يا غربة .. يا غشاشة .. يا بكاية .. يا مستهبلة‏

يا غربة .. يا غشاشة .. يا بكاية .. يا مستهبلة
تغرينا بي درهم قروش وراه قنطار بهدله
جيناك سنة .. أو قول سنين بنكمله
نبني البيوت في العاصمة

وبي كوم أثاث بنجمله
وكرولا حاره نرسله أصلو التنقل مشكله
ونكمل الدين بي مهل والسمحة جاهزة نحصله
غير القروش اللي الأهل عبر الشهور حا نرسلا
والباقي يدخل في البنوك ونشوف دباره نشغله
ناس فكرت تجني العلم تبدأ الدراسة تواصلا
أحلام كتيره وشيقه وآمال كبيرة نأملا
لكن حساباتنا الغلط في كل عام بنرحله
مرت سنين من العمر بنعزها وبنفضله
والحسبة وصلت طاشرات يمكن نعيش وندبلا
وتعال نحاسبك يا وهم من غير رقم أو أمثله
كان للقروش نجري ونحوش لكن تقول بنشاكلا
ما راضية تقعد في الجيوب وتقول حرامي بينشلا
لكن بترقد في الضهور بديون تقيله متلتلا
ممحوقة ما بتقضي الغرض وأقل حاجة تكملا
كملانه سفرة وحق وزن ومجاملات مستفحله
ضرائب أبعاج المشي وإلزامي حمدي نحولا
وأحلامنا صبحت زي سراب نمشي ونجري ما نحصلا
يا ريت يكون هم القروش يا غربة فيك هو المعضله
لكن تعال شوف الهموم الما إفتكرنا نقابلا
ذلة ومهانة واحتقار خلو النفوس متململة
سجنا كبير فيهو الكفيل سجان قيوده مكبله
أشغالو شاقة ومؤلمه ودايما تكون مستعجله
ما عاد يكفيها النهار تحتاج ليالي مليله
أمراض كتيره بدت معاك عايزه الفحوص مستعجله
ناس الضغط والسكري ومرض القلب مع الكلى
ومصران وقرحة وإكتئاب ونفوسنا ما متحمله
وبنينا فيك كيمان لحم تحت الهدوم متندله
وأكيد يكون أكل المعلب والمجمد عاملا
عدم الرياضة والكونديشن لابد يكون ليهم صــــــلا
وكمان تعال لمعادلة ما قدرنا أصلا نعدلا
سجن العيال جوه الشقق وفراق الأهل والعائله
جيب العيال بي جيبنا مال وجيوبنا غيرو مميله
وصغارنا صبحت بالزهج متوحشة ومتجفله
لا قادرة تلعب في خلا ولا ضل شديره يضللا
لا قادرة تدرس بي نفس من الدروس المترهله
تلقي الولد غالبو الكلام والبت كبيرة ومريله
كل الضغوط سوا ما قدرنا حتى نقللا
في كل طرف تلقي القرف تلقي الخيوط مداخله
يا غربة أديناك كتير أدينا خاطرك يسهلا
خلينا نرجع بالفضل نلحق حياتنا نعدلا
آمالنا فيك بدري إتنست إلاّ الرجول متوحله
وبقينا زي أهل القبور لا البره عارف يدخلا
لا الجوه يرجع لي ورا يحكي الحقيقة يوصلا
لكن خلاص هان الخلاص عندك نزل مهما علا
وإن شاء الله نحيا نودعك وتكوني ذكرى نغازلا
يا غربة .. يا بكاية .. يا غشاشة .. يا مستهبله

مشكور علي الكلام الجيد اخي الكريم

يامرتضى لكن ليت حالتك صعبة شديد ههههههههههههههههه

بشارة عبده كتب:

يامرتضى لكن ليت حالتك صعبة شديد ههههههههههههههههه

يعنى بكاى يابشارة ولاشنو ؟

ياخي دة مش بكاي دة فارش صيوان عديل كدة



لكن بيني وبينك ياحسن انت زاتك فايتوا بالبكاء (ى بس فايتوا بالصبر )هههههههههههههه

بشارة عبده كتب:

ياخي دة مش بكاي دة فارش صيوان عديل كدة



لكن بيني وبينك ياحسن انت زاتك فايتوا بالبكاء (ى بس فايتوا بالصبر )هههههههههههههه

وانت يا بشاره فايتم الاتنين بالبكا وبالصبر صح ولا لا اعترف ولا احولك لاشرف يستجوبك ههههههههههه

تسلم مرتضي وكلام صحيح والله يديك العافية

والله ياعثمان يااخوي الغربة دي لا تبعي لا انا زولة


بس الواحد بقول الحمد لله على كل شئ


وبيني وبينك البكاء حاصل هههههههههههههههههه واشرف ترجمان الله لا يوقع زول في يده



تحياتي لاشرف

الله عليك يا ابو حرم
الكلام وصف حالنا كلنا وربنا يقدرنا علي الغربه لانه ما شايفين لينا اي بصيص امل للرجعه
الله كريم
فتحت لينا جروح بنحاول نتناساها