الدنــيا مالا بقــــت كــدة ؟؟؟

الدنــيا مالا بقــــت كــدة ؟؟؟
وليـــه النفـــوس الكـان سعيــدة .. مُعـــذبة ومتنكــدة؟
وليه الفــرح هجر النفوس .. والناس بقــــت متبـاعدة
مالا القلــوب الكــانت حنيـــنة .. بقــت حُجار متجمدة؟
والقسوة سادت في القلوب .. والرحمـــــة، الكل فــاقدة
مالــو الطُهُــر هجر النفوس .. وأيام صفــــانا مسوِّدَّة؟
ناس بتــاكل في بعــــض .. وســوء الخلق بقى مَحمَدة
ســاد الحَسَــدْ بدل الوِداد .. كاسـِـح وغيـــومـــو ملبِّدَّة
والشر لبس تــوب العفاف .. والخير هدومــــو مقــددة
المادة صِبْحَــتْ هي الهدف .. والنَّـــاس وراها مُشردة
وقلوبنا فارقت اليقيـــن .. صبحت هلوعـــة مرمَّــــــدة
ورد السـلام بقى بامتعــاض .. وكِلْمــة مــودَّة بنشحدا
حتى الكلام بقى ما كـلام .. ألفــاظ دخيــــــــلة نــردده
وصاحبك يضربك بى قفاك .. وإن يلحق الروح يحصـدا
وبقت المصالح هي الأساس .. وصاحــب المنافع سيّدا
دبَّ الشِقـَــاق بيـــن الأهــلْ .. والأنَّـــا أمســــت سائدة
ود أمك يبقالك أخوك .. يا حليــــلا، كم ضــاعت سُدى
والكــان يقابلك بى فــرح .. وأحضانو بى شوق يفردا
ويكســـيك من البسمة نور .. تبهج دواخلك تســـــعدا
بقى بى عجـل يديك قفــاهو .. كـأنوا شــاف شـرَّ العِدا
أما التحية بقت حـروف .. الناس تلــــــوكا تــــــــرددا
إتقـلَّبتْ كـــل الصـــــور .. ويا دى الحقيقــــة مجردة
أختل دا الميزان عديــل .. بس دي الحقيـــقة مؤكـــدة
شباب رفض إرث الجدود ..ومشى فى دروب المفسدة
لا واعز يحكمو لا ضمير .. لا خوف من الموت والردى
لابس مخلقـــن يا لطيــف .. وفوق راسـو لِبْدَّة مجَعَّدة
لا تعرف البـت من وِلــد .. مدلــــول أبــوة مُجـمّــــــدة
القــدوة بوب مارلى القبيح .. وفى شكـلو شـبه القردة
جاكسون كمان ليهــم مثل .. رقصات خليعة مُعربـــدة
كلمة حباب فى خشمــو هااى .. والهااى يمـدها يجـبدا
أما الكلام شوفهو كيف؟ .. تقول لا قاري عربي ولا بدا
يتــلوى زى البــان يميــل .. فـــادع إيدينـــو وفـــاردة
تسريحة كيف، عامل كِريم .. ومرات، ضفايرو فـاردة
وينا الرجــالة الكـان زمـــان .. وينا العقــول الراشدة؟
وين الأسود الـ في الحرب .. لا خافوا من موت لا عدا
وين نجــدة الشـــيخ الكبيــر .. وينــو إحتــرام السيدة؟
وين الوقـار وينـو الفخـار .. شرف القبيلة ومســـندا
وينا المحبــة بدون غرض .. ضاعــت وفقـدنا فوائدا؟
صبحت كما الســلعة بتباع .. والسلعة خسـران عايدا
وينو الأخُــو البسند أخُو .. وخطــــوات طريقو يعبدا؟
ويقسِم معاهو الهم يشيل .. وفي القاسية إيدو يمددا
الكــل يقـول نفســي وكـفى .. ونــار الجحيــم للما عدا
والناس تريد لروحـة بس .. وللشينة شامرة سواعده
دايرين نشــوف وين الخلــل .. وأسبـــاب شقــانا نفندا
ونعرف كمان سبب الحصل .. عشان نفوسنا نساعده
ليه ضــاقت العيشة وبقـــت .. عيشة الدرادر سائدة؟؟
وناس معاشــهم في شـقا .. ودايـماً من الهنا مُبعــــدة
والدنيا ضاقــت بالبشـــر .. واللقمــة دايــرا مجــابدة
واحدين عشــان اللقمة يومي .. رابطين لِجـام مُسـتعبّدة
والحــال بيغنى عن السؤال .. بـان في العيون الشاردة
الراي عشـــان نلقى الحلل .. ونكبح نفوســـنا الماردة
نسيــنا لي رب العبـــاد .. وشطـحــنا جــاوزنـا المدي
وبِِعدنــــا من درب الفــلاح .. لا نكســـب اليوم لا غـدا
وإتـلوثـت نفـس الخلــوق ونِسـَــتْ الشُـكـر والمحمـدة
نســـيان صلاة وترك زكاة .. وأهملنا كـــل الأعمــــدة
في ديارنا عــاث المترفيــن .. وحاصـرنا طُغيان العِدا
صاب الهـــوان كل الديار .. والضُعـف صاب الأفئــدة
صابـنا الوهــن وحتى الجهـــاد سميـنا إرهـــاب قاعدة
صابنا الهــزال والابتذال .. بانت علينـــا شــــــــواهده
يا ربى نســـألك السمــــاح .. والرحمــــة قبال الردى
نطمع كمان نكسـب رضاك .. وتنجينا من دي المفسـدة
أنجيــنا مــن هـــذا الزمــن .. وإيمـانا ما يعلــو الصدا
وقلوبنا طهرا من الضلال .. والجنة روحنا تشــــاهده

شكر وتقدير لك يا رائع

مشاغل الحياة الله المستعان