نكات الرباطاب

الرباطابى المركب بتاعو غرق مش يفتح بلاغ الضابط سألو مركبك غرقت وين قال ليهو فى الظلط

رباطاب قاعدين يحفروا فى مقابر عندهم زول ميت عاوزين يدفنو جاء واحد قال ليهم انشاء الله خير يا جماعه قالو ليه خير بندور نطلعلنا صارقيل

فى حمار متعود يحك راسو جنب فصل فى مدرسه رباطاب الاستاز سألهم الحمار دا دائما يعمل كدا ليه عندو اخو هنا قالو ليهو يا استاز ما يجى الا فى حصتك

الرباطابى قاعد يشرب سجاره فى الغرفه ابوهو دخل عليهو طوالى طفى السجاره برجلو وقفل خشمو ابوهو قال ليهو يا ولد الفى خشمك دا شنو قام قال ليهو والدخان مارق من خشمو : تسالى يا ابوى قال ليهو وقاعد تقلى فوقو

رباطابى نادى بنت صغيره بتبيع بيض قال ليها يابت البيضه بى كم قالت ليهو بخمسميه قال ليها لى شنو أصلو جدادتكم دى بتلد فى الدايات

واحد رباطابي جوهم الجماعة وهم يهللون ابشر ياحاج ولدك الليلة عريس في جنان الخلد وسمعت امه وجات جارية وينو ولدي فقال ليها احدهم ياحاجة ولدك عريس الجنة الليلة ياحاج الحاجة دي بتعمل كدة ليه فما كان منه الا ان قال اديها طلقة عشان تحصل الجرتق

قالوا رباطابي ببيع خرفان .. جاهو واحد إشتره منه خروف .. وبعد مارفع الخروف في العربية .. رجع للرباطابي وقال ليه وين القش بتاع الخروف ..الرباطابي قال ليه أنا بعته ليك مكيف .

قالو واحد سافر لابوحمد واول ما نزل من القطر لقى شافع رباطاب بيببع في ليمون قام قال ليهو يا ولد ليمونك ده فيهو موية قام الشافع رد عليهو بسرعة - نان قالوك ساقنوا بالتيمم

حاجة كبيرة مشت المركز الصحي وقابلت الدكتور والدكتور رباطابي قالت ليه حوّلني المستشفى قال ليها ليه؟؟ قالت ليه عشان هناك بكشفو عليّ بالسماعة قال ليها و الدارعا انا في رقبتي دي باقي لك نبلة؟؟

واحد رباطابى معزوم عشاء مع واحد صاحبو مشى لقى الكهرباء قاطعة قعدو يتونسو مسااااافة الرباطابى جاع جوعه شديدة قال لى صاحبو ياخى الزمن فات وانا جيعان ياخى طلع لينا العشاء دا، صاحبو قال ليه ياخى العشاء ما بطلع الا الكهرباء تجى.... الرباطابى قال لى اصلو دا عشاء ولا شريط فيديو!!

شافعة رباطابية قاعدة تاكل مع أبوها في الصينية ، قالت ليهو: يابا أديني عيشة، أبوها حب يشاغلها، قال ليها بتدوري بيها شنو؟؟ قالت ليهو بدور أرضعها!!!

رباطاب عندهم بنطون عطلان وقاعدين طول النهار بيعافروا عشان يطلعو البنطون من البحرعشان يصلحو.. جا واحد جعلي قال ليهم: انتو البنطون دا مطلعنوا من البحر ليه؟
رد عليه واحد منهم: والله البحر ما نفع معاهو قلنا نجرب الظلط..
--------------------------------------------------------------------

رباطابي عسكري مرور .. بلغوه أنو في باص إنقلب .. مشى مكان الحادث لقى الناس كلها ميتين ماعدا واحد .. قال ليهو : أها يالصـــــندوق الأســـــود .. الحادث حصل كيف ..

رباطابي راكب القطر بتاع الشمالية ...وعشان مافي نور عفص رجل واحد جنوبي ... الجنوبي بي زهج قال ليو : انت عميان ولا شنو تطلع في كراع بتاع الناس انت ما عارف زاتو ماشي وين...الرباطابي رد عليه : انا ماشي عند اهلي انت ماشى وين ..
--------------------------------------------------------------------

رباطابي لابس جزمة قديمة أصابعينو الخمسة مارقين بره. مشى لبتاع ورنيش مد ليهو كراعو.
بتاع الورنيش قال ليهو: أورنش ليك؟ قال ليه : لا لا.. طقطقم لي!!

رباطابي ببيع لبن المهم عندو زبون محامي مرتو غالطت الرباطابي في حق يومين بحجة انو كان في مطرة والرباطابي مصر انو اداهم اللبن في اليوم البعدو جا زوجها المحامي وقال ليهو انحنا ماممكن تغالطنا ابدا الرباطابي قال ليه اغالطك كيف وانت الغلاط فاتح ليه مكتب

رباطابي في عزومة عرس لاحظ انو في زول نائم نومة عميقة جدا ... بس في اللحظة الختو صينية الاكل عمك تترب صحي وابتداء يلقلق ... الرباطابي قال ليهم : انتو زولكم دا كانتو خاتنو في الشاحن ...

شايقية ورباطابية راكبات الحافلة ماشات بكا .. الشايقية طقطقت للكمساري ونزلت، الرباطابية اتأخرت.. الكمساري قال ليها: نازلة؟ قالت ليه : لا.. لا.. بدور اقدمها للباب!!

شايقي جاء لرباطابي قال ليه انا بقيت شاعر وقام قرأ ليه
ما بين الشتاء والفواصل حبك سكن المفاصل الرباطابي قال ليه
انت ما شاعر انت عندك رطوبة امشى اكشف

رباطابي طالع من الحمام يقطر موية وبشكيرو في رقبتو.
ولدو قال ليه: يابة استحميت؟
قالو لا زرتني مطرة في الحمام!!!!

رباطابي بدور يطلع الجنسية:
المتحري: الاسم؟

الرباطابي:حمدنا الله فتح الرحمن الازرق

المتحري: مكان الميلاد؟

الرباطابي: ابوحمد

المتحري: سوداني؟

الرباطابي: لا..اريبا!

المتحري: يازول انت لئيم كدة مالك مابسال فوقك!

الرباطابي: نان اقوللك حمدنا الله فتح الرحمن الازرق... وابوحمد... تقولي سوداني؟
لا...تركي زايغ من جيش اسماعيل باشا.......

المتحري: والله عشاااان لسانك المر دا انا ما بصدقلك الا تجيب شاهد اثبات من العائلة!!

الرباطابي: شاهد اثبات من العائلة؟ يا اخوي هوي انا جنسيتك دي ماني دايرة.
بس عند ليك سؤال واحد بس؟
اتوبونج دا جابليكم منو؟؟

بكري جنجة كتب:: بس عند ليك سؤال واحد بس؟
اتوبونج دا جابليكم منو؟؟

...
هووووووووي يا جنجة ما تتكلم في السياسة
أخير أتولونج ما جاب زول من أهلو وأدوهو الجنسية ومحترم نفسو
من الناس الأدوهم الجنسية وبقو يبنبذو في البلد وما عارف أولادي ما بقدرو يعيشو ويتعلمو فيها

وأنا ماشي كندا وواي واي ما داير معاكم
...