سحر الكلام ( مُجادعات )

بوست نحاول ان نمزج من خلاله كلماتنا مع بوح تختزنة الايام
بشغف نرمي بالحروف عله يجد مكان في النفس .

بدينا ...

اقول شنو لو ايدي دقت برقة " دق " في بابو
وسابقني القلب قال لي والله حبابو

...
سيف الأستاذ
الفكرة سمحة ونتمني ليها النجاح

بدينا معاك

قول يا ريت يكون صاحي زمان ما كنت بصحابو
وكان هاجد يكون مرتاح و أنا نار شوقي بصلابو
...

يا جماعة تعالو قربو جاي
نقعد فى بساط المنتدي الرحاي
نشٌهِد كلامنا للقُمري العديل قوقاي

الكلام ما انت سيدو والجمال دايماتجيدو (اخي سيف الاستاذ لك التحيه وانت تمطرنا بالابداع)

كنت كايسلك بداية
هسي ما داير أنتهيك

كنت في ألحان غنايا
هسي جمبك ومشتهيك

في الجمال مخلوقه آية
أي خصلة جميلة فيك

قهوة في فنجان هوايا
بفني عمري وأحتسيك

...
منك بديت وليك بتكون النهاية
ما ياك الحنين أنا روحي ليك

ديمة بحلم بيك حكاية
وكل تحناني بسوقو ليك

كل الخصال السمحة جايه
وأي لمحة أصيله بتناديك

حبك الجاري في دمايَ
وريدك المنك وفيك
...

اذا دخلنا مع رانيا او ابراهيم العمده في مجاراة فلسوف نخسر خسرانا مبينا لان الاثنين ابداع يمشي علي قدمين دمتم ولكم الود والاحترام

جيت اتاوق واسمع النضمي الرزين
لقيت الكلمة محبوسة بانين
رانيا بريشة بتغازل الحرف الحنين
وابراهومة يرمي يبني في عشا امين ..

صاقرنا الجهاز وبكي بدموعو معانا
قال لي قوم واتصبر علي البكانا
وعاين لاخوك من الحب يبس
ناااشف تقول خرسانا .

حبك فى فؤادى ينزف يقطر دمو
استحملت البعاد الكاتم على بهمو
لو دمى نفذ والله من دموعى بتمو

سودانيه رانيا الكايده لي عـــــــذالا

عثمان بينم يفرتق لمة العـــــــنقالا

بت الزين الفي المـــــــــــقام تتعالا

ابراهومة يلاقي الخيل ترد جفـــــالا

واسماعيل يهون للهموم شيــــــــالا

و حاكم يخت الكلمه بي تكــــــالا

وكتين الدواس بس قولو يا بو وليد زمـالا

بي يد من حديد بضرب بدك انـــدالا

طيف سحاب شايلو سراب هاشيهو هش
أهو ده الهمس يوشوش للقليب لمن جوانحو ترتعش
والعين تدمع ونحول جسم وتوهان جنون ونومة برش
همهمة وهمسات حروف تلقى القلب بقى ليها عش
حُبك اسم وكمان رسم
حُبك دموع تروي الخدود

...
الليلة الدريب ساقني وجابني لي جديعكم
تعالو وصنقرو ياخلان وأقعدو فوق رجليكم
إسمعوا للأستاذ سيف سمح النضم يحكيلكم
وأدونا الخلاصة تمام ومعاها لي تعليقكم
وياريت تدونا النتيجة وياريت كمان تحكيمكم
...

سيف الاستاذ والله مافي كلام اتخيل لي كده ضربت ابراهيم العمده ورانيا شحاته تسلم علي الجمال الذي توزعه هنا وهناك لك كل الود وفائق الاحترام

ابراهيم العمده كلمات جميله كما عودتنا دائما لك كل الود والاحترام (لكن سيف الاستاذ اخطرمنكم ولا رايك شنو) اما نحنا والله ما بنقدر عليكم انتو طلعتو شعراء عديل كده

عثمان بشير كتب:: ابراهيم العمده كلمات جميله كما عودتنا دائما لك كل الود والاحترام (لكن سيف الاستاذ اخطرمنكم ولا رايك شنو) اما نحنا والله ما بنقدر عليكم انتو طلعتو شعراء عديل كده

...
عثمان الحبيب رأيك أكيد هو الغالب
زمان قالولنا العين ما بتعلو فوق الحاجب
هو الأستاذ وأنا دوبي ليهو الطالب
وفرحانين بي وجودك خليك جنبنا حادب
...

ابراهيم العمده كتب:

عثمان بشير كتب:: ابراهيم العمده كلمات جميله كما عودتنا دائما لك كل الود والاحترام (لكن سيف الاستاذ اخطرمنكم ولا رايك شنو) اما نحنا والله ما بنقدر عليكم انتو طلعتو شعراء عديل كده

...
عثمان الحبيب رأيك أكيد هو الغالب
زمان قالولنا العين ما بتعلو فوق الحاجب
هو الأستاذ وأنا دوبي ليهو الطالب
وفرحانين بي وجودك خليك جنبنا حادب
...

يا سلام يا ابراهيم يا مبدع تماما شديد والله تسلم

اسياد الحروف بالجد كلامكم رائع
في سحر الكلام بالجد بقيت متنازع
ابراهومة الفريد والله احلى مجادع
و عثمان سيرتو نجماً مضوي ولامع
و انا بوراكم مصنقر خلوني ساكت تابع

عثمان
ترحيبك يمين فى قلبى ليهو مكانو
فى جواي بشوفو و شاغل جميع اركانو
حرفك جميل انا صرت من سكّانو

وابششششششششششششششروا ...

ابراهومة / رانيا / عثمان و البقية ....

زيدونا خلو النفوس تنتح ويبرد نارا
نمو وقوقو زي صوت القماري فوق اشجارا
نضميكم حنين زي الناقة لمن تحضن عليها عُشارا

...
أستاذنا الحبيب الليلة جيتك غاشي
مشتاق ليك وكُت من فريقك طاشي
هسي رجعت وتاني تب ما ماشي
أدونا السر وبيناتنا ما يكون واشي
...

ابراهومة مرحب حبابك تاني
لسمح الكلام ولنضمي الكتير اشجاني
حروفك ملفوفة جمال اطراني
تترجم اسمي خصال و معاني

سلام ناس المنتدى أهل الكرم والشكرة
سلام أصحاب العقول النايرة أهل الفكرة

وين ماظاهر
ياللونت حياتي وصرت
لي الريد والحب الطاهر
ويالعمقت احساسك فيني
وفيني احييت احساس ومشاعر
ووين ماظاهر
يالدوزنت قوافي غناي
واتوسد جواي غرام
ويالشكلت معاني رؤاي
وفيك بنيت انا كم احلام
انت مثيلك مافي ونادر
ووين ماظاهر
وين ياغالي وجد فاقدنك
دي الايام من غيرك تمضي
دون مانحس بطعمها يوم
مانحن الناس الجد رايدنك
وانت الراسي وخاتي اللوم
طل وحياتك في دينانا
خلي الضؤ منساب يغشانا
انت الغايب وبرضو معانا
جوة الروح والجوف والخاطر
ووين ماظاهر
لو شفت ايامنا وراك ياغالي
ودون عينيك كيفن بتكون
الازهار من غيرك تزبل
والاحزان بتعم الكون
ونحن وحاتك حالنا يحنن
صابنا وراك ياغالي جنون
لا افراح في يوم بتجينا
لا انسان في الحزن يشاطر
ووين ماظاهر
اظهر انت وبان ياغالي
امحي الحزن العشعش فينا
ايام وليالي
فرهد لي زهراتنا الفضلن
قشقش لي دمعاتنا النزلن
نحن معاك محال نتخوف
اعمل فينا زي ماداير
ووين ماظاهر

سيف فى النضم خاتانى تانى اجاهر
من قول السمح نضمو الدرر وجواهر
ي زول كريم فى القول الجميل والباهر
يجزيك الكريم ي النورت جوانا باطن وظاهر

عمده وعماده قولنا
ترحابك يهل يملى البلد بى طولا
مبسوط دايما عليك بالخوة
ي الله الكريم ترد غربتكم
وتجمعكم شجرة الالفه
ي ربى دى امنيه صعبه ؟

عثمان بشير هو تانى بقى فى نضم بعد كلام استاذنااا
تحياتى واحترامى للجميع

ياااااااااااااه
انا من ملاواة القصيد
خلاني أكاتل في الحروف
صبحان حالتو معاي عنيد
كل ما ألاقي الشوق وصل
يوصدني بي بيبان حديد
مالك علي ودرتني
وأنا لسة في الزمن السعيد
واااااه
أنا من قساوتك ياحرف
يوماتي ببداك حال جديد
ياخ ماكفاك انك طغيت
ما عندي قدره انا ليك أعيد
وياخ بس كفاااي أنا من أساك
حالت عزاي كل يوم تزيد

خَجلٌت الورود المن شوفتك غيرانة
خليت الزهور تتلفت زى الحيرانة
حتى الجدول عطش ومويتو هديك مليانة

اخوات الرجُال سيرتم عطرانه
تشفوف الضحكة نايرة والله ما زعلانة
جوه البيت اناث وبراهو اسود سعرانة

فى سيد الرجال انا بقولو غناى
لى بيت القصيد الله اليتمو مناى
ي سيد الحروووف فاته الكبار بى غادى
ماعارف الفرح فى الحى شى ماعادى

طبعا بى طلتك

...
من محبتك إنتي مستحيل في يوم أقيف
ما حبي ليك جاري زي مطر الخريف
من مودتك يا روعة يا ضُلي الوريف
ما إنتي سحابة الرحمة في عز الصيف
من معزتك إنتي يا فرحة القلب الرهيف
ما إنتي الأمل الواقف طول فوق القيف
...

لطلتك جيتك مسافر , مُهاجر

اناملها تخط حروف النثر و الشعري
لها قلب تجلي كضوء خاطف البصري
وبراءة العذراء في الخدري
ونقاوة الالماس والزفري
تراها تملك الدنيا من الصغري

ابراهومة سيد الحروف السمحة

نمك در جميل منظوم عقد من لولي

يا جماعة تعالو قربو جاي
نقعد فى بساط المنتدي الرحاي
نشٌهِد كلامنا للقُمري العديل قوقاي
العاوز يبكي يبكي هنا !!
والزعلان يكوبو هنا!!
نصفي قلوبنا من هنا وهنا

...
محال أنساك وهل أقدر أعيش عنك بعيد تاني
طبيعة الدنيا يوم فرحة ويوم بتعيش ألم تاني
منو البقدر يفوت يرحل يسيبكم إنتو من تاني
ودايما للرحمن يجمعنا ويلم أيامنا من تاني
...

نوعتا الكلام ،، صحنين فواكه وتونة
وباسطة وحلتين ،، ومرات كمان ليمونة

وابشر يا ابراهومة

دقيـت اليميـن انـو القمـر إتدلى
في نص النهار سارح يحوم في الحله
غيمت السما وشـرقت نجـوم تتجلى
وانبهرت عيون عاجـباها خـلقة الله

يامستكين على
جواى
وقصصك
على ضل القعاد
مع انو
كل الناس
بعاد
بتحكيك لى
حيط المكان
وتغنى بيك
الكان زمان
وتبداك
من اول حرف
منقوش على
زمن الحنان

افتش ليك واسال شجير البان
واقيف فى قيف واراقب كل زول ولاهان
وافتش فيك واسال الوديان
لكن الاقيك وين وانا الحيران

مصايب الدنيا والمحن البدت في جرفي
ما خلتلي غير ألما"مجدد زرفي
فراق الليه قافياتي و قصيدي وحرفي
أهون منو طعم الموت و أحمد شرفي

تجارة اخر الزمن فانيه وعميره قصير
المال مابعز ود القبيل مو خير
الشبع البعد جوع سيدو ديمه صغير
والريش البقوم بعد الكسر مابطير

ياخ كيفنك وكيفا عيونك؟!
كيف البسمه الفيك بتحير..
رعشة إيدك..سمرة لونك..
كيفو حنينك؟
بحر الالفه البيني وبينك..
... روعة سحرك..سحر جنونك..
جد بشتاقك أنا والقمرة
وحتي الليل ماليل من دونك

ﻭﺍﻧﺎ ﺣﺎﻟﻲ ﺑﻌﺪﻙ ﻣﺎ ﻫﻮ ﺣﺎﻝ..
ﻭﻋﻠﻴﻜ ﺍﺩﻣﻨﺖ ﺍﻟﺴﺆﺍﻝ
ﺑﺴﺄﻝ ﻋﻠﻴﻚ ﻛﻞ ﺍﻟﻨﺠﻮﻡ...
ﺣﺘﻰ ﺍﻟﺸﻤﺲ ﺳﺎﻋﺖ ﺍﻟﺰﻭﺍﻝ
ﺍﺩﻣﻨﺖ ﺷﻮﻓﺘﻚ ﻭﻃﻠﺘﻚ...

كنتى لحنا من طيف الخيال اتانى
عزفته وترا
وداعبته باناملى
اهتز في حزنا يردد أغنية
فعرفت من فوري انك ماضية
فكنت أنا المجني عليه
وكنتى أنت الجانية

السما مفتوح
والواطه براح
والليل منديل
من ضو فضاح
القمره حبيبه بتتشطف
من جدول نجمة
ولابسه وشاح
وأنا شوق مجدوع
قدامي الشاي
وغنيوة حنينة بتفهم أساي
وأحلامي مراح

ما قادر اقول ليك يا "يما" انا مشتاق
وما قادر اعاين ليك واملئ العين بكل رؤياك
وما قادر امد ايدي الامس ايدك يا يما
طريتك والله يا يما وطريت شوفتك
طريت صحيانك البدري ...
تمرقي فجر ... تقادلي المعزة والسخلة
وتحلبي من ضريعاته
وتخلي شوية للسخلان
تسوي الشاي وترجي ابوي
ابوي القومتو فجرية
يشيل الكيس فاضي يردو ملان
رزق الله عليه والبسمة مرضية
تلمينا ونضحك بقلب صافي
نشيل العيشة والكباية
ونسرح في بلاد الله
طريتك والله يا " يما "
وطريت دمعاتك الغالية تكُب جنبي
وانا العيان بفتش لي طريق دربي
مااا جايب خبر أأ " يما "
ومااا داري بتعبك أأ " يما "
طريت , وطريت لحد عيوني بكت
فرح بيك والله " يما "

الف رحمة عليك ...

لها الرحمه والمغفرة ويجعل الفردوس الاعلى نزلها

...
عارف تمام لو كان بإيدك ما كنتي سبتينا بـ قفاك
بعدك صحينا من الحلم أصبحنا زي المن غيبوبتو فاق
ما كنا أطفال يوم رحلتي ولازلنا أطفال في رجاك
فتينا يا السمحة الخصال سبتي القلوب بعدك رُقاق

يا أمي يا ست الحسان أتمني شوفتك في الجنان
ولا تنسي ياطيبة اللسان شهادتك لينا بالبِر هي الأمان
ما إنتي الجنة تحت رجليك وأتمني أبوس كرعيك كمان
بهديك سلام شايلو الحمام و الرد أكيد حبك ضمان

إهداء لروح والدة الأخ سيف الأستاذ ربنا يتغمدها
برحمته ويجعل الجنة مثواها مع النبيين والصديقين
والشهداء والصالحين وحسن أولئك رفيقا
...

الاخ سيف الف رحمة لوالدتك وان يرحم والدتنا
ويسكنهما الجنة مع الصديقين والشهداء وان يجعل قبرهم
روضة من رياض الجنة اميين يا رب العالمين

» شــجــرة الــحــب
» قف تامل,,,,مااجمل هذا الكلام
» دا الكلام يا استاذة نعمات
» الكلام ليكم يالمنططين عينيكم