الشجرة مدينتي التي احبها

الاعزاء اهلي ناس الشجره
ابتداء من اليوم يسرني أن ارفد هذا المنتدي الانيق بالمشاركات التي تمت في سودانيز اون لاين في بوست يحمل نفس الاسم ...ستكون هذه المشاركات بدون اسماء اصحابها في الغالب ولكن بها ذكرياتهم الجميلة مع اخوانهم في مدينتنا
ومن هنا احي الاخوة الذين شاركوا في البوست ونعتذر عن توقفه لظروف خارجه عن الاراده دعونا نبدأ بأول المشاركات وننتظر تعليقاتكم

*الشجرة أو شجرة محو بك
مدينة جافاها الاعلام عنها وهي التي تنبض بالتاريخ والتطور لقرابة المائة عام
منذ قيام الري المصري اتبان الحكم الثنائي وهي المينة التي يقوم فيها الجيل السادس على التوالي في تواصل اجتماعي فريد نفتح الباب على مصراعيه لكل ابناءها ومن قطن فيها ومن مر بها ومن زارهاومن عمل بها سانتظ افادات موثقة عن المدينم ممن هم أولى مني بذلك واعلم ان الاخوان حاكم عبد القادر ومصطفى الغنالي واستاذنا الجليل محمد الله جابو على مقربة من الحقائق والمعلومات اكثر منا انتظرونا
هيانحاول أن نقول شيئا ما عن مدينة نحبها

*الري المصري مؤسسة خدمية متكاملة وكانت مرفاأ صيانة السفن والبواخر
الري المصري كان به مطار مائي
شوارع الاسفلت شهدتها المدينة منذ الستينات
خدمات الكهرباء منذ العشرينات والمياه من اوئل الخمسينات
هل سمعت بحمام البخار والبوستة ومدرسة الشجرة العربية
وإن كانت قرية فنحن نحب أن نعظمها
شكرا يافاضلابي على المرو وصادف ان عمار حسنين صديق وزميل بجامعة الجزيرة

*السلام عليكم ياناس الشجرة يااحن الناس ويااعز الناس سلام من جناين الري لى الحماداب ومن عنبر تلابيب لحي المركز مرورا بسوق علي وميدان السلام وحي الجامع
تقيف فى السوق للمواصلات ماشى المدرسة تقابل هناك اولاد الدفعة محمد عبد الماجد الصادق جلال اشرف صلاح على كوبيل عاصم عبدالرحمن جمال هاشم حسن الزين عصام الدحيش مروان على فتحي والشهيد لؤي على فتحي عصام يسن جلال حامد حاتم عباس الواثق عبد الباسط عبد الغني حسين بكري ادقش زهير نوري
لكم سلامي واشواقي العطرة
منعم سعيد
عبر الايميل
ابو وجيدة /عصام حاكم(كنجو)
الدمام

*نحن شئنا ان نكون العمق في بحر التماسك
مهرجاناً كصلابــــــة اقويا
شيئان بينهم خيار اليوم إمساء واضحــاً
هو ان نكـون كنجـــم في كبد السماء
للشجــــرة المعطــــاة نعطي
من دواخلنـــا نقـــــا

أبيات خرجت في لحظة صدق و نحن في أول عمل لأسرة أبناء الشجرة

الشجرة العزة بأهلهـــا ****** والعزيمـــــة بشـبابهــا

أخي نزار عبد الماجد
تحية و تقدير و احترم لشخصك .... للمبادرة الجميلة
تمضي الأيام و الذكريات باقية أمامنا يوميا و حلم الرجوع و الهجوع لشجرة يشتت أفكارنا كيف ؟ متى ؟ هل هي مرتع الصبا فقط ؟ هل هي مجمع الأصدقاء والأحباب و الأهل فقط؟

لابد من ان نرمي حجر في البحر الراكد بداخلنا لابد أن نحقق بعض ما حلمنا به لابد ان نبادل الوفاء بوفاء اكبر للشجرة الحبيبة كيف ؟ تعبنا، متى ؟لا ادري و الأيام تمر و دوامة الحياة تأخذ ما تأخذ .
نوثق من أين نبدأ من التركية وشجرة (الحراز) التي ربط بها محي بك سفينته قد سقطة وجف عودها و رحل من كان يملكون التاريخ عليهم رحمة الله
وضمتنا مدن الشتات في بلاد الله الواسعة نجتر الذكريات نحاول ان نفعل شي واليد الواحدة ما بصفق وحتى في المنافي نعرف أنفسنا بأننا من أبناء الشجرة وكان لنا حضور مميز في مدينة الدمام باسم الشجرة ولكن دروب الحياة عرتنا من انتماؤنا وأهلنا المحس مسقط رؤوس أبانا كان يتندرون عندما تحاول ان نشاركهم أفراحهم ومناسبتهم ومعي بعض أبناء الشجرة ديل ما أولاد الشجرة بمعني أصبحت الشجرة هي الموطن ونحاول ان نحافظ على هذا النسيج الاجتماعي كيف لا وصديقي الحاج ناصر ترافولتا كان يواصل الليل مع النهار في الغربة لكي يحصل على سكن للأسرة الصغيرة في الشجرة والشجرة فقط لا غيرها ولو كانت باريس على وزن حلفا دقيم ولا باريس لماذا؟ وكذلك ابو نادية عشان يكون قريب من ناس الخشبة (المربع رقم1) السؤال عميق وكبير لان الشجرة هي الشجرة بكل ما تحمل الكلمة الأصلية من معنى تعطي أجمل الثمرة و لو رميتها بحجر وحتى من رحل عنها او درس في مدرسها ونعرفهم صلاتهم الاجتماعية مع ابنا الشجرة قوية وأيام عيد الضحية زارني الأخ الكريم عزالدين شعبان وكان خارج مدينة الدامام وقال لابد ان نحاول تجميع شباب الشجرة في هذه المناسبات وخلق برامج وتواصل أقوى هذه هي الشجرة ما تبقى رقراق تبقى يا ضل يا شموس

فتحنا نافذة ولابد أن تظل خاصة إن النسيج الاجتماعي لمدينة الشجرة بداء في الذوبان وصار كثيرين في شوارع الشجرة لا يعرفون بعضهم البعض أرهقنا التفكير عند محاولة معرفة حتى بعض الأسماء التي تكتب عبر البوست صيحة لكل أبناء الشجرة في كل فج عميق في الداخل و الخارج ندركها قبل أتصبح إطلال وخاصة ان امتداد المساكن في مربعات 9 7 8 و و و و و و و و و صارت الشجرة متاخمة بغيرها من المناطق وأخاف ان تطمس الهويـــة و الطعم الغير وكان من المفترض ان تكون هذه الامتدادات لأبناء الشجرة كفرض طبيعي لتمدد الأسر وكبر حجم أفرادها ولكن فرطنا و أهملنا و الجماعة ما قصروه فعلة ما تريد ان تفعله وأتذكر أيام مايو منح أبناء الحماداب الشريط الممتد جنوبه

نبدأ من عبق التاريخ من (الجذور حي الغفرة) واعني الري المصري
تحية لبيوت الطين الصامدة وتحية للأخ سيف سلوك وهو في بــلاد العم سام و(امب يويو) ( عوض ارباب) وحلبي ود.قاسم والمرابط عبده ابنا الأسد عثمان أرباب عمدة الري رحمة الله عليه، احي تايوتا عوض بدوي، وابو كشر ، بازمبا ابنا بدوي الطاهر رحمة الله عليه التي كانت تصحي الشجرة على أذان الفجر من صوته المميز لتعلن بداية يوم جديد ، وحمو، والعجب, وطروشي ، وابو الكل، واسماعيل قوسو، ابن عثمان الطيب رحمه الله صاحب النيمة المشهورة في شارع النص ، جقود وولي وكيا وابو ريروه، وفقجو والنيمة، والنملة وتيقا ، وعوض سكران، وكجول ومصطفى دركس ابنا العم القتالي محمد الحسن الباقي من عبق التاريخ الساقي للجذور حتى ألحظة متعه الله بالصحة والعافية ونصر الدين حوته أبناء المرحوم حسن حامد رحمة الله علية أمين جمعية الري للمناسبات الخيام و كواريك المقابر والعمل الاجتماعي الجميل في الزمن الجميل ومازال هناك بالداخل من يحمي مثل تلك النشاطات ومنهم عبده عثمان أرباب أتذكر حمام، وتمرين الحجار المولع الذي مازال قائم بنفس الصادق جلال كمبال الرائع و أخوه ياسر و معاوية السمين وعادل البيعو و ابوكش وغيرهم من الشباب الرائعين حتى هذه ألحظة ، ومن الجذور بلبع وابو الروس أولاد النوش ، ويسكل ، ونكروما وسيد سقط ، والشيبون ، وكرموش ،وعلى القلع ،والعجل وتوه وطياطا،وأولاد الجنة رحمة الله عليها وعادل تابوت، علي علوب وكنجو ، والدقل جزولي، وكرجا، اكؤل بدرالدين وعبد المعنم سعيد وبخيت وفريق النجوم وفريق هلا رش ابوصلب وحمش وفريق الأمواج وكاس الكحل وقنيات المقابر كعراضات، دلو، وكمبو وعاطف خضر ابنا النقابي الضليع خضر على ، والثعلب و النركو وعثمان ابودومة دكان الحي الوحيد الذي كان نافذتنا للعالم والجديد ، و ابوشورة وجنائن الري و الشيطنة نمر1 نمر7 أيام ونادي العمال ودي الشيخ ، وأولاد نمر رحمة الله عليه الجقر وسعيد و منى نمر التي تحاول بالداخل ان تجمع أبناء الري في كل مناسبة لها التحية والتقدير ، تلك ليس اسما قطع غيار يابانية أنها ألقاب عزيز على النفس كانت متداولة بكل طيبة و أريحية بشوارع الجذور الغفرة ام جقاجق كما كان يحلو ان يطق عليها معلم الأجيال الأستاذ سيد محمد على و الطيب مكي و والده من الذين ساهمو على توزيع الأرضي في الشجرة رحمة الله عليه مع آخرون ان لم تخنني الذاكرة (ما كبار لكن تاريخ متوارث نعتز به) الف مبروك احمد عقرب بزواجه المبارك و عقبال (بكري ابيض) وله مني التحية وأتمنا ان لا تكون قد خانتي الذاكرة ونسيت احد ولكن شريط الذكريات نستعيده في كل لحظة.
و لي رجعة للنشاط وللأسر في حي لغفره. إما جانب تفتيش الري كمؤسسة كان لها الأثر سوف نفرد لها سرد لحقاً وكذلك حي العنابر والحملة ومدرسة الشجرة العربية والنادي العربي بعد تنقيح المعلومات وإعادة شريط الذكريات الجميلة ان شاء الله .

تاريخ الشجرة بدأ من هناك وانطلاقة الشجرة المدينة القرية سميها ما تريد، كل لوري تراب بنيت به الشجرة اخذ من الري ومعظم الأسر التي أسست الشجرة لها ارتباط بالري الجذور وهو خليط من السودان العملاق المترامي الإطراف والثقافات..... المتسامح.... والمتعايش...... مش سودان الجماعة ديك

و في رمضان ورائحة (ابريه) تعطر الشوارع من أيدي أمهات كان دورهم والكل ينظم مكان الإفطار وحين تخرج الصواني إلي الشارع تضم المسيحي الذي لم يصم يوم وتجده في اليوم التالي صائم ويقضي معك يوم رمضان الحار في بحر الشجرة في العوم والسباحة و منها خرج جمال شروطة ومحمد حسين الغابة و نكروما أبطال للجمهورية و غيرهم من خيرة سباحي السودان و تجده في العيد يفصل جلابية العيد ويحضر صلاة العيد معك( العيد وما أجمله في الشجرة زمان ، المرحوم حاج حاكم منارة من منارة الشجرة وخليفة حسين وحاج حسين رحمة الله عليهم أهـ زمن) يدخل بيوت كل الحلة مهنئاً وبعدها يعرف الإسلام واعتنق بعضهم من دون دعوة ولا ندوة ولا سيف رفع تحياتي إلى جمال وليم الرسام الفنان واور و، تعبان، و سبت وبوي ،و كلمنتي
ونقضي معهم أعياد الكرسمس وشم النسيم في بحر الري والغابة و ما إدراك ما الغابة وهنا صيحة لكل ابنا الشجرة (واخص) أبناء الري( الجذور) و منهم من يساهم في مختلف مجالات الحياة( عوض وداعه المسئول الأول في الدفع المدني على طول البلاد و عرضها و الإخوة في تفتيش الري المصري بان نعيد تلك الغابة سويا ونعيد مشتل الري حتى نحافظ على بيئة الشجرة الصحية بعد المصانع التي قامة في إطرافها والبيئة الاجتماعية في قضا وقت جميل وممتع وسط الخضرة ( ومشكلة دارفور قالو بيئية) وحتى تكون اسم بحق على معناها لذلك لا أستطيع ان اسميها مدينة كذلك لا أستطيع اسميها قرية. فهي خليط والخيط طعمه غير، بالمناسبة، بكينا عديل من مداخلة عباس احمد عبده متعه الله بالصحة والعافية أتذكرة الفنله السوداء ألخناقي التي كنت تحرس بها مرما فريق السلام و نحن صغار وتحية لكل المتواجدين معك بالأمارات
هذه خواطر و المزيد قادم في عن عموم إحياء الشجرة و الحماداب النشاط الثقافي والدورة الرمضانية و النشاط الاجتماعي والرياضي نادي زهرة الربيع والامل والانتصار، و الحرية ومايو ورابطة الشجرة و تحية حارة إلى ود كبيل وتكاسي وأولاد الياس وهم يحمون ملعب الرابطة من التغول ،و كمان تاريخ مفصل أسرة أبناء الشجرة في روابطها الطلابية لخدمة الشجرة فقط مع الأخوان ناصر ترافولتا وهشام عوض و لبة واشرف تيرف و على عبد اللطيف ودركس والبقية الصامتة بداخل الوطن موثق ومصور ومفصل
يا نزار شد حيلك بداية موفقة و متعك الله بالصحة والعافية هكذا نريدها ان يظهر من يحرك الكل من اجل الكل و لك ألف شكر و كنت أشجع من كثيرين التقينا في الإجازة القصيرة التي قضيتها في عيد الفطر السابق في مناسبة بنات أخت العزيز عاصم ساتي و أنت كنت مشغول وأنا كذل في شرط من الذكريات مع د. قاسم أرباب
ولك الود و التحية

الشجرة العزة و العزيمة.......... العزة بأهلها و العزيمة بشبابها

ابو وجيدة /عصام حاكم
كنجو
الدمام

*اسبوع الاتصالات المدهشةوالرائعة
افسدت عليناشرطة المرور للتاكد من الترخيص متعة حديث شهي مع احمد كابتن من الدمام
الذي اسعدني وهو يقول لي بأنهم في بلاد الغربة حينما يسألون يقولون فقط انهم اولاد الشجره بدون أي توصيفات اخرى
وليلا هاتفني الشاب الراقي خالد السنجك من واشنطن وقال بان ابناء الاجيال التي تلينا
متكنكشة لان مايروى لا يخصها(عامل صغير يا سنجك) فقلت له لن كل الاجيال لها ذكرياتهاالخاصة والجذابة.
اطلالة بطعم(الاناقة) من عبد المنعم بخيت
وساترككم مع عصام الكنجو وامسكو الخشب
وموضوع الجقاجق ثبت يا (خال عباس)
افتقد بشده الاخوين معتز درار من الولايات المتحدة وعمر من استرالياوسناء حسنين من كندا ورشا سالم من السعوديةوعادل محمد عبد القيوم وعبد السلام محمداحمد وصلاح وسبه ودبيب وود الزبير .
خلونا مع بعض يادوب الموضوع بدا
ياسر عدوي عمرنا كلو نشكرك وانت يتزايد معدل عطاءك (على العموم شكرا)

*لك التحية نزار على اللفتة الرائعة

فأنا من أبناء الشجرة الوارفة الحنينة ويا حليل زمان

في إنتظار توافد كل من إستظل بها يوما أو مازال

كل الود

صلاح واسبه - محطة المدرسة – الحماداب

*من احياء الخرطوم الجميلة بلا ادنى شك..
غرب الزلط على النيل يقوم حي الري المصري..
بطابعه الانيق واشكال البيوت التي على سقفها قرميد..وحدائق باسوار خشبية..
المدرسة العربية وشكل البنيان والفصول..
وبيوت الري المصري وبيوت جواليص حنينة الشكل واشجار قديمة ضخمة وممرات واسعة الى بواخر وصنادل مهملة ومهمات تخزين على الشاطي..
كنت من المداومين على بريد سكك حديد الشجرة التي كانت تنبض بحياة رواتب المعاشيين.
المسجد العتيق بنمط مساجد زمان الملك فاروق عند الري المصري..
المساحات الواسعة غرب السكة حديد والى ان تصل النيل الابيض تمنح المتجول ابعادا لانهائية لتاريخ جميل نابض بحياة اجتماعية متمازجة بين السودانيين وموظفين الري المصري..
المنجرة القديمة بالسوق القديم جوار مكتب البريد..
البيوت التي تمتد حول المدرسة الابتدائية...اول بيت ناصية من عند المدرسة كنتا بريد لي فيهو بت
لم اعد اذكر لها اسماً,
مرت سنوات وسنوات على تلك الريدة..
بعدها حبيت كثيرن من بنات الشجرة
كانو عل قدر وافر من الجمال والبهجة..
وكنا في المقرن الثانوية نسمي حي الشجرة (الحي الذي لايموت)..
كانت هناك محمد علي مكي الثانوية..
وجكس اللاماب الفخم الفخيم على جكس الشجرة وجكس الكلاكلات والعزوزاب..
آآآآآه يانزار..
ياما صاحبنا وخلطنا ..واتقدمنا وقدمنا..
الاسماء طبعا ماف داعي لذكرها هنا..
يجي ناطي لي واحد هنا يعمل فيها ابو عرام وسيد الرايحة..وانا بصراحة جبان ومازول شديدة..
اذكر وبالم شديد انه تم ختاني في عيادة طبيب الري المصري طرف بحر ابيض..
في منزل مبنى بالطوب الاحمر القديم ويعلوه القرميد وعلى اطرافة اخشاب خضراء ونملي واشجار جهنمية ..
حبيت الشجرة وصرتي ليست بها..
ولكنهم اخذو هناك مُـزعة من لحمي..

*عارف يا دكين المحيرني انو اي مكان انا مشيتو في الدنيا دي انت كنت فيهو واي زول انت بتعرفو انا بعرفو زما اتقابلنا الا فب البورد ....

انا ما بتذكر قدر ده لكن البت الكنت بحبها متذكرها ... وهي زاتها عارفة.

منذ الميلاد وحتي العام 1979 ... والذاكرة سجمانة الا من بعض الاصدقاء والاماكن.

دكان حاجة فتحية (يوم العيد).
قلاب ود الريح.
الاصدقاء .. راشد سالم
جعفر احمد عبدالرحمن.
محمد كمال كمبال.
طارق ...
المدارس ما متذكرها .. اظن الشجرة اتنين ..

زول يذكرني ...
ولا زولة ...

تحياتي لجميع ابناء وبنات الشجرة

*الاخ / نزار تحية مباركة

الشجرة حي جميل وارف مثل سكانه ،،، أنا قريب منه سكنا ( ناس القوز )
كثيرون هم أصحابنا من ناس الشجرة بالذات في مجال كرة القدم ،،عندما كنت العب في روابط القوز كان
المرحوم عثمان طنون دائما متواجد في نادي النيل وبين روابط القوز يتخير اللعيبة لنادي الشجرة
وتمرنا ذات يوم للتسجيل مع نادي الشجرة أنا وزميلي هيثم عبدالعزيز ( عضو البورد ) وكان ابناء النادي وقتها ( هارون وبين ) مسئولين عن المران ولكن اختلفنا في الماديات ،،، وسجلت لجارتكم الرميلة ،،، ومن أعز اصدقاؤنا الصادق لاعب الحماداب وخالد الذي لعب لهلال بورتسودان ،،، والذكريات كبيرة عن الشجرة تحتاج لاجترار وسأدلف بها في هذا البوست في تداخل آخر.

تحياتي وخالص مودتي
ياسر الأمير

*الشجرة وبدايات السرد ايام الزمن الجميل والجميل جدا
من أين أبدا من محطة المركز الصحى ، الي مسجد نور الدائم مرورا بمنازل الري الي مدارس الشجرة العربيه الي نهاية الشجرة ودكان ( دغيمكو ) ثم سوق الشجرة الي الحماداب .... يتبع
=============
دكين لكين ما لقيتك قديم من زمن اخدو مزعة لحمك هناك

-------
علي قول حمزاوي امووووت في الشجرة العربيه

برجع ليكم تاني

اها نحنا اولاد القشلاق ( المدرعات ) وكنا بنطقطق اولاد الحماداب .. وبنمشي الري المصري ونعوم نمشي الجزيرة الصغيرة ونصطاد السمك ونشويه هناك ..
سوق الشجرة .. عباس بتاع الخضار .. سليمان ابو دقن بتاع المكتبة ( كنت بشتري الصحافة والايام بي 5 قروش ) .. عثمان كراسي اللحام .. وطاحونة كورينا .. رابطة الشجرة وفريق الهدف والكوتش كنج .. وصدقي بتاع الباسطة وبمناسبة صدقي دي ( كنا بنجي من القشلاق ونقيف وراء صدقي ولما يخت الصينية الفاضية بكون فيها عسل وطبعا نحنا كل زول جايب ليهو سير بلاستيك بتاع الكراسي داك .. وختت الصينية كل زول يدخل سيرو وهاك يا شفط ) ..
وبعد المدرعات المختلطة مشينا للشجرة المتوسطة وعرفنا ناس الشجرة .. نزار ونزار ونزار وحمزة ووليد طه وعمر الشيخ وفيصل محمد طه ومحمد سمنة وجون كلمنتي والناية

والله يا نستا ان طبعا ما عرفتك منو لكن مدرسة الشجرة المتوسط فيه كميه من النزارات في الدفعه القدامناكان في نزار بشير ونزار محمد سعيد وكان في دفعتنا نزار عبد الباقي ونزار عبد الحفيظ (كان صاحبي زمان قبل ما يبقى كوز وهو ماشي معانا لغاية حكاية الطعنه بتاعت الخنجر في الحرطوم)،وما انسي اطيب نزار في النزارات (نزار بري)
وخلوني اتكلم عن اولاد دفعتي شويه الصديق العزيز هشام كندي واخووويييي عديييل كده شادي زكريا ولن ننسي اصحابنا اولاد الاشلاق خالد محمد ابراهيم وسيف الدين الشايقي وقذافي عبد الله وعادل طيفور وعلي حميدان ووليم ايول وعبد الرحمن عيسى والفاضل حران وصابر وكميات من الناس ةطبعا المرحوم حبيب الناس كلها حاتم الامين حاج الفضل والشهيد امعتزابراهيم المهم الباقي جايين
الله يطول في ايامنا

*ياسلااام ... الشجره ... المدينه

حي البير, الحي العتيق

حي دالاس

المركز الصحي..

فول محمد زين

بحر الشجره

دكتور بقطر

الري المصري وبيوت الري المصري

جامع الري

مدرسة الشجرة العربيه

محطة بنزين شل

محطة السوق

سوق الشجره

زلط النص

نادي الشجره

تمرين العجايز

جامع نورالدايم

العنابر

السكه حديد

بقالة الترحاب

باسطة صدقي, رحمة الله عليه

قشلاق المدرعات

مكتبة سليمان

طاحونة كورينا

أولاد ملاح

عيادة دكتور فؤاد

الفرن الآلي

ماوراء السكه حديد

:::::::::::::::::::::::::::::::::::::

*نزار عبدالماجد, بالله امانه توصل سلامي وتحياتي لأخوك عديل كده (شادي زكريا), قول ليهو عمرو قال ليك مشتاقين

:::::::::::::::::::::::::::::::::::

*خاص

انتهز الفرصه للترحم على روح المرحوم الحاج ابراهيم زبير والمرحومه الحاجه مسكه, طيب الله ثراهما واسكنهم فسيح جناته, فلهم كامل الشكر والتقدير والعرفان. والتحيه لاسرتهما الكريمه

نزار أعود بالتحية ليك ولكل من ينتمي لشجرتنا الوارفة

والسلام موصول وشامل وكامل لدكين الذي الذي لم يتمالك نفسه

حيث أمطرنا بوابل من الذكريات التي والله أعلم قد تجيب سيد الرايحة على قوله .

ذكر أحد المتداخلين إسم أخي وإبن خالتي المرحوم عثمان طنون

والذي تزين صورته بروفايلي وحبذا لو اتصل بي الزميل عبرالداخلي

وأيضا يانزار ذكرت عادل طيفور من المدرعات هل إسمه الكامل

عادل عثمان طيفور لأن لي أصدقاء لم أرهم منذ سنين ومن قشلاق

المدرعات هم أمير وعزالدين عثمان طيفور وانشاءالله تبشرني

لك التحية ولضيوفك .

*سلام أهل الشجرة

أنا من مواليد الشجرة (الحماداب) شارع طاحونة الملح سابقا ولكن للأسف لم أتلقى أي من المراحل التعليمية بها حيث غادرناها وأنا في سن مبكرة لنسكن في امتداد الدرجة الثالثة ولكن بحمد الله ما زال منزل العائلة الكبير مفتوحا في الشجرة.
وقد كان خالي صاحب أول مطبعة في الشجرة (مطبعة الشجرة جوار طلمبة شل) أيام كانت المطابع تقليدية تعتمد على العمل اليدوي في رص الحروف وكنا نسعد كثيرا بمساعدته في العمل عند زياراتنا المتكررة ومكوثنا أثناء الأجازات بمنزل العائلة. وأذكر في أحدى الزيارت أن تم ختني في حي الشجرة مع أبناء خالتي على يد المرحوم المساعد الطبي "علي العوض"
وما زلت استمتع كثيرا بزيارة الشجرة كلما عدت إلى السودان أثناء الأجازات (ما سرتي مدفونه هناك كما يقول المثل الشهير)

*الاخ صديق حمدتو
في حديثك عن المطبعه
والعم عبدالله والخاله
العم عبدالله في مسابة الوالد
وعلي العلم العم عبدالله والخاله
من ماسسي الشجره

يديك العافيه

ياسر عدوي

*الشجرة
الري المصري ,,,,,,,,,,
كلما يذكروا الشجرة تمر بي ذكرى اليمه واحده وموقف طريف واحد وذكريات جميلة لا تحصى.

في عام 1980م ميلادية فقدت صديقي طارق عوض الكريم غرقا في الري المصري ثاني ايام عيد الفطر , وكانت بالنسبة لي صدمة مؤلمة ان افقد صديقا وان اتقابل مع الموت وجها لوجه,,
رحم الله طارق عوض الكريم ,,بطل الفروسية والجوكي الشهير ,, وفي هذه الحادثة تعرفت على السابحة حمام ,, وبقيت الشجره والم هذه الذكرى,
موقف طريف
استاجرنا بيتا في بداية التسعينات (اول بيت في مدخل مدينة الشجرة) كمقر لجمعية الرسالة والتضامن وحسينية لذكرى ال البيت عليهم السلام, وكنا به فرحين لان قيمة الايجار لم تكن تقارن بفخامة البيت, ولكن لفت نظرنا ان الجيران واهل الشجرة عموما كانوا ينظرون الينا بتفحص واستعجاب وخاصة الجيران وبنات المدارس القريبة وهم يمرون من ذلك المكان لما كان الواحد بتعقد ويجري علي المراية ويشوف الغلط فيه , في يوم انا واقف في الباب مرة امراة ومعها بنت كبيره واحده صغيره وكانوا ينظرون الي والدهشة تملئ وجوهم فتجراة وسلمت عليهم ولاحظت البنت الصغيرة خافت وتاهبت للجري فازدادت حيرتي اكثر عندما عاجلتني المرأة بسؤال انتو انس ولا جن , فقلت ليها فيني حاجه غلط , فارفتني بسؤال آخر انت ساكنين في البيت دي وبتنوم فيه قلت ليها آي ساكنين وبنوم فيه. ابدت علامة استعجاب وانصرفت, دخلت وحكيت للشباب الموقف ده حكوا لي انهم مروا بتجارب مشابه واحد قال ان بنت الجيران جاءت شايلة حاجه تقيله مشيت اساعده رمت وقامت جرى. مشيت وصلت الحاجة البيت وجدتهم مستغربين,
وظل امر البيت بالنسبة لنا لغزا محير الي ان تحدثنا في يوم الي صديقنا راشد شنان من اولاد الحماداب , بعد ان وصفنا له البيت فانفقع من الضحك , وقال لينا ادق فيكم خازوق عجب لان البيت ده مسكون بالجن وجابو في جريدة الشرق الاوسط ومن زمان ما في واحد بقرب عليهو,, وحكى لينا عن غرائب تحدث فيه, فقلنا لي جن ولا شيطان , واسمرينا في البت لمدة ثلاث سنين فيه خبرنا اهل الشجرة ومعشرهم الطيب وكيف كان الجيران يساعدونا في توفير الغداء وفطور رمضان فلهم التحية

وساعود لا حقا

*فووووووق يابشمهندس

وتحياتي لاهل الحظيره ومربوطة القطر

*طبعا ياجمال سالم تكون استغربت لانو انا اتعاملت معاك على انك جمال مصطفى سالم
والله يابو الجيم ناس الشجره محتفين عديل كده دايرين يحرجونا قدام العالمين
والله مربوطة القطر دي نحنا نكوس ليها كواسه لانو لسه ناس ابكشر ووليد حاكم متدهورين خالص وغايتو الشفيع سالم خميس سيكو ما جا اما انت فنفدت منها
ما تطول الغيبه يا ابو الجيم

*لا أعرف كيف لم ارى هذا البوست الجميل برغم مروري على المنتدى يوميا!!!
اظن ناس بيت عمار الفي اول الشجرة ديل تدخلوا لحجب البوست عني

شكرا جميلا يا نزار عبدالماجد بقدر جمال بوستك .

الشجرة مسقط رأسي... أحبها فهي وجداني ودوحتي الوارفة التى تفيض جمالاً
على كل قاطنيها وزائريها.

زكريات لا تحدها حدود.. فهى كل الذاكرة.. وكل الجمال..
يا دكين غايتو شيل شيلتك ابوعرام قال جايي واحسن ليك تجي البورد بي
عكازك

المسابقات الثقافية بين الاحياء داخل الشجرة التي كانت تنظمها رابطة ابناء
الشجرة بجامعة القاهرة الفرع، والمواهب المتفردة التي كانت تبرز فيها كل مرة
بشتى ضروب الثقافة، ما اجملها تلك الايام.

الشجرة جنوب..
مصايد الاسماك..
حي النادي..
الري المصري..
العنابر..
حي البير..
حي السوق..
حي الجامع..
دلاس..
الحماداب والنحاس وانديته الرياضية المميزة..

تحية وسلام للشجرة واهلها الطيبين.

*والله كل يوم احس بالفحر من هذا البوست
شكرا يا احمد واتمني ان نفتح الدورة الثقافية الرياضية التي كان يقيمها ابناء الشجره بجامعة القاهرة فرع الخرطوم
معاويه السمين
وليد حاكم وكل الناس الفي اللجان المعده والمنفذه
اذكر جيد اننا في حي الحماداب وسط فزنا على حي النادي أو الشجره جنوب في النهائي
اذكر موسي امريكي
والكورال الرائع للحي ..ادينا ياولد..وامنا الطيبه ياصادقة المعنى ياسمحة الهيبه
اذكر الممثل الرائع موسى الصادق(امريكي)
الاجتماعات لناس المسرح في بيت ناس حسام عمر وسمؤل سيد
كجو
حسن فاروق
حماده سيد
واذكر ناس ناصر ترافولتا
عصمت عموش
الصادق جلال
ناصر
فائز العب
والله في الحقيقة لان الحدث كان يهم الشجره عموم وعلى مستوى الاسر فتقريبا كل الناس شاركت
وفي ناس كتار ليهم الفضل بس الفتره طالت وانا متاكد انه هناك من هو حير مني ليوثق هذه الاحداث

اذكر فوز شقيقتي عزه(كانت في العاشرة من عمرها)في مسابقة الالقاء الشعري بقصيدة الفتها لها
كانت تقول
هوي يا ناس سلام جاكم
واوعوا تفرطوا فيه كتير
ليه يا احمد وليه ياشول
ليه بنحلي ارضنا تبور
تمن رصاصه بتزرع ارضك
وبرضو نبيعا ناكل زول
تعالوا الليله وشوفوا سلامنا
احمد وشول في سرور وحبور
كان هذا الكلام عام 89 وكنت قد الفت هذه القصيدة عام 88 (انا طبعا ما مولفاتي لكن هذه ذكرياتي فاعذروني)
المهم

*رغم تجاهل صاحب البوست لمشاركتي تاني راجعت وفاءًً لذكرى اصدقاء هنالك صحبتهم طفلا وشابا وكهلا,,,,,,,,,,
دفعتي في مدرسة عبدالمنعم الثانوية العامه

القرشي عبداللطيف ,, وكنانطلق عليه اسم المبروك لقيامه بدور المبروك في فيلم عرس الزين
غازي محمد احمد الطيب / كان الالفه من اولاد الحماداب
اسامه ابو شوك الري المصري
ياسر النجومي الري المصري
عثمان قرمة هداف فريق المدرسة
محمد عبداللطيف الفكي واخيه لا اذكر اسمه وكانا حريفين في كرة القدم
جمال منقستو
عاطف ود بري
وساتي لمن التقيتهم الجامعة (الفرع)

رغم تجهلي انا ايضا من صاحب البوست اشارك للمرة الثانية
من اجل شجرتنا الحبيبة الظهر اننا ماعرفين بعض ولكن وردت
بعض الاسماء هنا احييهم جميعا ومن الشلة
عادل بطارية
ساتي
بشير اسماعيل
جمال منقستو
عصام عثمان عبد الحفيظ
قرد
صلاح كوته
ابوعكر... ابن خالي
المرحوم عوض الكريم
عبده واحمد ويحي درار
اولاد الغتالي
عزالدين شعبان
تركمان
عبودي
مصطفى
فيصل جمعة
حسن وحسين
مبارك كباية
مبارك الماحي
مبارك حلة الغفرة
والبقية تاتي
[right]

تسلم اخى نزار نحن بانتظار مواضيعك الشيقه

اخي نزار كيفك يا زول ووين انت برة السودان ولا شنو طولنا منك؟

الشجرة مدينتي التي احبها حقيقة انا كنت من متصفحي البوست وحاولت الاشتراك ولكن فشلت وانت شاهد علي ذلك ولكن بسأل وين كل الاعضاء لماذا لا يشاركون معنا في هذا المنتدي ؟؟؟؟؟؟؟؟؟؟؟؟؟؟؟؟

مرحبا بالعوده الحميده منور

إن هندسة الحياة أن تبني جسرا من التواصل فوق بحيرة من النسيان هنالك نشأنا وترعرعنا وعرفنا أن تلك الحياة التي عشناها لايمكن نسيانها[center][b]

تذكرتك والامطار تهضل تقبل خدود الأرض وتغسل ارصفة الطرقات تداعب رموش النخيل وتراقص أطفال الحارات أشتقت اليكي وهذتني اللهفه لروياكي من الاعماق ياأجمل مدن الأرض وعروس النيل الأبيض الشجره

ربنا يديك العافية يا نزار يا رائع .

للامانة والتاريخ هذا المنتدي هو ثمرة هذا البوست العملاق الحميم (الشجرة مدينتي التي احبها) .. فالتحية لاخونا نزار وهو يفرخ الافكار التي تلون اسم الشجرة وتدعم اهلنا واحبائنا ...
عامل صلعتك الكبير دي ...

وينك يا اسامة كربة ...مشتاقين كتير ...ورينا اخبارك ..ما عارفين اى حاجة عنك ؟؟؟

العزيز دوما نزار عبد الماجــد
بالجد رجعتنا للأيام الحلوة أيام البوست منبع هذا الموقع الرائع
بالجد البوست كان حاجة جميلة شديد و ما بعرف قيمته الا من شارك فية منذ البداية
كانت ايام حلوة جد يا نزار و الحمد لله اعت لينا جمال هذه الأيام
تحياتى للغالى دوما ياسر عدوى

و ما بعرف قيمته الا من شارك فية منذ البداية

اولا لك التحية اخي نزار
ومداخلة بسيطة لاخونا العثماني نحن دخلنا المنتدي متأخرين شوية لكن والله العظيم نعرف قيمته جيدا ونحترم ونقدر كل عضو قديم وجديد فيه ونحن لم نشارك منذ البداية وهذا لا يعني اننا لا نعرف قيمته با العكس نحن نزداد تقربا لكل ما فيه وبكل ما نملك واسف اخي العثماني ارجو ان تقبل مداخلتي والتي ان دلت انما تدل علي حبنا للشجرة ومن فيها وانت اولهم

الغروب يسالني عنك أمسياتنا في شوق اليك الرمال الناعمه مشتاقه لي مشيك دي الطيور الراحله في ظل المساء بتسال عليك كيف تفارق الطفه والنيل هان عليك والله مشتاقين ياجمال عزالدين وياكمال بابكر وياسفيان عبدالعزير ويامتوكل عبدالرحمن وياعاصم ساتي وياشباب الري المصري كلكم ياأصدقاء الطفوله والدراسه والزكريات الحلوه الجميله

هل تعرفين من انت؟

انت لغتي التي اتحدث بها،،قلمي الذي اكتب به،،روحي التي اعيش بها انت بطلة
رواياتي عنوان قصائدي حلم عمري الذي انتظره واترقب تحقيقه بفارغ الصبر
لك يعجز القلم عن التعبير ويتوقف اللسان عن الوصف
لان مااشعر به نحوك اكبر من ان يحتويه قلم كاتب واعظم من ان يتحدث عنه لسان محب
فما اروعك ومااروع ذلك القلب الذي يحتضن حبك انه في غاية السعادة
واية سعادةالمقصود الشجرة يابشارة

تسلم الأخ نزار علي الكلام الجميل والسرد الجمل نتمني ان تواصل ولاتتوقف لاننا في اشد الحاجة الي هذه المعلومات القيمة عن تاريخ الشجرة والحمادلب فلك التحية

تحياتي واشواقي نزار
جهدجهيد مشكور عليهو. وما توقف

وااااااااااااصل يا نيزو واتحفنا بروائعك الجمييييييييييييييييييييييييييييييييييييييييييييييييلة