طـــعم الــدروس

طعم الدروس

ورينى شن طعم الدروس مادام بكانا مشى قطر
وكيف ذاتا ترتاح النفوس تقبل قرايتاً فى سفر
يايمه حان الإمتحان من وقتو بس فاضل شهر
ما اظنى من جور الزمان انجح واجيب ليكم نمر
كيف ذاتى يا نبع الحنان انجح من آلام السهر
عمرك سمعتيلك جبان خاض المعارك وانتصر
زينوبة كل ما افتح كتاب القاك فى أول سطر
القى الجداول والصحاب القى الجناين والتمر
فى الحصة عقلى أنا قام سدر يمه المدرس لو فكر
كان بلقى قاعد فوق ككر فى الدونكي لسع ما فطر
يسمع كليمة يا عشاي وأغلى الحكم عند الضجر
أنا قلبى كلو عليك جناى وقلب جناى على حجر
والله موش لو كان نهر لو كالنى بسيطان بقر
مادام عقيل الجن سدر ما اظنو من عندك حضر
بذاتو ابوى تلقاهو قام فاتح كتابو مع الفجر
يقرأ ويرتل فى كلام ما بفهمو الناس الكفر
زينوبة كر من حالى كر قاعد لى فوق نيران جمر
غربة وكمان حالاً فقر عذبنى قبل أصل القبر
الشوق متل شوك الكتر طعن الجسم لمن خدر
والله لو ما بنقبل ما كان بفارقك بى شبر
زينوبة دنيا الإغتراب خلتنى زي ورق الشدر
اتحت من عدم الشراب عم الأراضى وانتشر
الغربة اصلو طعيمها مر لكنى بقعد بالجبر
لمن سنين الهم تمر يا ربى الهمنى الصبر

ربنا يلهمنا كلنا الصبر ويغير لينا سنين الهم وإنشاء الله بكره حيكون أحسن وتشكرعلي الإبداع المتواصل يا أبو السيد

عثمان بشير كتب:: ربنا يلهمنا كلنا الصبر ويغير لينا سنين الهم وإنشاء الله بكره حيكون أحسن وتشكرعلي الإبداع المتواصل يا أبو السيد

أخي الفاضل عثمان بشير

بزيارتك البوست نور .. وشكراً جزيل على مرورك الكريم

فما أصعب الغربة وما أقساها علينا .. والتي مهما كتبنا وقلنا فيها فلن نستطيع أن نطفئ تلك النيران الملتهبة بسببها

لك كل الود

مبدعنا ابوسيــد ....رائع جدا ... طبعا انا اتخيلتك بتلقى فى القصيدة وانا كنت بستمع
وان شاء الله ترجعوا لينا سالمين ....وتامّين ....ولامّين ....وظافرين .... وفرحانين .

مجدى ابوعبدة كتب:: مبدعنا ابوسيــد ....رائع جدا ... طبعا انا اتخيلتك بتلقى فى القصيدة وانا كنت بستمع
وان شاء الله ترجعوا لينا سالمين ....وتامّين ....ولامّين ....وظافرين .... وفرحانين .

حبيبنا أبو عبده.. وأنا كمان اتخيلتك وانت بتسمع في القصيدة..
وذي ما قلته ربنا يرد غربتنا ويقرب البعيد بإذنه تعالى

لكل كل الود