شاعر من شبا.......عثمان أبوبكر

عثمان ابوبكر....شاعر ولد بقرية شبا مركز مروي(1944م)...تلقي تعليمة الابتدائي والمتوسط بمروي.....تلقي تعليمه الثانوي في مدينة بورتسودان.....ثم تخرج من كلية الصحة جامعة الخرطوم (1964)...حصل علي دبلوم مفتش الصحة من جمعية الصحة الملكية بلندن.....تنقل بين ربوع السودان من الشمال الي الجنوب وذلك تأدية لواجبه الوطني والعملي وامتد الي خارج السودان...كانت بدايته الشعرية في مرحلة مبكره من عمره , فقد كانت روحه مشبعه بحب الوطن وقد عالج شعره مختلف القضايا..... وله كثير من الاسهامات الادبيه النثرية والشعرية...وقد اعطي لوطنه الكثير من غير تقصير الي ان وافته المنية( 1991) تاركا درره الشعرية التي لم تري النور.

وسوف اعرض لكم ديوانه((بطاقة دعوة للحب والسلام)) و((غنيوة ريدة للبركل)) واليكم القصيدة وارجوا ان تنال اعجابكم.




تقولي شنو وتقولي منو

ردا علي قصيدة الشاعر الحردلو

ونحن كمان))

تقولي شنو
تقولي منو
نحن الساس
ونحن الرأس
ونحن برانا دون الناس
ونحن الهم
ونحن الغم
وتال الخال .
وتال العم
خالي وعمي ود حبوبه
سيد السبحة والمصلاية واللالوبة
سيد الحربة
راجل الضربة
يوم الحوبة
ويوم الزنقة
وقت الشنقه
قام زي الأسد للموت
وقصتو في الكتب مكتوبة
تقولي شنو
ونحن عدال
ونحن تقال
ونحن جبال
ونحن ولاد عزاز واصال
ونحن الفال
وسد المال
ونحن القبلة للضيفان
ونحن الواحة للضهبان
ونحن المرقة للجيران
ونحن الحلقة والليحان
ونحن رواية الحيران
ونحن الليلة
نحن البكرة
نحن الكان
ونحن كمان
صلاة الجمعة والاذان
ونحن الطاب
ونحن شليل
ونحن النبلة والنشاب
ونحن العرسة نحن السيجة
نحن الميس
ونحن السوط ونحن بطان
تقولي شنو وتقولي منو
ونحن الويل
ونحن الهيل
ونحن الخيل
ونحن بنكسر الكليقة لي زاملة ضيوف الليل
ونحن الاتبراوي يسيل
يجيب ويشيل
ونحن النور
واصلنا من زمان محضور
وذكرنا في الكتب مزكور
ونحن بنونة والكنداكة
نحن القرشي جاد بالدم قريب يوم داكا
ومننا ديك
ومننا ديل
وحت كسار قلم مكميل
تقول لي شنو
وتقول لي منو
ونحن ملكوك
ونحن مكوك
ونحن الجعلي والكباشي
والفكي شيخ
وود تكتوك
ونحن الكية
نحن الحية
نحن صهيب وجد المية
ونحن يمين ابو بشرية
ونحن ضريح
ونحن مزار
ونحن بيان
ونحن بنية
ونحن ولاد رجال لاحقين
ونحن نسل كبار صالحين
يقيمو الدين
وينجدو في الخلا المدروك
ونحن وقت رجالنا يجوك
بيملو العين
يفوتو الوين
ووين الوين
قيام وسجود
فعال وسلوك
ونحن كلام كبارنا عديل
ونحن نضم صغارنا عديل
ونحن الشول وشوك الحوت وخشم الموس وست الجيل
ونحن الدور ودابي الكر ونقع السم وساري الليل
تقول لي شنو
تقول لي منو
ونحن حريرة
نحن ضريرة
نحن جبيرة
نحن دخيرة
نحن دميرة
نحن جزيرة
نحن الساقية والسلوكة
ونحن الدرقة
نحن الطرقة
نحن المرقة
نحن الصدقة
نحن الترمة والقاورمة
نحن الكسرة والمفروكه
نحن الطاره والنقارة والدلوكة
ونحن القاع
ونحن الصاع
وراهو الصاع
ونحن الموية والشربوقة والنقاع
ونحن الترة والقطاع
ونحن ولادنا ركازات
ونحن بناتنا احلي بنات
ونحن اللقمة فكة ريق
ونحن يمين عشا البايتات
ونحن البكري
نحن الدغري
نحن الدخري في الحوبات
ونحن كرمنا ماهو كرم تقا وبوبار
ونحن ا ن جانا ضيف الليل بيلقي أيدينا ممدودات
ويلقي خيولنا مشدودات
ويلقي قلوبنا مفتوحات
ويلقي الصالة معروشة
ويلقي الاوضه مفروشة
ويلقي الكسرة مرشوشه
ويلقي وشوشنا زين باشات
ويلقي نفوسنا زي ماهن تملي علي الدوام سمحات
تقول لي شنو
تقول لي منو
ونحن نفير
ونحن جفير
ونحن حفير
ونحن الزير ونحن الكير
ونحن النقعة
نحن البقعة
نحن البار ونحن البور ونحن البير
ونحن دلو
ونحن القربة للعطشان
ونحن سقو
ونحن رحاطة للعرسان
ونحن حتو
ونحن الحق
ونحن الرق
ونحن الصف
ونحن الكف
ونحن هلال
ونحن خلال
ونحن زمام
ونحن الشف
ونحن الدلكة والصندل
ونحن الخمرة والمحريبة والحرجل
ونحن الروبة والمنجل
ونحن اللبقة والجدول
ونحن السنطة والورتابة والشمامة والحنضل
تقول لي شنو
تقول لي منو
ونحن سحاب
ونحن تساب
ونحن حراب
ونحن حراب
ومحن سراب
ونحن المترة والمرتق
ونحن السلبة والقادوس
ونحن الونسة والفانوس
ونحن الشطة والبنضورة والفقوس
ونحن ألترعه
والحواشة
والطورية والتربال
ونحن الحربة والشوتال
ونحن رجال
ونحن طوال
كضب من قال
يطولنا محال
دا نحنا الطالنا تب ماطال
ونحن جنوب
ونحن شمال
ونحن تبلدي
ونحن السدرة والسيال
ونحن الشاف
ونحن كليت
ونحن الهمة
نحن اللمة
نحن النمة والدوبيت
ونحن الغيط
ونحن البيت
ورأس الخيت
ونحن الودعه والسوميت
ونحن الزول بسوي الدايرو
وابدا ما بيقول سويت
ونحن المابنقول يا ريت
تقول لي شنو
وتقول لي منو
ونحن القاش
ونحن رشاش
ونحن الزيفة نحن دعاش
ونحن الغيم
ونحن الوادي
ونحن الصاقعة والعبادي
ونحن الصيف
ونحن خريف
ونحن الحجرة
نحن القيف
ونحن جروف
ونحن سيوف
ونحن الطوف
ونحن الشادي
نحن الحادي
نحن النوبة والطنبور
ونحن كرومة نحن سرور
ونحن الشورة
وقت الحيرة
وقت الزنقة نحن حضور
ونحن بنلحق المأسور
ونحن بنجبر المكسور
تقول لي شنو
وتقولي منو
ونحن تقاية
ونحن وقاية
ونحن لداية
نحن الراية
والحاحاية
ونحن الجمرة
ونحن المرة
ونحن الحرة
يوم الزرة
ونحن من المتالن مافي
ونحن افو
ونحن عوافي
ونحن وقت تقوم الحارة
فينا الزول يموت وقافي
وسيفو من الرقاب متعافي
دما صافي
تقو لي شنو
تقول لي منو
ونحن نهد
ونحن نقد
ونحن نسد
ونحن العد
ونحن وتد
ونحن فرح
ونحن كرح
ونحن الدخلة والصبحية والليلية والحولية
ونحن صباح
ونحن صفاح
ونحن فرح طهور وملم
ونحن فراش بكا وميتم
ونحن الصدقة
نحن الحد
ونحن الصوم
ونحن العيد
ونحن رهيد
ونحن التردة
ونحن الفولة والباجور
ونحن بخور
ونحن الباجا والمحفور
وحجر المك
ونحن عقيق ودار الفور
ومريل باي
ونحن أم حر
ونحن أم جر
ونحن أم دم
ونحن أم دوم
ونحن أب ديس
ونحن اللول
ونحن الجول
وبحر الجور
تقولي شنو
تقولي منو
ونحن التار
ونحن الزار
ونحن الطار ونحن الشونة نحن المونة والطاحونة
ونحن الوازا
والحابودي
والجزاري
والمسدار
ونحن الشدة والشوقار
ونحن الصفقة
نحن مناحة نحن رقيص
ونحن مديح
ونحن الريح
ونحن الشيح
ونحن بخور
ونحن الكور
ونحن كجور
ونحن الكشنة والبربور
ونحن الكجرة والرقابة والطيفور
ونحن الفركة نحن الفردة
والدمور
ونحن الشملة
والشمارة
والشقيانة
والقفطان
ونحن الفروة والبطان
ونحن نبيت
ونحن الترة والدكاي
ونحن ربيت
ونحن المنقه والباباي
ونحن الجادة والقنديل ود لقاي
ونحن طبق
ونحن نبق
ونحن الكتمة
والسفاية
والهبباي
ونحن العكفة
والمخلاية
والشبرية
والشمشية
والدوباي
ونحن الغادي
نحن الجاي
ونحن الزول
ونحن فلان
ونحن هناي
ونحن الأيد معاها الايد
ونحن الساق بعيد وداي
تقول لي شنو
تقولي منو
ونحن والدان
ونحن الدين
ونحن الغيث
ونحن الغوث
ونحن النجدة نحن العون
ونحن العين
ونحن الختو في التاريخ كلاما زين
وفعلا زين
وذكرا زين
ونحن الكر
ونحن الحر
ونحن الشر
ونحن اللين
ونحن ولاد بيوت الطين
ونحن بناة خلاوي الدين
ونحن النقطة للعرسان
ونحن الفاتحة للميتين
وتقول لي أنا مين
وتقول لي أنا وين
وبقولك هاك
وأقولك هاك
وأزيدك تاني ولا كفاك
تقول لي شنو
وتقول لي منو

مبالغة يا تلب, مشكوووووووووووووووووووور

حاجة رائعة جداً ياكبتن,لكن عنده قدرة على المفردات مبالغة.

لكن بعد الكتابة دى كلللللللللها انشاءالله يكون فى زول عمل ليك مساج بزيت زيتون ههههههههههه

شكراً كتييييييييير.

ده نوع من الشعرالوصفي الكامل يا كبتن الفيهو الرجوله والشهامه بتاعت اهل السودان واهل البلد
البعشلو الضيف بنور القمر ديل اهلي ................................
فيهو ادق الوصف من اهل السودان

ونحن ولاد بيوت الطين
ونحن بناة خلاوي الدين
ونحن النقطة للعرسان
ونحن الفاتحة للميتين
وتقول لي أنا مين
وتقول لي أنا وين
وبقولك هاك
وأقولك هاك
وأزيدك تاني ولا كفاك
تقول لي شنو
وتقول لي منو

مع خاااااااالص ودي واحترامي

[b] ابو عسجد
ابو زرد
ابو درق
فارس الفوارس
بتجيب كلاما جد
اسمع عمك الجاغريو بيقول شــــنو :
نحنا صـغيرنا عندو حياتو ماهمية
في زمن الحرب واحد بيوزن ميــه
نحنا ارواحنا يعزن ناس سعاد وصفية
ونحن الللوطن وعودنا ديمه وفية
نحن اولاد بلـد نقعد نقوم علي كيفنا
في لقي في عدم ديما مخرف صيفنا
نحن ابخرس نملاه نكرم ضيفنا
نحن في رقاب الناس مجرب ســيفنا

فائدة:
ابوخرس : قدح ضخم علي جوانبه مقابض من حديد لحمله وهو يحمل بواسطه اكثر من شخص

الكلام ده جميل وانتو زاتكم بتجيبو من وين لكن بس ناس سعاد وصفية ديل مامعانا هههههههه