كان داير مديرك يرضى عنك

زائر

كان داير مديرك يرضى عنك تخدموا فوق الراس والعين

وخزينتك فى شمالك قاعدة وتسمع ربنا يزيدك آمين

نبحبح زين مع الاحباب ونتبوبر جد ذى السمحين

وأنا الفى الشغل قلت الروب أبيت فلسان وبين طفلين

ياستار من كثرة خداع الله يهدى الضالين

ياستار من قلم ظالم يكتب يوقف الصارفين

ياستار من السيف المسلول يسطو على الكادحين

ياستار من إدارة وكيف شايلة الوزر يوم الدين

ياستار على تعليم ضاع الفاقد التربوى شين

ياستار على الصحة أصبحت مصحة تعوس عجين

ياستار على التاجر جزار القرن العشرين

ياسلام على الربا المقنن شرع الله الحنين

ياسلام على البشتنة والفلس والدين فى الدكاكين

أمة يا ناس ناس ما لاقيه حق الشاى وناس عندها حق التين

أمة ياناس فقراء ومساكين وناس فوق القروش راكعين

ناس من زين بالملايين متحدثين وعن الشيكات والمستثمرين

وناس من سودانى عن لقمة العيش وفاتورة المويه مسمكرين

ودى الشبكة والكل بيدعو عليها الدعوة تنزل متين

ألف سلامة عليك يامديرنا الله يشفيك تسلم ديمة تبقه حنين

أخيرا أقول ليك أهم كلام قبل ما تجف دموع العين

وقبال ما تخصم منى وقبال العتاب ما يحين

تقيف وتعود للشورى ويبقى زواو إداريين

ما تستغل سلطتك وجاهك وسطوتك على المساكين

الدعوات تلحقك وتلحقك وتلبسك ثوب الميتين

» اعلان ظريف داير اجمل تعليق
» نحن قوم ليس يرضى همهم أن ينالوا في العلا أسهلها