عامية سودانية وراندوك للقرن الـ21

خوفا من الاستلاب الفكري والثقافي .. وهبة غضب في وجه
الحنكشة والمفردات الدخيلة على مجتمعنا ... نريد ان يكون هذا البوست توثيقا للمفردات العامية شديدة الخصوصية والايغال في القدم ... يعني كلمة تكون من زمن حفرو البحر ولسه مستخدمة ... ان شاء الله من كلام حبوبة الحبوبة ..
ومن اجل ان يعرف ابناء القرن 21 عمق وظرافة العامية السودانية
ارجو من الكل الاسهام بما لديهم من مفردات .. لأن لكل منطقة في السودان مصطلحات وألفاظ محلية لا بعرفها غيرهم من اهل المناطق الأخرى.. وتحية لأول من حاول التوثيق في هذا المجال بروفسير / عون الشريف قاسم صاحب ((قاموس اللهجة العامية في السودان))
ونعلم انه بعد اصدار هذا القاموس ولدت عبقرية الشعب السوداني الكثير من المفردات التي تدخل تحت قطية "الراندوق" ارجو ان اراها هنا..

ونبدأ بإسم الله

-:أدوات الإنارة
:من أدوات الإنارة
1.حبوبة ونسيني وهي شيخ طه: وتتكون من خيط مبروم مسقي بالزيت ويشعل طرف الخيط كرمنسة سودانية بحتة.

2. الرتينة: وهي بت عم الفانوس الكبيرة وتوجد في بيوت الناس "الراحات".. ولها طقوس عجيبة عند الاشعال.. ويستعمل فيها الجاز الآبيض "الكيروسين" (نرجو مداخلة العلماء هنا

-:من الأكلات السودانية

ام تكشو: وتكنى "بالجديلة" وهي الخدرة البرية "البروس" بمعنى التي لا يزرعها انسان وانما تقوم كدا براها اول ما تنزل الأمطار .. ويصنع منها ملاح ام تكشو الذي يظبط مع وجود البصل والشطة الخدرة..

من مميزات اللهجة العامية السودانية .. إبدال الحروف.. ونستعين بكتاب بروف عون في ذكر المفردة الفصحى وما يقابلها من عاميتنا..
كرشوهو : طردوهو
خبتوهو : خبطوهو
هرشوهو : خوفوهو
بتنوهو ، كسروهو ، رشوهو : دقوهو
ردموهو ( في الكورة )، شلوهو : يعني وقعوهو واطة
جروا ليهو نور ، وحدروا ليهو : حمروا ليهو
خمشوا بنية : ضربو بنية
قبقبوهو : مسكوا من ثوبه
رصعو كف : أداهو كف
أم دلدوم : ضم القبضة والضرب بأسفلها في الظهر
أم سعد الله : الضرب في قمة الرأس
وا حاية أمك ، سجم أمك ، سجم خشمك : يعني موضوعك بايظ
ركب التونسية ، طيارتو حرقت : موضوعو باظ
إتلحس ، إنترم ، رقد ، إتكل على الله : مات
عمل زغبير ، كبر اللفة : زاغ
كمًيت: ودي تستعمل كإختصار لي كنت فعلت كذا و كذا
مثلا: أنا لو عارف القروب ده بِلم كدي كمًيت سويتو من زمان
نحل: المتطفل الذي يتدخل في ما لا يعنيه وهو المتضهب وخصوصا في بيوت الأفراح بقصد الملح
نكتل الحفله: اي نهجج فيها ونرقص الى شروق الشمس
رقدو قش: دي عجيبة جد وما قادر اشرح ،، هي زي زاغو.. او استسلمو .. وهي شبيهة بقولهم (قالو الروب) والله أعلم..

و ندخل علي أدوات المطبخ و السفسفه أو المنجريه و نبدا بالمطبخ زاااتو: يسمى التٌكٌل
المفراكة: هي عبارةعبارة عن عصا تنتهي بعود رفيع أو عودين تستخدم لتحرك الملاح أثناء طبخه.

الكنش: شكل من أشكال المفراكة المطورة وينتهي بقطعة من الخشي ذات شكل هلالي.

الككر: مقعد صغير الارتفاع من الارض.. وفي الأصل هو مقعد بهذه الشاكلة يستعمله سلاطين السودان القدماء في دارفور وفي مملكة العنج.

البنبر: مقعد منخفض قريب من الأرض يصنع من مختلف المواد.

الشرغرغ: يقابل البراد الآن ويصنع محليا من الصفائح الزنك او علب اللبن الفارغة ويستعمل في صنع القهوة قبل صبها في الجبنة.

كباية الشب:كباية مقاسها كبير أكبر من كباية الشاي المعتادة.

السعن :جلد كالقربة يستخدم في حمل الماء او اللبن وسيتعمل في صنع الفرصة.وابو السعن نوع من الطيور المهاجرة التي تأتي للسودان في فصل الخريف.

الفرصة: مشتق من مشتقات اللبن (الحليب يا اولاد المغتربين) حيث يوضع اللبن في السعن ويخض (يهز) اللبن بداخله وتتجمع الفرصة أو السمن.

كلمات عامه:
وشرتيت وكنجالات وككس وضحاكات وفلة وفلنكوت : يعني قروش
*************************
أكلو راسو : برضو غشوهو

مسحلب ومجنتر ومكشكش ومدروش ومهترش وفاطي سطر وعندو سلك عريان والله ما ليهو : يعني مجنون أو أهبل

القطعَة: هو الشخص الغير مرغوب في حضوره ودائماً يأتي في الزمن الغير مناسب.

افتح ليه كبري: أي تجاهله ولا تعيره أدني اهتمام وتختصر بقولهم ( فتح) يعني افتح ليه كبري.

الصب: الصب بمعنى البري والبري من البرايه ونبرى من البري.

الشم: يقال شماه وفلان شم فلان بمعنى انو كجنه اي كرهه لسبب ما.

العيفه: بمعنى الشخص الأهبل.

التليفه: نفس معنى العيفه

الخمجان: الخمج هو مجاوزة الحد في كل شيء.. وتكون كلمة الخمجان كتنقيص للصغار اي ان الشافع مدلع.. وصفة مدح للكبار بمعنى ان الشخص خمجان اي انه فاق اقرانه في الكرم او في الشجاعة .... الخ
معسم.. أو رقبتي with the sky (معسمه)...
الفليِتة: بنفس معنى التعسم والإنشماط.
مشموطه: يقارب معناها التعسم أو العسم وهي كلمة تطلق على التقلص العضلي المؤلم بسبب الرطوبة أو غيره في أي عضلة بالجسم فيقال كراعي انشمطت
الطُمام: هو الغثيان فيقال بطني طامه...
أبو الشِهِيِّق: هو الفواق أو الفاووق أو الفاق أو الزغطة ويقصد به اضطراب الحجاب الحاجز عندما يضغط على القفص الصدري والرئتين مسببا اندفاع الهواء بقوة من الرئتين.
ونختم علم الباثولوجي بمرض سوداني خصوصي ألا وهو:
مرض حامد أو "مرض عوضية": وهو من الأمراض المستشرية المزمنة لدى العذابة امثالي والعذابيات.. نسأل الله لهم ولي العديل والزين. وفي انتظار ردودكم ياحبايبنا

المبدع ادريس-ود ابوسباع-
سلامي الحار لك ولجميع افراد الاسرة الكريمة جيران الزمن الجميل
سلام خاص لوجع ضهر-بكري- وللدقاق -كرم- وكيف عاملين
شكرا علي الطرح الطريف رجعتنا لزمن الدنيا بخاطرة والقعونجة(الضفدعة يااولاد دلس ويثرب) براجلة(ما كان عندها مرض عوضية)
بناء علي دعوتك للجميع
ارجو من الكل الاسهام بما لديهم من مفردات
هذه بعض الاضافات
رندوك:
رقد رقيق( بتشديد الياء)- قام صوف: اي ولي مدبرا ولم يعقب.
:رجع خشمو ملح ملح

الخشم الفم -ملح ملح اي غضبان اسفا دلالة علي المرارة الحسرة وخيبة الامل
الجماعة صبت فيهم مطرة: واجمين ساكنين كان علي روؤسهم الطيروتستعمل عادة عند مشجعي كرة القدم علي جمهور الفريق الخاسر.
او بلغةعباس ويو: في ناس قبلوعلي شارع الظلط( شارع الظللط اي الشارع المرصوف والمقصود شارع الشجرة الرئيسي او شارع السجانة)

اضان الحامل-اضان جلد الطناش والتجاهل

المخلاية- كيس او جراب من القماش الدموورية او الدبلان يحمل فيه الزاد والامتعة للمسافر
الدابي: الاصلة الدبيب الحية الثعبان
الدكوة: كريمة الفول السوداني

...ونواصل انشاء الله...

لك التحيه اخي بكري
ومشكوووووووووور علي المرور
والله كميه من الاشواق الغاليه
طيعا يابكر انا كل ما اشاهد الدوري الالماني بتزكرك لانك كنت لاعب بالجد لاعب حريف
واتمني بالجد اعرف اخبارك واخبار الاسره الكريمه
الاخ عباس وعبد السلام وعمر

وتقبل خالص تحياتي

» امثال سودانية
» لوحة سودانية
» نصائح أم سودانية لابنتها
» اغنية سودانية تتضحك
» اغنية سودانية تفقع من الضحك