور

تديهو كل جميل

كان ماربنا

تركع تعبدو عديل

وينو الليله هو

ماللحنينة مجافى

تكرم عشرتو

لى خيرا دائماً نافى

تسكت بالقليل

ماليها وافى وصافى

غدار فى الظلام

يمرق حرامى وحافى

وينو الليلة هو

يطلب يقول يدوهو

كسلان فى الجسم

يتمنى لو شالوهو

طارد الرحمة من

بيت العيال الجوهو

نقناق فى الحديث

لو بس سؤال سالوهو

ماداير كلام

حتى الاكل حردوهو

وينو الليلة هو؟

بعرف معانى الجيرة؟

لابمرق بكا

لا بيكترث لى سيرة

لايبارك السمح

لابيمسح التكشيرة

يااااااحليلو الزمان

الروحو ليها براها

يديها الكتير

بى عمرو كان بفداها

بيحلف باليمين

اللقمة مرة بلااها

ولو غابت فى يوم

يتباكى لو يطراها

يوزنا بالدهب

ماليهو حب الاها

خربان الزمن

ما ادى حوا مناها

كان آدم عرف

نوع حوا كان جازاها.



اها قريتو ؟؟؟؟؟؟؟؟ انا هنا فى آخر الدنيا سامعة صفافير الاسعاف شغالة .

والله العظيم ده ولا شاكوش ولا قدوم انا الكلام ده نظمتو مخصوص عشان الناس الشابكننا المراة المراة ديل هم قايلين المراة دى ساهلة!!!!!!

كمان المرأة ورتكم الفرق بين جماعة زمان وجماعة حسه , بس ده كللللللل الموضوع .

ويابشاة ماتعمل فيها الكلام ده مرَ عادى والله تلقى وجعك , ...........وهو المطلوب .

ههههههههههههههههههههههههههههههههههه

اخى العزيز بشارة والله دى كلها اشياء بس من باب الدعابة والنكتة عشان الناس

تخفف على بعضها شوية انا عارفة كويس الحياة والروتين فيه كتير من الملل والاجواء السخيفة

قلت شوية ادخل البسمة عليكم , بلاهى ماتشيل هم والله فى ناس بيقولو ا الحياة حلوة

بس نحنا محبكنها حبتين , ياربى ديل خياليين وللا نحن بنهوى الدبرسة.

ولا يهمك كل شئ بيهون وربنا يدى الناس الصبر.امنياتى بحظ سعيد وانا فى انتظار المصلح بالجبنة والزيت. تسلم