شعراء من بلادي

موضوع: شعراء من بلادي الإثنين 23 مارس 2009, 7:56 am

زولـــــة ـ جمال حسن سعيد

[b][size=16][b]زولة .......... كما النورس تجئ
تنزل شواطئ الالفة في الزمن الشفيف
وأنا زي مكتف في الرصيف
مربوط على حبل السفن في الظلمة والليل المخيف
بتجيني تدخلني وتقيف

·* * * * * * * * * *
شرشرت تيبان السكات على أرض رويانة وخريف
زولة .... بتعرف تدخلك ..... وتقفلك .... وتغفلك
تقعد على ناصية هواك .... وتشغلك
وأنت بتحنس غمام كي تجعلك مطرة ودعاش
طاير تحلق في السماء وأرضك فراش

هذا الفراش بيطير على نضرة رحيقا وخُضرتها ... ومحبتا .... ومحنتا
أو ضحكتها وسخريتا وتقعد تهضرب ياولد من حمتا

ولو تسألك وتحلفك في ذمتك او ذمتا
والى متى ..... هذا الجنون الى متى ؟ كل التفاصيل لمتا
هذه البنية قد أتت وأنت ذاتك كالورق
كيف تنجو انت من ذاك الغرق
من زكرياتك تنجو وين ؟
وين مهربك ...؟؟ من دفترك ...؟؟؟؟؟ من مصدرك ....؟؟؟؟ من مظهرك ....؟؟؟؟ من جوهرك ...؟؟؟؟؟؟
من حرقة الجوف والعرق

هذه البنية تفتح الروح ضلفتين
وعلى ضفتين في نهر احزان الزمن
تقعد تلوح باليدين
زولة
تخشك .... تمرقك ... عادي
ما بتقفل الباب من وراها ...... بل تساسق بين شفقتك وحرقتك ... ما بتاذنك
ما روحا نفاج غربتك
هذه البنية الساكنة أسرار فكرتك
هي الشايلة حسك وسترتك
زولة ... كما النور تجي
تنزل شواطئ الالفة في الزمن الشفيف .

،،،،،،،،،،،،،،،،،،،،،،،،،،،،،،،،،،،،،،،،،،،،،،،،،، ،،،،،،،،،،،،،،،،،،،،،،،،،،،،،،،،،،،،،،،،،،،،،، جمال حسن سعيد

[/b][/size][/b]

الله يجازيك يا الثعلب ،،، قصيده عضم ،،، قريتا مرتين عشان افهم حاجه ،،

و اخيرا طلعت بانه صاحبك ده كان مربط مع واحده و جات واحده تانيه جهجهتو ليك جهجهه شديده ،،، و دخلت ليك فيه شمال طوالى ،، بالرغم من انه حاول يسكت و ما يعبر لكن هى دايما كانت تنتصر و تنجح فى انها تدخل توش ،،،

غايتو كان القصه ما كده صححونا بالله عليكم ،،،

انا شخصيا استمتعت بالقصيده جدا جدا و ربنا يديك العافيه عليها يا حبوب

جمال حسن سعيد فنان شامل ... يكتب الشعركالدراما مسرحاً ثم يجمل الشعر كلمات يوظفها يعطيها دورا آخر وفوق هذا وذاك انسان (كامل الدسم ) يتميز بحجم «تقيل» ودم وروح خفيفةلا تملك إلا ان تحبه.

بعض المقاطع من اشعاره

فاتح شبابيك في النوم
ومطل على وادي نعاس
انا شفت لهاة الشمس
بتنقط اناناس وحراز
بصالح المطره
وانا شفت كمان الشجرة
بتقبل في الفاس
والكون بيصافح في المطلق
وعادي وبي غادي
سحابة تتمشي
في شارع فاضي

قصيدة تانية:

اهدتني عيونك كذا حلمة
فارس شايل سيف الكلمة
ورغم صفير الريح الضلمة
خليت عنوان في الرمله
الهوا لو مسح الجملة ضيع كل العنوان اترى بتلقيهو في حلمة
في شط النيل النعسان.

انا شفتها من قصيدة (كذا حلمة)
* * *
خليت عنواني في الرملة
الهواء لو مسح الجملة
وضيع كل العنوان
اترى بتلقيني في حلمة
في شط النيل النعسان
تلقيني بغسل فرحان
وجداني قميصو الشربان
**
انا شفتها
بين الوقار والإشتهاء
عز الألم والقهقها
انا شفتها شبهتها
ياها الحبيبة الرايحة
في لج الصخب
البدد الريح اسمها
وداسة في الغيم اللقب
انا شفتها وشبهتها الماشة في شارع التعب
الهمّ متكل بالشعب
انا شفتها

من قصيدة (حلة من الأحلام) للفنان الشامل جمال حسن سعيد

بيني وبينك
حلة من الأحلام
والصمت والحيرة
أحلامك ناصية في شارع البال
والسيرة ،،،
عادية ومسالمة وخطيرة
متاخمة سواحل في الروح
ما احلى صفات الجيرة
مين الدوزن عصب اللحظة
وايقظ فيني ملامح الغيرة

تخريمة :
انشاء الله استمتعت ياحوته

واللة يا الثعلب اخوى بصراحة شديدة وقال المثل لولا اختلاف الاذواق لبارت السلع....ولا انا غلط؟؟؟؟؟بالنسبة لجمال حسن سعيد شخصية ظريفة ممثل كوميدى رائع جداً لكن كثيراً ما استمعت لقصائدة وحاولت واجتهدت ان اعرف مرة واحدة ده اى نوع من انواع الشعر غلبنى . فانا فى ظنى انه يحاول جاهداً انه يكتب ولكن خرجت كتاباته فى شكل [ مصنوع صناعة ] وصناعة الشعر دائماً تؤدى لنتيجة عكسية بمعنى ان القصيدة تكون خالية تماماً من الطلاوة والحلاوة . ومما عجبت لة انت بالذات من يتذوق الشعر والادب بروح وذوق الادب عجبت انك استمتعت بهذا النوع الذى ---عفواً------لا خانة له فى جدول الادب . اقول هذا ولست احمل شيئاً على الاخ جمال ولا اعرفه شخصياً ولكن هذا هو رايي الشخصى, اذا لاحظ القارئ حمال ياتى بمفردات ويحاول لزقها مع بعضها البعض ليكون شعراً حاجة جد غريبة.

اعتذر وارجو ان لا يفهم البعض ان تحليلى هذا من منطلق التبخيس او تقليل الشأن , اطلاقاً ولكن اتمنى ان يلتفت الاخ جمال لذلك ويحاول ان يجود اكثر وامنياتى له بالتوفيقوالسداد.

تخريمة: حتى لا اظلم الاخ جمال مرة واحدة استمعت لقصيدة غنائية له لا اذكر اسمها كانت لا باس بها.

الثعلب كتب:: تخريمة :
انشاء الله استمتعت ياحوته

تسلم والله يا الثعلب على الزياده ،،، ،،،

و لك الاف التحايا ،،،

الغاليه أم رامز ،،، ممكن نطلق عليه مزيج من الشعر الحملنتيشى و شعر التفعيله الحر ،،،

عموما هو بيدى مساحه للقارئ ان يتخيل المعنى المراد من كل كلمه (مشاتره) حتى يستقيم المعنى و يصل الى مراد الشاعر ،،

و فى بعض الأحيان يكون الكلام غير المضبوط ضرب من ضروب الفكاهه ،، و الا ما اشتهرت نكات المساطيل ،،

التحيه لكى ،، و فى انتظار الجديد منك ،،

واللة يا محمود جائز انا على كل الاحوال احترم كل الاراء, وربما تكون نظرتى بالنسبة للغير فى غير محلها

تحياتى وودى.

» بلادي اهلاً .. يا بلادي
» سلاطين بلادي