منتدى الشجرة والحماداب
منتدى مدينة الشجرة والحماداب



 
الرئيسيةالتسجيلدخول

شاطر | 
 

 دي علي أنا؟---الفاتح جبرا ---

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
Amgad
شجرابي مبدع
شجرابي مبدع


الجنس : ذكر الاسم كامل : Amgad Hakim

مُساهمةموضوع: دي علي أنا؟---الفاتح جبرا ---   الخميس 01 يوليو 2010, 3:20 am

مقالي في عمود الأحد الماضي، الذي بعنوان (جلطة نفيسة) وجد تجاوباً منقطع النظير خاصةً من (الجنس اللطيف)، كيف لا وهو يحكي عن جارنا (حاج عبد المنعم) - رحمه الله -، الذي اكتشفت زوجته - أرملته لاحقاً - أنو كان متزوج عليها في السر وكان يستغل قصة ذهابه إلى المسجد لصلاة العشاء وما يتبعها من دروس وحلقة تلاوة في الذهاب إلى زوجته الثانية..!

إمتلأ موقعي الرسمي على الإنترنت وكذلك على (الفيسبوك) بتعليقات الجنس اللطيف من شاكلة:

الله عالم مافي راجل بينضمن.. والبتأمن ليها راجل إلاّ تكون غبيانة ساااكت.

ياما من الرجال ياما من الميه في الغربال.

إنتو يا الرجال في اللف والدوران مابتلفتو، الله يدينا خيركم.

يعني (حواء) صدقت لقت ليها (تور وقع) وطوااالي جابوا (السكاكين)! وهاك يا (تعليقات)..!

ناسية إنو إذا كان الرجل مرات (بيلف ويدور) كما المرحوم (حاج عبد المنعم)، فالمرأة هي الأخرى تمتلك دهاءً يفوق دهاء الشيطان - ذات نفسو - والكلام ده ما قلتو أنا (عشان يزعلو مني) بل ورد في القرآن الكريم.. ففي سورة يوسف يقول الله سبحانه وتعالى: (إن كيدهن عظيم).. وفي سورة النساء (إن كيد الشيطان كان ضعيفاً) الشئ الذي يؤكد بأن كيد (النسوان) أكبر من كيد (الشيطان) وإنو الشيطان مجرد (تلميذ) في مدرسة النسوان..!

فإنّ كان المرحوم حاج عبد المنعم قد اتضح بأنه متزوج في السر (على سنة الله ورسوله) فالمرأة ممكن (تكتل راجلا) وتمشي في جنازتو مستخدمة إحدى وسائل التخلص من الزوج التي تطورت عبر مختلف العصور من (مرحلة سم الفئران) مروراً بالزيت المغلي والساطور والأكياس إنتهاءً بالصبغة و(المسدس) سريع الطلقات..!

وكما أنّ وراء كل رجل عظيم إمرأة، فإن وراء كل رجل تعيس (حكومة) مطلعة زيتو.. (أفهموها زي ما عاوزين)!! المرأة هذا الكائن الجميل الذي يفيض رقةً وحناناً والتىما فتئنا ننظم فيها الأشعار والأغاني ونحلق في السماوات العلا عند سماعنا لكلمة حب منها أو ابتسامة رضاء هذا الكائن (اللغز) يمكن في لحظة غَضب أن يصبح وحشاً مفترساً يحطم ويهشم كل شئ أمامه (وأول شئ طبعن رأس الزوج)..!

ما أود أن أقوله هو أن كان (الحاج عبد المنعم) قد (عمل حلقة التلاوة) سبباً وحيلة لقضاء سويعات مع زوجته الثانية (في السر) فهذا لا يعني أن الدهاء وحده ماركة مسجلة باسم الرجال.

وإنو (حواء) برضو ما مقصرة..!

يحكى أن أحدهم قد عاش قصة حب عنيفة مع إحدى الفتيات وبعد لقاءات متكررة تقدم إلى أهلها وتم الزواج، وقد كان صاحبنا من النوع (الشكّاك) ومنذ اليوم الأول للزواج أحضر ورقة وقلماً قائلاً لزوجته:

تعالى هنا.. من هسه ورينى كل الحتت والأماكن الإنتي بتمشي ليها.

بيت ناس أبوي - الحنانة ذ الكوفير - ناس نادية صاحبتي....

وعددت له (كم حتة كده) قام بكتابتها في (لستة) طويلة وعريضة، بعد انتهاء فترة الزواج الأولى جاءته في أحد الأيام بعد أن (قشرت) ديك يا القشرة:

ماشة ناس أبوي..!

أمسك صاحبنا بالورقة ومرر يده على (اللستة) حتى وجد (بيت ناس أبوي) فسمح لها بالذهاب ، ثم بعد كم يوم:

- ماشة الكوفير

أمسك صاحبنا بالورقة ومرر يده على (اللستة) حتى وجد (الكوافير) فسمح لها بالذهاب، ثم بعد كم يوم:

ماشة الحنّانة.

أمسك صاحبنا بالورقة ومرر يده على (اللستة) حتى وجد (الحنّانة) فسمح لها بالذهاب، ثم بعد كم يوم:

ماشة ناس نادية صاحبتي.

أمسك صاحبنا بالورقة ومرر يده على (اللستة) حتى وجد (بيت ناس نادية صاحبتي) فسمح لها بالذهاب، لكنه بعد خمس دقائق شوهد وهو يجري في الشارع (بالرداء والفانيلة) مقتفياً أثرها كالمجنون وهو يصيح:

- نادية صاحبتي؟.. ده عليّ أنا.. نادية صاحبتي؟ ده على أنا..!

كسرة:

تذكر صاحبنا بأنها كانت لمن تقابلوا قبل ما يعرسو بسألها يقول ليها: قلتي لي ناس البيت ماشة وين؟ تقوم تقول ليهو:

- قلتا ليهم ماشة ناس نادية صاحبتي!!

الرجوع الى أعلى الصفحة اذهب الى الأسفل
nimat mohamed salih
المعلمة والمربية
المعلمة والمربية
avatar

الجنس : انثى الاسم كامل : nimat mohamed salih(um ramiz)

الاوسمة
 :


مُساهمةموضوع: رد: دي علي أنا؟---الفاتح جبرا ---   السبت 03 يوليو 2010, 1:31 pm

الاخ امجد الرد على مقالك اجسدة لك فى قصيدتى التى كتبتها واوردها فى احدى الصفحات السابقة فى هذه المساحات العامرة باهلها

وكانت ايضاً رداً على الكثير ممن كانوا يرسلون قذائفهم على المرأة التى كنت ولازلت ادافع عنها بقلمى الذى لاينضب معينة فى الثأر لها هههههههههه

لك التحية وهاكم الفرق بين الرجل قديماً والذى كان يبجلها والرجل الان الذى يريد ويريد ولا يعطى ( بعض منهم ومامعانا زعل ) فلنبتسم معاً .

ياحليلو الزمان الكان شهامتو اصيلة

يدفع عنها كل قاسية يحلف يشيلا

جياب للسمح مابقول قروشا كتيرة

ياحليلو الزمان.......

الحبو كان بيديهو

كان بيستر عليو

من الفراق بيحميهو

صاين عشرة ليها

مهما الزعل قام بيهو

بيركع للبريدا

غير رضوة مابتجيهو

ياحليلو الزمان .........

الكان بيقرش الجمرة

الدود النتر والعين شرارة وحمرة

مابيرضى العيوب

أب قول بيختم الحضرة

سيد الراى سديد

فى صوته هيبة وجبرة

وين الليلة ديل العشرتم منشترة

يااااااااااحليلو الزمان...........

راجلاً بيعدل الميل

ست البيت تجيه

بجمالا ليه تميل

تسبح فى العطور

تديه كل جميل

كان ماربنا تركع تعبدو عديل

وين الليلة هو...........

مللحنينة مجافى

تكرم عشرتو لخيرها دائماً نافى

تسكت بالقليل

جواه تب ماصافى

خاين فى الظلام

يمرق حرامى وحافى

وينو الليلة هو...............

يطلب يقول يدوهو

خملان فى الجسم

يتمنى لو شاوه

طارد الرحمة من

بيت العيال الجوه

نقناق فى الحديث

لو بس سؤال سالوه

ماداير كلام حتى الاكل حردوه

وينو الليلة هو ............

بيعرف معانى الجيرة؟

لابيمرق عرس لابيكترث لسيرة

لايبارك سمح لابيمسح التكشيرة

يااااااااحليل الزمن

وياحليل رجالو الفاتو

وياحليلو البيقول حرًم مقابلة حياتو

لو حلف اليمين مابيكترث للجاتو

لو عدم القرش

بيرفع رؤوس اخواتو

ياااحليلو الزمان..........

الروحو ليها براها

يديها الكتير بعمرو كان بيفداها

يحلف بالقسم البيت عمر بنداها

لو غابت فى يوم يتباكى لو يطراها

يوزنها بالدهب مابيلقى حب الاها

خربااااااان الزمن

ما أدى حواء مناها

كان آدم عرف نوع حوا كان جازاها

التحية والتقدير والاحترام لكل الاخوان الاعزاء وارجو ان تكون الروح رياضية لانه واللة نحنا فترنا من القول فينا اها قلنا شوية كدة نتنفس بعض الشئ هههههههههههه.

and take it easy I love you I love you I love you lol!
الرجوع الى أعلى الصفحة اذهب الى الأسفل
مجدى ابوعبدة
مشرف مشاهير الشجرة والحماداب
مشرف مشاهير الشجرة والحماداب
avatar

الجنس : ذكر الاسم كامل : مجدى عوض محمد احمد

الاوسمة
 :


مُساهمةموضوع: رد: دي علي أنا؟---الفاتح جبرا ---   الأحد 04 يوليو 2010, 3:14 am


الواحد ما ليه الا ان يقول سبحان الله .
الرجوع الى أعلى الصفحة اذهب الى الأسفل
 
دي علي أنا؟---الفاتح جبرا ---
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدى الشجرة والحماداب :: شجرة الأخبار والقضايا-
انتقل الى: