صحون بايركس ولا !!!!؟

اعتذر مرات كتيرة بنحاول نعالج بعض الاساسيات بالشعر ..

حلمت يوم وان شالله خير بالجكس جارى وراى
وحدات بفساتين وحدات ببناطلين وواحدت كده !!
سالتهن مالكن يا بنات ؟
الحاصل شنو الشباب خلص ولا الكشة جات
ردو على بكل حزن "نحنا ديل بايرات "
طيب مالكن جاريات وراى ولا الحالة جات

ابدا يا ود البلد اصلك غريب ما من هنا
وكانت معاك واحدة زى السوسنا
اااى دى مرتى !! كانت هنا
حبى الاصيل جوه القليب مزروع هنا
ساترانى والله ومنها جبت الجنا

طيب يا بنات بلدى قصتكن شنو البيرسكن منو ؟؟

وحدة قالت :
انا اتقدم لى عريس من البلد صاحب تمر
ابويا عاين ليهو من فوق لتحت
ومن الصباح لحد العصر
وقاليهو انا بتى دى متخرجة وعدمتنى التعريفة من درس العصر
هسى عاوز تسوقة عشان تلم ليك التمر
حرم تلاتة لجوه حوش البيت مااااااااااااااا بتمر

والتانية قالت :
وانا اتقدم لى عريس من وزارة الكهربا
ومن ابوى سمع انو من البلد عوج حواجبه وقام ابا
حبوبه زعلت وقالت لابوى هو فى واحد بيابا يناسب ناس الكهربا
وامى قالت برى!!! يا بت هى ما تخلى الكبكبا
اها العريس كسح ورسل ليهو فاتورة ملهلبه

والتلتة قالت :
وانا اتقدم لى عريس فى الحسبة قالو مغترب
ومن بلدو البعيد وصفو ليهو الدرب
ولمن وصل قابل ابوى قاليهو المهر بالدولار
وخرفان العرس من الغرب
العريس لملم هديماتو وجري كب كرب
وامى من الزعل حرشت ليهو الكلب.

والرابعة قالت :
وانا اتقدم لى ود عمى من لحمى ودمى
بصراحة انا اتردد كثير لان "سامى" قال بيحقق لى حلمى
كلمتا امى و ابوى حلف الا يصفى لى دمى
وللاسف "سامى" اغترب ولا راعا لهمى
وبعد وكت عرفته انو "السره" خطبوها لود عمى

.......................................
اها
اها البيركسن منو ديل نقاش حتى لو بالشعر ؟؟؟

...
بورتن الشعارات والمظاهر اللحظية
دايرات العرس وخايفات تقطع الماهية
ناسيات الأصل في الفكرة سترة ونية
للأسف الشديد أبواتن هن سبب الأذية
...

ابراهومة

هل كان العصر بكل تقنياتة وانفتاح ابواب الحياة العامة للفتاة
علي مصرعيها سببا في هذا التكل الكبير من العنوسة ؟؟؟