حصـــــــــــاد الغربـــــــــــــــة

حصاد الغربة,حقائب مليانة , خروج وعودة,برا وبحرا , وكل بمعاناته ,غربة طويلة ممتدة,الخالات والعمات , المات مات والباقي باقي ,لا ليك راْي لا ارض لا حزب عندك حزب واحد اْسمه (حول) اتصالات , حوالات,طقم عشاء ودهب كضب ,قراية العيال والجامعات مرة كوته ومرة نسب, البنات المنتظرات العرس , والحكومات وعدم الاعتراف بنضال المغتربين, وآخر المطاف كبر وكرمشة وموت ودفن هنا اْو في طرد متجه غربا(والله المستعان).


]كل هذا تجدونه في حصاد الغربة [
,,,,,,,,,,,,,,,,,,,,,,,,,,,,,,,

اْمرك عجيب يا مغترب
شايل حقايبك ماشي وين ؟؟؟
ما الغربة طالت يامسيكين
وانت في نص الدرب
والناس هناك ماشايلة هم
لاهم حكومة ولا لحم
سكت ليه يامغترب؟؟؟
حاول اْجب؟؟
الناس وراك دفنت اْلوف
وانت جالس تنتحب
الناس هناك هزمت
طوابير الصفوف
وازدادو نجمات في الكتوف
وانت جالس زي خروف
لا فيك لبن لافيك صوف
شعار جميل مكتوب حروف
زول مغترب
انت يا اْبوي مين اللي زيك
انت مازول مغترب
لا ليك اْرض
لا ليك راْي
لا خطة اسكان لا حزب
انت عندك حزب واحد
اسمه حوّل
اْخوك وراك راقد تعب
جاك اتصال من ناس منال
يا اْخوي حول وماتطول
جدي الخضر عضو الكلب
يا اْخوي حول
في الشهر مرتين
ود اللمين جاهو المقص
في الكليتين
خلآهو زي زول الكٍتب
يا اْخوي حول وما تطول
وجيب معاك طقم العشاء
ودهب الكضب
وانت جالس يامسيكين
الغربة طالت
وانت في نص الدرب
مرت سنين فوق السنين
لا اشتريت قطعة اْرض
ولا سقفت الغرفتين
والحالة طين
يا اْخوي صلي ركعتين
بعد الفرض
يا اْخوي حول جيب قروش
وخاتم الجنيه للسيدتين
اْم العريس واْم العروس
ولا تقول فلنفترض
اْضرب خماسيك في سداسيك
واْضرب الطول في العرض
الغربة طالت
والعيال كبرت وجالت
وانت حالك يامسيكين
والله تغني عن سوْالك
والفكر مشغول
وشايل هم عيالك وين بتقراْ
والغريب كل الحكومات
في البلد تنكر نضالك
وحتي العيال في الجامعات
يامسيكين
بدل الجنيه تدفع ريالك
ومهما تكتب اْو تقول
هذا اختيارك
لا ليك راْي ولا هناك
من يرد ليك اعتبارك
شد حيلك واشتغل
عشرين شغل خارج مجالك
شد حيلك والثغور راجاك كتيرة
ست البنات صارت مديرة
ولسه ما جاها العريس
والبيت ملان
ناس محاسن وناس سميرة
يابا ماتخليك معصلج
وانت ماتخليك عويرة
وما مهم ود اللعم
ومامهم من القبيلة
المهم اْبقي راجل
وما اْكون زولا خميلة
اْلم اْقل اْمرك عجيب يامغترب ؟؟
جيت شباب تلبس خفيف
حتي في عز البرد
بعد السنين الجلود اتكرمشت
واْصبحت ودعم القرد
وآخر المطاف السنين
صارت عجاف
شالوك مقفل في طرد
وآخر المطاف السنين
صارت عجاف
شالوك مقفل في طرد.

اخي بشاره اسال الله ان يرد غربة الجميع سالمين غانمين ولكن ابشرك اخي والبشاره تجوزبالخير والشر ان الحال في السودان اصبح كالحال في الغربه وكان ما مصدقني اسال الثعلب ولوما عايز ترجع خالص اسال اشرف تيرف

شكرا يا رائع على المرور

ان شـــاء اللــه ربـــنا يــرد غـــربتــــكم جمــــيعا وتــــجوا ســـالمين ...وغــــانمـــين ... وفـــــرحانـــين ..
وتـــحقـــقوا امـــانيــــكم .

الي كل الاخوة المغتربين واخص اخي بشارة

حقيقة الغربة لا تطاق ومن ترك دارو فقد مقدارو وانا من المكويين بنار الغربة لمدة ثلاثة سنوات فقط وبعدها قررت في لحظة ترك الغربة وطلبت من كفيلي خروج نهائي وزهل مني وطلب مني توصيح اسباب تركي العمل وهل اريد زيادة في الراتب قلت له لا والله بس انا قررت الرجوع الي وطني واهلي فبارك لي وتمت بحمد الله
وانا اقول رايئ في السودان مثل رأي الاخ الصادق الامين عثمان بشير


اخي بشاره اسال الله ان يرد غربة الجميع سالمين غانمين ولكن ابشرك اخي والبشاره تجوزبالخير والشر ان الحال في السودان اصبح كالحال في الغربه وكان ما مصدقني اسال الثعلب ولوما عايز ترجع خالص اسال اشرف تيرف