من كتابات الفاتح جبرا

الفاتح يوسف جبرا
يا بشير تعال

أول أمس الخميس حضرت كعادتى لمبانى الصحيفة لمتابعة مقالى الاسبوعى الذى ينشر بعدد الجمعة وقبل ان أرتقى (السلم) متوجهاً إلى غرفة (الكمبيوتر) ناولنى الأخ (يحيى) موظف الإستقبال (الرائع) ظرفاً وهو يخاطبنى كعادته بمفردة (ياريس):

- يا ريس الجواب ده ختاهو ليك أمبارح الضهر واحد هنا قال بعرفك..

حملت الخطاب وطلعت على (المكتب) وضعت أمامى فنجان القهوة واشعلت سيجارة ودعونا نقرأه معاً:

حضرة الكاتب الرائع الأستاذ الكبير

السلام عليكم ورحمة الله تعالى وبركاته:

- أول حاجة أنا بهنيك على مقالاتك الممتعة الظريفة القاعد تكتبها وأنا الحقيقة كنت متابعك مما كنت بتكتب فى (الأيام) - أنا لم أكتب فى الأيام قط - وخاصة مقالك الأسبوعى بتاع يوم الإتنين - ليس لى مقال يوم الإثنين- المهم هسع عرفت إنك جيت (الرأي العام) قلت اجى أقابلك عشان نعيد الأيام الجميلة بتاعت المدرسة الأولية.. إنت يا (جبرا) أكيد ما بتتذكرنى أنا (بشير) الألفة بتاعكم طبعا عندك العذر لأنو الأيام طالت والحياة كمان بقت صعبة والناس كلها بقت عايشة فى دوامة ما بتنتهى والكلام ده هسع ليهو زى أربعين سنة وكمان إنت بقيت كاتب مشهور وكده !! وطبعا الناس لمن تشتهر بتنسى أصحابا الزمان لكن برضك ما أظن تنسانى ياخى أنا (بشير) الألفة بتاعكم فى مدرسة أب روف الأولية (أ) الكنت لمن (تهرجل) ما قاعد أكتب إسمك عشان

يجلدوك عشان إنت كنت صاحبى.. تتذكر يا (جبرا) لمن (غافلنا) الغفير بتاع المدرسة (اب رزقة) وشلنا من (طبليتو) الحلاوة وقام إستاذ (بابكر) جلدنا (بالحزام بتاعو)؟ وإلا لمن يجى يوم النتائج وإنت تجى (الأول) والأولاد يقيفو (يربطوا) ليك بره المدرسة وانا أجى أحامى ليك؟ والله أنا مما شفت صورتك فى (الجريدة) عرفتك طوالى وكأنو السنين دى ما عدت وطوالى إتذكرت فى سنة (رابعة) لمن (علبة الهندسة) الجديدة بتاعتك ضاعت وقام أستاذ (رابح) فتش (الفصل كلو) وما لقاها طبعا إنت لى هسع تكون ما عارف إنى أنا الشلتها ودفنتها فى حوش المدرسة عشان عجبتنى.. كانت أيام يا (جبرا) وذكريات ما بتنتهى وعارف وكتك بيكون مزدحم يا أستاذ- عشان كده ما ح أطول عليك - أنا ياخى ماعاوز منك أي حاجة أنا بس جيت أقول ليك اني ما صدقت إنو صاحبى يكون كاتب مشهور وصورتو تطلع فى الجرائد كل يوم .. وأنا هسع عندي ولدين وبت، الولدين إتخرجوا من الجامعه السنة دي الكبير فيهم قرا (كمبيوتر) وقاعد ما لاقى ليهو شغل قمت لمن عرفت إنك كمان (أستاذ كمبيوتر) إنبسطت وقلت خلاص مية المية تشغلو لينا وأخوهو الصغير إتخرج السنة دى (محاسبة) لكنو بيلعب كورة وحريف شديد ولا (عزالدين الدحيش) أنا قلت ليهو بختك عمك (جبرا) ده يشوف ليك (عبدالمجيد عبدالرازق) الماسك صفحة الرياضة يشوف ليك طريقة مع ناس المريخ والهلال ديل أصلو الأيام دى الكورة (مضمونة) أكتر من (القراية) أما البت (حنان) آخر العنقود فدى ح تمتحن الشهادة السنة دى وأنا قلت تمتحن وكان ما جابت شهادة تقعد فى البيت تنتظر ودالحلال مع إنو اليومين ديل (عرس مافى) والبنات بقو على قفا من يشيل.. المدام الله يخليها عملت ليها (كشك) فى الحلة قدام المدرسة بتعمل فيهو (فطور) لكن ناس المحلية (مغلبنها) شىء (رخص) وشىء (ضرائب) وشىء (رسوم) والله يا أستاذ لو كلمتهم لينا كمان يخففو عليها شوية يكون ده جميل ما ح أنساهو ليك أبداً.. نسيت أقول ليك إنو نحنا ما سكينا القراية زيكم كده بعد ما

قريت (الوسطى) إشتغلت (سواق) طوالى وبعد كم سنة كده مشيت إغتربت ليا كم سنة عملت ليا شوية (القريشات) علمنا منها (الأولاد) والباقى (أكلناهو) والفضل إشتريت ليا بيهو (ركشة) لكن بتاعين (الحركة) كل يوم مقطعنى إيصال بى (عشرين ألف) عشان (الترخيص) والله يا أستاذ كمان لو شفتا ليا طريقة للمسألة دى تكون خدمتنى خدمة ما ح أنساها ليك ابداً أكيد تكون بتعرف (سعادة اللواء) مدير المرور ده لو ما كان صاحبك!!

والله يا أستاذ أنا والأولاد وأمهم مبسوطين شديد من كتاباتك وأى زول يقابلنى أقول ليهو (الفاتح جبرا) ده (دفعتنا ) وأنا كنت (الألفة) بتاعو!!

الكلام كتير لكن عارف وقتك بيكون (مزحوم) عشان كده أقول ليك مع السلامة وأتركك فى رعاية الله وحفظه..

أخوك

بشير عزالدين عبدالله

ملحوظة:

أنا ما عندى (موبايل) وما عندى (تلفون) فى البيت والبيت ذاتو (السيول) الأخيرة دى شالتو وهسع قاعدين فى السهلة ساكت عشان كده لو قدرت عملت ليا حاجة بس أكتب ليا سطر تحت مقالك قول ليا فيهو يا (بشير تعال