انت المهم والناس جميع ماتهمنى

هذا الفنان الرائع المذهل فى ادائة صاحب الحنجرة الذهبية تغنى واطرب

وذبت معه بلا حدودحين قال:-

انت العزيز أرد حناحك ضمنى

وخايف تفوت والسكة بيك ماتلمنى

انت المهم والناس جميع ما تهمنى

انت الوداد نبض الفؤاد

بستان نضير وصفاء وعبير

وجمال رهيب, ودلال عجيب

وخايف تفوت والسكة بيك ما تلمنى

انت المهم والناس جميع ما تهمنى

جَيْتَك شعاع نجمة وشراع

نسيتنى يا عمرى الضياع

لو كنت جد بتعزنى وخايف تفوت والسكة بيك ما تلمنى

قول لى قول يا اغلى زول

خلى الحزن يرحل يزول

ورينى وين درب الوصول

وانا لسه تايه لمنى

وخايف تفوت والسكه بيك ماتلمنى

أنا بيك وليك ,مدًاح عيونك ومشتهيك

مهما تجور بنزف واجيك

لا بقسى لا بزعل عليك

لانك انت تهمنى وخايف تفوت والسكة بيك ماتلمنى

انت المهم والناس جميع ماتهمنى.



عندما استمع لهذه الكلمات وأتاملها جيداً , اسال نفسى فى حيرة سؤال صريح واتمنى ان يشاركنى فية الجميع بالرد وهنالك

احتمال 80% ان اكون مخطئة وربما انظر الى سؤالى من منظور قاتم. والسؤال هو ......هل هذه المشاعر فى معظم الاحيان تكون حقيقية

وهل من احب شخصاً هل عبارة [ انت المهم والناس جميع ما تهمنى] هل ياترى احساس صادق 100% ام قول لفظة الشاعر فى لحظة

حب واعجاب فقط؟ تمنيت ان اصل لقناعة بان هنالك حقيقى من يتفانى الى هذا الحد ولكن[ دون الانتظار لاى عائد]



فى انتظار المشاركة.

لما الواحد فينا يصل لأعلى و أسمى درجــات الحب
بيكون اهتمامو في اتجاه معين او تجاه شخص محدد
ولما الشخص ده يكون هو الوحيد اللي بيهتم بيك و بتحس بوجوده في كل مكان
حواليك..
ولما كل اللي حولك واقرب الناس ليك ما يكونوا حاسين بألمك و ووحدتك
ومعاناتك و يكون هو الوحيد اللي حاسس بيك و من دون ما تشتكي ولا تعبر عن اللي بداخلك
بيكون فاهمك ..
اعتقد انو من ابسط حقوقه انو يكون هو المهم والناس جميع ما تهمني
و لما يكون مصدر فرحك و كل احلامك وكل اللي تتمناه بتتمثل في شخص واحد
ولما يكمل كل النواقص اللي فيك و يملا عليك حياتك
ويكون احتواك وانتشلك من كل الضياع و الحزن اللي كنت عايشو
ولما يكون هو الشخص الوحيد اللي دق ليهو قلبك و حبيتو من أعماق قلبك
مش من حقو برضو يكون هو المهم والناس جميع ما تهمني
الناس جميع ما تهمني اذا وقفت ضد سعادتي
الناس جميع ما اتهمني اذا حاولت تبعد بيناتنا
الناس جميع ما تهمني اذا فكروا يهدمواكل اللي بنيناه
الناس جميع ما تهمني اذا حاولو يخدشو احساسنا الرقيق

عزيزتى حلم الاماسى تسلمى على المرور المريح , كلمات معبرة حقيقى

لمست ذلك الوتر الحائر , الحقيقة ذات التوازن المختل, ولكن فلنجعل الحقيقة تقف منصلبة

العود ولا نأبة للرياح ان عبثت بها ونستمر بالقول , لانك انت تهمنى وخايف تفوت والسكة بيك ماتلمنى

انت المهم والناس جميع ماتهمنى, واذا تثنت الحقيقة بعد ذلك فلتذهب ادراج الرياح ثم الى

الجحيم.