العطور السودانية

الخمرة هي الرائحة الطيبة وهي نوع من العطور القديمة المعروفة عند العرب وان اختلفت مكوناتها، والخمرة السودانية مزيج من مسحوق الصندل والضفرة والمحلب والمسك مخلوطة بالعطور السائلة. وهي أنواع مختلفة باختلاف مكوناتها.

خمرة الصند

الريحـــــة الناشـــــفة

نصف كيلو صندل مسحون ناعما

وقية مسك مسحون

ربع وقية ضفرة





تخلط جميع المواد الناشفة مع بعضها في وعاء وتعجن بالصندلية وتلصق (تلخ) على جوانب الوعاء المستدير وتدخن بالشاف في نار هادئة .كلما تدخنت العجينة وتحول لونها للون احمر داكن تقلب ثم تعجن بالصندلية وتلصق على جوانب الوعاء وتعرض للدخان وهكذا تتكرر العملية مرة بعد مرة حتى تتشبع برائحة الدخان.ترفع العجينة من الدخان وتوضع في زجاجة وتصب فيها كل الروائح السائلة وترج جيدا وتوضع مغلقة في مكان دافئ لمدة أسبوع على الأقل حتى تتخمر

( تنظف الضفرة من اللحم وتغسل جيدا ثم تحمس على نار هادئة ثم تسحن ناعما)

الريحة السائلة

فلور دامور

رفدور

صاروخ

سوار دي باريس

صندلي


خُمرة الصندل


الريحـــــة الناشـــــفة
نصف كيلو صندل مسحون ناعما

وقية مسك مسحون

ربع وقية ضفرة

( تنظف الضفرة من اللحم وتغسل جيدا ثم تحمس على نار هادئة ثم تسحن ناعما)
الريحة السائله


تتكون من فلور دامور،،رفدور،،صاروخ ،،سوار دي باريس ،،صندلية

تخلط جميع المواد الناشفة مع بعضها في وعاء وتعجن بالصندلية وتلصق (تلخ) على جوانب الوعاء المستدير وتدخن بالشاف في نار هادئة

.كلما تدخنت العجينة وتحول لونها للون احمر داكن تقلب ثم تعجن بالصندلية وتلصق على جوانب الوعاء وتعرض للدخان وهكذا تتكرر العملية مرة بعد مرة حتى تتشبع برائحة الدخان.ترفع العجينة من الدخان وتوضع في زجاجة وتصب فيها كل الروائح السائلة وترج جيدا وتوضع مغلقة في مكان دافئ لمدة أسبوع على الأقل حتى تتخمر

الدلكة من أدوات الزينة الأساسية التي تستعملها المرأة السودانية لما لها من تأثير فعال على البشرة وترطيبها حيث يتغلغل الدهن والعطر الى مسام البشرة فتكسبها نعومة وحيوية ولمعان. وللدلكة تأثير صحي على الجسم فعملية الدلك تساعد على جريان وتنشيط الدورة الدموية وتشد عضلات الجسم فيكون متماسكا وتساعد على التخلص من ترهل الجسم خاصة مع التقدم في السن وقد إلتفت العالم حديثا لأهمية التدليك في المحافظة على الصحة والرشاقة فانتشرت صالات التدليك والمساج. هذا وتدلك المرأة لنفسها وزوجها ، وقد تدلك الام ولدها والاخت اخاها وان كان بعض الناس يرى حرجا في ذلك من غير زوجاتهم لارتباطها بالعلاقة الخاصة ، وفي ُصبيحة العريس كانت العادة ان تدلك الفتيان للشبان


فوائد الدلكة
الدلكة ذات تأثير فعال على البشرة تساعد على ترطيب الجسد في بلاد حارة وجافة أحيانا – كالسودان - ، وبها يتغلل الدهن والعطر إلى مسام البشرة فيكسبها نعومة وحيوية ولمعة ، وفيها راحة للمرهق خصوصاً أصحاب المهن الشاقة ، فهي عملية دلك طبيعية مُثيرة وهي رفاهية ومتعة للمرتاحين من أصحاب الوظائف المريحة ، وهي مقدمة لطيفة ودعوة مهذبة للمعاشرة الزوجية ، ولكن كثيرا ما تؤدي عملية الدلك الطبيعي المصحوبة بالدغدغة والمسد والهدهدة الي هجوم النوم خصوصا على الأزواج المُرهقين فيسلم وجه للحائط ويعطي زوجته قفاه ويغُط في نوم عميق ، وهي تُردد المثل السوداني الشهير ((سجم الدلـكتو وأدانــي عنـقرتو)) ومعها كل الحق لان الشاعر العربي قديما قال ،، والرود الفتاة شيمة بعلها ؛؛؛؛ إذا بات دون الثأر وهو ضجيعها

والرود هي الصغيرة اللينة الناعمة الرخصة ونحن في السودان نقول الرُخسة بضم الراء ونُبدل الصاد سيناً


مواقف طريفة

في صالة الجمارك بأحد المطارات كان موظف الجمارك يفحص حقائب العائدين من الخرطوم ، فكلما مس كيساً أو اناءً وسأل عن محتواه قيل له انه (طيب) حتى وجد بُقجة في حجم صحن العصيدة ، طرية ، بضة ، فدس اصبعه فيها وهاله كبر حجمها ، وكانت دلكة ، فقال : وهذا ؟ قال صاحبها ايضاً (طيب) !فقال الموظف ضاحكا : أنتم تبغون تعطرون البلد كلها ؟ فضحكوا وانصرفوا


طريقة عمل الدلكة العادية

لعمل الدلكة يستخدم حوالي ثلاثة كيلو من دقيق الذرة النقي ويعحن الدقيق بالماء المنقوع بالقرنفل (ينقع القرنفل في الماء لمدة ليلة كاملة) ثم يلطخ على قدح من الخشب ( صحن كبير ) في باطنه حتى يلتصق تماما ثم نكفي القدح على حفرة الدخان ويدخن بالشاف ونغطي الصحن والحفرة جيدا لتتغلغل رائحة الشاف فيه جيدا ويترك حتى يحمر لون العجين . ثم نرفعه من نار الدخان ويعجن مرة اخري ويبلل بمزيد من نقيع القرنفل ويوضع مرة اخرى على الدخان وهكذا نكرر هذه العملية لمدة أقلها ثلاثة ايام حتى ينضج و يكون لون العجين أقرب للسواد . دليل النضج هو تساقط العجين من القدح..ترفع العجينة المتكونة من الدخان وتخلط بالمسك المسحون والضفرة المسحونة والأرياح السائلة(وهي: فلور دامور والصاروخ وقلامور وقليل من الخمرة) وتعجن جيدا لضمان اختلاط العطور بالعجين وتعبأ في إناء محكم الاغلاق . يستحسن تقطيعها قطعا أو تشكيلها في كريات صغيرة لسهولة استخدامها. عند الاستخدام نأخذ كتلة صغيرة وتبلل بالماء حتى تصير في شكل شبة سائل ويدلك بها الجسم ويستخدم الدهن أو الزيت المعطر ليسهل خروجها ويكسب الجسم لمعانا


دلكة المحلب
دلكــــــة المحلب يسحن المحلب ناعما ثم ويغربل ثم يعجن بعصير الليمون المخفف بالماء وتدخن بنفس الطريقة المستخدمة في دلكة الذرة وتعجن في كل مرة بمزيج الماء والليمون حتى تنضج وتتساقط من القدح. تعجن بالعطور : صندلية ، فلور دامور ومسك مسحون وقلامور وتعباء في إناء محكم الإغلاق وتترك لتتشرب العطور. تستخدم بنفس الطريقة السابقة


دلكة البرتقال
يجفف قشر البرتقال والقريب فروت ثم يسحن ناعما ويغربل ويعجن بمزيج الماء وعصير الليمون ويدخن بنفس الطريقة السابقة حتى ينضج. يعجن بالعطور: الصندلية،ر والفلور دامور والمسك المسحون ويعبأ في إناء محكم الإغلاق ليستخدم عند الحاجة

العطور السودانية


عربية اصيلة وفي الحديث الشريف (عليكم بالعود الهندي ) ، واستخدمت العرب قديما العود الهندي الُمطري وهو الذ ي يُرش ويُرطب بالطيب ، والعجيب ان صاحب لسان العرب قال : (طرى الطيب إذا فتقه بأخلاط ) ، ونحن نسمع أمهاتنا وكبيرات السن المتخصصات في صناعة أخلاط الطيب يقلن فتقي الريحة ) فالتفتيق اذن من فصيح العامية السودانية ، وتفتيق الطيب أو الدهن هو ان تصب عليه أخلاط الطيب والقرنفل وقشر البرتقال أحيانا وقد يضاف اليه (الودك) قديما ويغلى في النار وذلك هو الكركار



طريقة صنعه واستعماله
في السودان نرش البخور بالصندلية والفلوردمور والريفد ور والسوارد باريس والصاروخ ، هذه هي الخلطة التقليدية ، ويُذر عليه سحيق المحلب والمسك والضفرة وانواع العطور الاخرى حسب الامكان وتوصف ا لمرأة المتدخنة المتبخرة بانها (مكبرته) ، اما طريقة استعماله فيوضع الجمر المُتقد في الجمر المُبخر ويوضع فوقه الصندل المطري وتكبو ا لمرأة فوقه فتبخر جسدها عامة والملابس خاصة وتبخر ثيابها وبيتها ، والعرب تقول تكبت المرأة على المجمر اذا اكبت عليه بثوبها وهذا ما تفعله نساؤنا ولهن في ذلك اختصاص ولهن عليه صبر عظيم ، فهل فعلت السودانيات الإ خيرا بالمحافظة على الموروث


القديمة وتطويره حسب البيئة مستفيدات من مُعطيات العصر ذاك كان هو دخان الزينة ،، وربما تدخن الناس علا جا بالبخره او باللبان اللادي بغرض طرد الارواح الشريرة ، او هكذا يعتقدون ، وقد يتدخن الرجال علاجا للرطوبة وليس دخانا كدخان المراة ، وان كان بعضهم يفعله فقد حُكي ان صبي ارسل الي عمه فلان فوجده فوق الحفرة غا رقا في الدخان متغطيا بشملة (الحاجة) لا يبدو الا رأسه فكلمة وهو يعصر عينيه وهما محمرتان دموعهما كالمطر ، وهذه بوخة تامة بحجة علاج الرطوبة ، وقد يتدخن الناس باللبان وهو بخور الأنبياء والصالحين ، وقد مر بذلك شيخ البرعي الكردفاني داعيا في إحدى مدائحه فقال وفق برعي في الخلوة البخورها لبان

بدوووووووووووووووووووووووووووووووووووووووووووون تعليق.

[b] الاخ عبد الوهاب
تحياتي
تشخيص سليم
ولدنا ادريس قدم اقتراح لقيام منتدي الخطوبة والزواج
من هنا عرفنا السبب ادريس عندو مقاييس ومواصفات ما قدر يلم فيها بي اخوي واخوك قال يجرب النت يمكن يلقي شي مناسب
الاستاذة الفاضلة نعمات مارست دورها الطبيعي كمربية وام وقدمت النصح المفيد
صاحبنا لمن مالقي درب بقي يهدرب بالمقادير والوصفات
وبالمناسبه بتاعه البرتقال والقريب دي اول مرة اسمع بيها ودي بياخدوها كيف حبوب ولا شراب

اقتراح
يا عبد الوهاب ياخوي نحن الكبار انا وانت وسامي والكبتن الرائع نسوي جلسه نشوف موضوع ولدنا ادريس لو في اي عضو عاوز يشارك مافي مانع
مع تحياتي

الاخوان الافاضل
محمد عباس والاخ وهبة
لكم التحايا الطيبة
ادريس امره يهمنا كلنا لكن الاختيار صعب وهو ما حدد المواصفات
نخلية يختار ويسيب الباقى علينا باذن الله ما نقصر معاه
القسمة وين ما معروفة

والله يا اخوانا انا مش بت واي حاجه ما عارفه مواضيع الريحه دي لكن زي ماقال عبد الوهاب ادريس عندو مرض حامد . عشان كدا ماشي المصايد وبعاين في البحر . خلاص نتفق ونعمل جلسه نشوف موضوع ادريس ونحلو ان شاء الله ولا رايكم شنو نمشي الراكوبه ونشرب لينا قهوه وحنصل لي حل ان شاء الله

لك التحيه يا ادريس العريس

اقتراح جميل من الاخت شذى نتقابل يوم الخميس العصر فى الراكوبة شذى ونعمات عليهم الشاى والقهوة انا عندى صديقى من ناس التيمان ( بخور التييمان ) البخور علية انا والله يا ادريس حاسس كده المسأله ماشية كويس بس ما تنط الجماعة جادين

يا اخوانا شويه شويه شايفكم جهزتو الشيله والريحه حتي السيره عملتوها بس العروسه ويييييييييييييييييين

وبعدين وروني حتكونو في الراكوبه متين عشان

انتو انا ما عارفة تعبانييييييييييييييين ليه كده اولاً الخواجية الجاية معاى دى يمكن ما ترضى بريحتكم القوية دى يعنى يمكن يكون بس قعدة فى الراكوبة والاستاذ محمد عباس يعقد وانا اديها زغرودة وكل زول كباية شاى ولا قزازة بيبسى والموضوع انتهى وكل قرداً يطلع جبلو .

الجوطة فى شنو ,كدى اسالو لى العريس ده رايه شنو ؟ وادونى فيد باك اوكى. وانا فى الانتظار.

[b] يا ادريس
يا عزيزي الثبات علي المبدأ
العروس لازم تكون سودانية ( بنحب من بلدنا ولا شنو يا ابو علي )
قطعا اختيار الفاضلة / نعمات موفق لكن السودانية بتستر الحال البنت الكندية كل شوية تقوليك عاوزة امشي كندا اشوف امي , ولا يجيها ليك الصيف وحال الكهربا الواقف ده و تعسكر ليك في بحر ابيض ما تعرف ليك معاها حل , وذي ما قالت الاستاذة الفاضلة نعمات لو الريحه التقيله ما قدرت عليها وصفاتك دي توديها وين
نحن العقد قادرين عليهو بنظبطو ليك تمام وكلوا علي حسابنا ما تشيل هم والشنطة بأشراف الكبتن وبقية العقد الفريد في بلاد المهجر بتكون حاجه تمام وام حسين هي الحا تختار الاشياء الجميلة فهي ذوقه عالي
الاخراج والاشراف الفني علي الاستاذة الفاضلة نعمات باقي الترتيبات بناتنا شذي وحلم الاماسي ورنا والاخريات حا يقوموا بالواجب
علي كل هذه المواضيع رايح تناقش باسهاب في اجتماع باكر
هذه هي الاجندة ومؤشرات الاجتماع كل واحد يحضر رؤيته للموضوع والنقاش باكر
الكورة في ملعبك
يا ادريس

وانا جاهزة يا استاذ والاختيار الاول والاخير للعريس والبقولوا يمشى باذن الله.


وحقو انحنا ما نسبق الحوادث مش يمكن تكون يا استاذ كندية ساكت بالاسم لكن سودانية الطبع

والصفات , مش يمكن تكون شايلة من النيل صفاه ومن جمال النيل بهاه.

او تكون النوع البرئ الطيب ويقدر يماشيها على هذا الاساس ,

لانه ادريس طبعه من كتاباته زول متمكن فى تفهم كل انواع البشرلذلك ما حتواجهه اى مشاكل.حقو ما نحكم من بعيد.

ولا رايك شنو يا استاذ فى هذا التحليل؟؟؟؟؟؟؟؟؟؟؟؟؟؟؟؟

[b] الفاضلة / نعمات
تحياتي
احتطت لهذا الامر فقلت في بداية ماكتبته ان اختيارك موفق ونحن لا نعترض طالما الامر علي ضمانتك , ولدنا ادريس رقيق و مهذب بشهادة كتاباته و من يعرفونه عن كسب هنيئا له بأختيارك ونحن من وراك نبصم بالعشرة .
وكعهدنا به محمود الصفات والذات ابن الاكرمين شمر عن ساعد الجد وتحمل مسؤلية الخدمات والاشراف علي التوزيع واكرام الضيوف ( ما تنسي تخبي ليك صحن كارب للعريس)
اهم شي الصيوان يكون جنب الراكوبة والكوشة بين الراكوبه والصيوان بس الفنان ماعرفناه شعبي ولا غناء حديث ولا نجيب فرقة جاز للكندية .
يا ابو علي ما تنسي تعزم ست الشاي يمكن تصلح علاقتك معاها
يا كبتن ما سمعنا رايك

والله ياحسن ده حالتو فتحت العلبة يادوب يعنى الخيوط ما جروها عشان الناس تنزل فى الزار

يعنى ان شاء الله كدة كان جرواا خيط اللولية فى جماعة كتيرين بنزلوا عشان كده قلنا زمان بهدوء تام نشوف موضوع ادريس ده ونقفل العلبة سريع لانه باقى الخيوط لو جروها الجماعة كلهم بيعملوا فيها متلبشين وما واعيين واول ما يسألوهم طلباتكم حيكون الر د[عروس] ويادوب الفاس وقع فى الراس. تانياً حرام النسوان المساكين ديل ماعندهم ذنب يعنى. عشان كدة اخلصوا لينا من ادريس وبعدين اقفلوا العلبة سرييييييييع.

يبدو انو الصف حيكون طويييييييييل


محمود خلييييك جاهز YOU ARE UP NEXT

محمود كتب:

اثبتت التجارب مؤخرا ان "مرض حامد" من الأمراض المعديه جدا ،، كما اكتشفت المؤثرات التى تساعد على انتشار المرض و هى كما يلى:
1- رائحه البخور و الريحه البلديه
2- أصوات الزغاريد
3- حنة الراجال فى الكرعين
4- صوت الدلوكه و اغانى البنات
5- رؤية الصيوان (مالم يصحبه نواح و عويل)
و غيرها من المسببات او المحفزات ،، و تحزر وزارة الأسره العائليه الأخوه المتزوجين من هذه المسببات و تنصح بالأبتعاد عنها تماما لتدارك اثار المرض المدمره على هذه الفئه من الناس ،،،
كما تحرض و تشجع فئه العزابه على التعرض لهذه المحفزات التى تساعد الغدد العقليه لديهم لأيجاد وسائل مختلفه لأنتاج مادة (الدولارين $$) التى تقوم بمثابة العامل الرئيسى لأكمال العلاج ،، كما تساهم بصوره كبيره فى زيادة ضربات القلب عند رؤية الخطيبه و بالتالى استخدام مادة الدولارين فى التماثل السريع للشفأ من هذا المرض ،،،

تخريمه: و الله يا ابو على الحمدلله انك فتحت العلبه ،، اهو ادريس هسى متقدم ،، و ان شا الله عقبال الفى الصف كلهم ،،، بس استاذه نعمات تكمل شغلا و تجيب الكنديه

ايويوى ايويوى ايويوووووووووى

ابو العزائم احمد الطيب كتب:

لقد حزر الأخ الدكتور محمودعبد الباقي مصطفي وزير صحة المنتدي من خطورة المرض وتفشيه بصور سريعة جدا
واوضح الأسباب التي تودي الي المرض وناشد جميع الأعضاء بالعمل سويا علي القضاء علي هذا المرض
والأثار الجانبية لهذا المرض هي زيارة بحر المصائد والتجوال كل عصرية علي الشاطي هذا مما ادي الي إصابة الاخ إدريس
كما ظهرة حالة أخري هنالك وأنتقلة العدوي من إدريس الي الأخت شذي لأنها كانت ملاذمه الي الأخ إدريس أثناء توزيع الإعلان في بحر المصائد

هههههههههههههههه والله بيني وبينك مامرضته لكن الظاهر زي ماقلته اصابتني العدوي بس الدواء ويييييييييييييييييييين