منتدى الشجرة والحماداب
منتدى مدينة الشجرة والحماداب



 
الرئيسيةالتسجيلدخول

شاطر | 
 

 [b]كنايات لها تفسيرات باللهجة العامية[/b]

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
اسامة السيد
شجرابي مبدع
شجرابي مبدع
avatar

الجنس : ذكر الاسم كامل : اسامة محمد السيد قبيل ا

مُساهمةموضوع: [b]كنايات لها تفسيرات باللهجة العامية[/b]   الأربعاء 26 مايو 2010, 6:20 am

(الكناية) فى اللّغة هى التكلّم بما يريد به خلاف الظاهر و(كَنَيْت) أو (كنَوْت) بكذا عن كذا، إذا تركت التصريح به وفي الاصطلاح هى لفظ أريد به غير معناه الموضوع له، مع إمكان إرادة المعنى الحقيقي، تمتلئ لغتنا (العامية) بكنايات كثيرة أردت فى مقال اليوم أن أستعرض بعضاً منها:
- أخلاقو فى مناخيرو : تقال للشخص كناية عن (بالو الضيق) كون أنه مستعد للشجار و(الشكل) لأتفه الاسباب وهذه الخصلة تكاد تكون ملازمة للموظف أو العامل (الما مقتنع) بى شغلانيتو.
- أيدو لاحقة : تقال للشيخ يظن به فعل الكرامات وعلاج الأمراض حتى إذا ما أصابك (مرض) شددت إليه الرحال فلم تجده لأنو (بى بساطه) مشى الاردن يتعالج.
- أيدو خفيفة : تقال للشخص الذى تمتد يده لأخذ مقتنيات الآخرين ووضعها فى (جيبه) أو حيازته (يعنى نشال) أما إذا كانت تلك المقتنيات (مال عام) فلا يشترط أن تكون (أيدو خفيفه) وممكن (يقزقز) على راااحتو!
- أضانو تقيله : تقال للشخص الذى لا يسمع جيداً و(تقل الأضان) يمكن أن يكون (مصطنعاً) كذلك الذى يمارسه المسئولون تجاه (نباح) المواطنين حول مشكلة ما ! أو الأزواج عندما يطلب منهم العودة فى المساء (مبكراً)!
- بيأذن فى مالطه : يطلق هذا القول للشخص الذى يتحدث بجدية فى شرح موضوع مهم والمستمعون حوله مشغولون بامورهم ولا يعطونه اى اهتمام أى كحال شخص يؤذن للصلاة فى بلد خال من المسلمين فلا يجد إجابة!
- من إيدك دى لى إيدك دى : عبارة يقولها المرشح للناخب عند الإنتخابات وتصبح غير ذات قيمة بعد فوزه لأن (الناخب) عندها مش ح يكون عندو (إيدين) خالص!
- باضت ليهو فى القفص : تقال للشخص (المحظوظ) فالجدادة ما باضت ليهو (تحت العنقريب) أو (فى التكل) وسط الصحون والحلل و(العدة) عشان يقعد يفتش .. لا .. دى باضت ليهو جوه القفص (ذاااتو) يعنى بس يفتح ويشيل وعلى (البنك) طوااالى!
- ماخد ليهو تعسيلة : (أنظرصور النواب فى البرلمان).
- الموضوع طلع من أيدو : عبارة يقولها لك الموظف عندما تبطئ فى إعطائه (المعلوم) وترجمتها .. (يلا ورينا شطارتك)!
- مبسوط أربعة وعشرين قيراط: القيراط (كوحدة قياس للكتلة) هو مقياس يستخدم لقياس كتل الأحجار الكريمة والذهب ويساوي القيراط الواحد 200 مليجرام،والذهب النقى هو عيار 24 أى أن الـ24 قيراط هى ذهب خالص أما عيار 21 فهذا يعنى أن 21 قيراط منه ذهب والثلاثه الأخرى هى نحاس والزول المبسوط 24 قيراط معانتو زول مبسوط للآخر( ما ينبسط ليه ؟ عامل ليهو عمارتين من مرتبو!)..
- خشمو فاكى :تقال للشخص الذى لا (يمسك السر) والغريب فى الأمر أن هذا الشخص فى العادة يبدأ حديثه بعبارة : أقول ليكا (سر)!!
- كراعو حارة : تقال للشخص الذى تأتى الكوارث متزامنة مع قدومه وتكثر هذه المقولة عند (إنقطاع التيار الكهربائى) لأنو لازم يكون فى زول (فى نفس الوكت) دخل ليهو حته!
- عينو حارة : تقال للشخص إذا قام بالتعليق على شئ ما وأصاب ذلك الشئ مكروه كذلك الشخص الذى رأى (سخل) يقف على (تربيزة) فقال: الشئ مكنة خياطة !
- راسو ناشفة : هو ذلك الشخص المعتد (بى رايو) حتى لوكان غلط كذلك المسئول الذى أتى بالبكور و (أخرجنا) من ملة (التوقيت العالمى)!
- زيتو طالع : كما هو معلوم فإن الزيت النباتى يستخرج بعد (عصر) الحبوب .. يعنى عشان يجى زيت لازم يكون فى (عصر) والزول عشان (زيتو يطلع) لازم (يتعصر) والمعنى واضح!
- فاتو القطر : تقال للذى فاته قطار الزواج وتقال للأنثى أيضاً إذا ما تعدت الثلاثين ولم يتقدم لها الزول الفاتو القطر ده ذااتو .
- نفسو فاتحه : تقال للشخص الذى على الرغم من أن كل ما يحيط به يبعث على (الطمام) و(سد النفس) إلا أنك تراه مقبل على الحياة (ليه مش تعرف)!
- لا بهش لا بنش : يقولون ان فلان لا بيهش ولا بنش يعنى (لا بيحل لا بيربط) دلالة على سلبيته مما يؤكد تماماً إنو قاعد ساكت ومرتو بتصرف على البيت !
- جلدو تخين : تقال للشخص متبلد الشعور وما (بحس) وهذه صفة تتناسب طردياً مع حجم المسئولية التى كلما كبرت كلما إزدادت طبقات الجلد مما أدى إلى (تخانتو).
- لسانو خفيف : (أنظر خشمو فاكى)!
- سلوكو ضاربة : تقال للشخص إذا فقد جزءاً من قواه العقلية كما يمكن أن يقال له : مكشكش ومدروش ومهترش وفاطي سطر هذا قبل أن يقوم بإعتلاء (الصينية) أما بعد الإعتلاء فيقال له : فاكه منو - ضارب فيوز - فاكي صاموله - مسحلب -ومجنتر!
- قلبو ميت : أنظر (نفسو فاتحة)!
- بينفخ فى قربة مقدودة : يطلق على الشخص الذى حديثه أو كتاباته (زى حلاتنا) لا تأتى بمردود (وما بتجيب نتيجة) فيقولون انه ينفخ فى (قربة مقدودة) لأنك مهما نفخت فيها فإن نفخك يضيع هدراً.
- دمو تقيل : تقال للشخص الذى بطبعه ينعدم عنده الإحساس بالآخرين ولا يجيد قراءة وجوه من يخالطهم مثقلاً علي الحاضرين كذلك الشخص الذى يزورك عند التاسعة مساء دون سابق إنذار وأنت منهمك فى عمل ما فتجلس صامتاً ... ثم تدخل وتمرق ثم تغمض عينيك وتتثاءب .. وبعد أكتر من ساعة يقول ليك : كدى أفتح لينا (الجزيرة) نشوف الحاصل شنو؟
- دمو خفيف : الموضوع ده مش كده ؟ .... شكراً!!!
الرجوع الى أعلى الصفحة اذهب الى الأسفل
ابراهيم العمده
الحضور المتميز
الحضور المتميز
avatar

الجنس : ذكر الاسم كامل : إبراهيم عثمان محمد عبد الحميد

الاوسمة
 :


مُساهمةموضوع: رد: [b]كنايات لها تفسيرات باللهجة العامية[/b]   الأربعاء 26 مايو 2010, 10:42 am

...
أخونا أسامة موضوع بالجد سمح ودمو خفيف
ونديك كمان من الشعر أبيات
عينو زايقة : تطلق للرجل الذي لايقتنع بزوجتة وتلقاهو في المناسبات
يتلفت زي سواق التاكسي
إيدو خضرة : تطلق للشخص المكافح المجتهد وضرب المثل بالخضار
كنية عن المزارع الذي يخضر الأرض بيدو
حشاش بي دقنو : تطلق للذي يتحدث فقط ولايعمل شئ
فقد روي عن شخص يريد حش زراعتة وعندو دقن وكل يوم
يقعد تحت الشحرة ويأشر بي دقنو ويقول بكرة بحش الحتة دييييك
وهذا ينطبق عليه مثل السواي ما حداث
قلبو أبيض : يعني صافي القلب والنية ولا يحمل الأحقاد وما شابه
قلبو حار : يعني زول حارة وبتلقاهو وقت الشدة زول شدايد يعني
بالعربي كده شجاع
قلبو أسود : زول حسود
لسانو طويل : ومقصود بذلك الزول المابتقدر تنابزو ولا تستهتر بيهو
وقدر ما تقول تقول حاجة تغلبو بيها تلقاهو رد ليك رد ألجمك ( رد رباطاب )

ونخلي شوية للشباب كمان وبجيكم إنشاء الله
...
الرجوع الى أعلى الصفحة اذهب الى الأسفل
اسامة السيد
شجرابي مبدع
شجرابي مبدع
avatar

الجنس : ذكر الاسم كامل : اسامة محمد السيد قبيل ا

مُساهمةموضوع: شكر وتقدير   الخميس 03 يونيو 2010, 10:49 am

اشكرك ياود العمدة والله انا سعيدبى مرورك وتشجيعك وزياداتك فى مكانها وربنا يجعل ايادينا دايما خضرا ويبعدنا من العين الزايغة عشان المدامات ماتزعل ويجعل لسانا داخل فمنا خلينا بدون دقن خلص لا نحشش ونبخر وانشالله الشباب الباقين يكون عندهم شوية اضافة
الرجوع الى أعلى الصفحة اذهب الى الأسفل
مجدى ابوعبدة
مشرف مشاهير الشجرة والحماداب
مشرف مشاهير الشجرة والحماداب
avatar

الجنس : ذكر الاسم كامل : مجدى عوض محمد احمد

الاوسمة
 :


مُساهمةموضوع: رد: [b]كنايات لها تفسيرات باللهجة العامية[/b]   السبت 05 يونيو 2010, 3:47 am

عندو ضهر ..شايف نفسو ..نفسو عزيزة ..مرطب ..ود المصارين البيضاء ..برجوبة ..مجوبك ..
هذه بعض الكلمات البسيطة والتى يتم تداولها بصورة يومية ...وتحياتى ليك اخى اسامة .
الرجوع الى أعلى الصفحة اذهب الى الأسفل
اسامة السيد
شجرابي مبدع
شجرابي مبدع
avatar

الجنس : ذكر الاسم كامل : اسامة محمد السيد قبيل ا

مُساهمةموضوع: رد: [b]كنايات لها تفسيرات باللهجة العامية[/b]   السبت 05 يونيو 2010, 8:00 am

والله ياابو عبدا انت فريد فى عصرك وبتتحفنا بى الدورر دايما ( وبرجوبة ومجووبك وود المصارين البيوض والعندو ضهر )دى عايزه ليهابروفات و فطاحلة عشان يفسروها ويركبوها فى سرج اللغة ارجو منك ان تفسرها لنا اكتر للفايدة العامة يدييك العافية اخى وصديقى ابو عبدا الله الطيب
الرجوع الى أعلى الصفحة اذهب الى الأسفل
مجدى ابوعبدة
مشرف مشاهير الشجرة والحماداب
مشرف مشاهير الشجرة والحماداب
avatar

الجنس : ذكر الاسم كامل : مجدى عوض محمد احمد

الاوسمة
 :


مُساهمةموضوع: رد: [b]كنايات لها تفسيرات باللهجة العامية[/b]   السبت 05 يونيو 2010, 2:30 pm

اسامة السيد كتب:
والله ياابو عبدا انت فريد فى عصرك وبتتحفنا بى الدورر دايما ( وبرجوبة ومجووبك وود المصارين البيوض والعندو ضهر )دى عايزه ليهابروفات و فطاحلة عشان يفسروها ويركبوها فى سرج اللغة ارجو منك ان تفسرها لنا اكتر للفايدة العامة يدييك العافية اخى وصديقى ابو عبدا الله الطيب
البرجوبة الزول الما منظم وما مرتب ...والمجوبك الزول الماشى ساكت ما عارف
السبت من الاحد ..وود المصارين البيضاء ده الزول المنعّم واى حاجة دايرها يجيبوها
ليهو لغاية عندو ..والعندو ضهر ده الزول البكون واسطتو قوية لو نافس فى اى حاجة
بجيب النمرة الكاملة بدون ما يجاوب ..وارجو ان اكون قد اوفيت وفسّرت .
الرجوع الى أعلى الصفحة اذهب الى الأسفل
اسامة السيد
شجرابي مبدع
شجرابي مبدع
avatar

الجنس : ذكر الاسم كامل : اسامة محمد السيد قبيل ا

مُساهمةموضوع: رد: [b]كنايات لها تفسيرات باللهجة العامية[/b]   الأحد 06 يونيو 2010, 3:35 am

كفو ياابو عبدا .كفيت ووفيت بس انا عايز اعرف انت من ياتو ود المصارين والا االعندو ضهرو والا الايدو لاحقة والا الشايف نفسو التحية لك فى اى صفة تطلع
الرجوع الى أعلى الصفحة اذهب الى الأسفل
مجدى ابوعبدة
مشرف مشاهير الشجرة والحماداب
مشرف مشاهير الشجرة والحماداب
avatar

الجنس : ذكر الاسم كامل : مجدى عوض محمد احمد

الاوسمة
 :


مُساهمةموضوع: رد: [b]كنايات لها تفسيرات باللهجة العامية[/b]   الأحد 06 يونيو 2010, 4:01 am

اسامة السيد كتب:
كفو ياابو عبدا .كفيت ووفيت بس انا عايز اعرف انت من ياتو ود المصارين والا االعندو ضهرو والا الايدو لاحقة والا الشايف نفسو التحية لك فى اى صفة تطلع

انا ود المصارين الخضراء اتربيت بام رقيقة والخضراء ..شكرا حبيبنا اسامة .
الرجوع الى أعلى الصفحة اذهب الى الأسفل
اسامة السيد
شجرابي مبدع
شجرابي مبدع
avatar

الجنس : ذكر الاسم كامل : اسامة محمد السيد قبيل ا

مُساهمةموضوع: رد: [b]كنايات لها تفسيرات باللهجة العامية[/b]   الأحد 06 يونيو 2010, 4:11 am

والله ياابو عبدا سكتنى ياود الخضراء واحسب اهلى بالسودان كلهم منها الله يديم ام رقيقة والبامية المفروكة والخضر ابالشمار الاخضر والكسرة الحارااارة شرط يكون الكسرة بيتية او القراصة يعنى من الصاج سخنة لى القدح طوالى مع الملاح تاكل وما تدى الجنبك
الرجوع الى أعلى الصفحة اذهب الى الأسفل
ابووجيدة
جيل العمالقة
جيل العمالقة


الجنس : ذكر الاسم كامل : ابو وجيدة

مُساهمةموضوع: رد: [b]كنايات لها تفسيرات باللهجة العامية[/b]   الأحد 06 يونيو 2010, 6:19 am

أخونا أسامة محمد سيد تحية وتقدير لشخصك بما أتحفتنا به من العامية السودانية ومشتاقين بالحيل رقم انك يمكن ما تتذكر شكلنا لطول هذه الغربة ألعينه والله يدك العافية على موضوع العامية السودانية
لكن بكل أسف نحن هنا ماشين بعامية البنغلاء سيده مني مني وغيرها لمن اللسان أتعوج رقم ان العامية السودانية ثرية لو قعدت مع واحد من الأخوان العرب ودخلت ليه المعني عديل سوف يتعجب، ولي قصة طريفة مع صديق عمل سعودي من كثرة ما بتكلم معه بالعامية السودانية حفظ قصائد شعر بالعامية وفي المساء عنده لموزين وكل ما يركب معه سوداني يديه إشعار سودانية بالعامية الثقيلة لمن بقي مشهور في الدمام وسط السودانيين وعلى فكرة نحن محتاجين لنشر العامية السودانية بقوه


ولك التقدير ولكل الاخوان المتداخلين وابوعبده من اولاد القلوب البيضاء الله يديه العافية
الرجوع الى أعلى الصفحة اذهب الى الأسفل
اسامة السيد
شجرابي مبدع
شجرابي مبدع
avatar

الجنس : ذكر الاسم كامل : اسامة محمد السيد قبيل ا

مُساهمةموضوع: رد: [b]كنايات لها تفسيرات باللهجة العامية[/b]   الأحد 06 يونيو 2010, 9:21 am

يديدك العافية ابو وجيدة مع تحياتى لك وكل الشباب بطرفكم( والشوق من هنا لاعندك) والعامية السودانية مافى احلى ولا ابلغ منها والله يبيض وشوشناجميعا ممثلين الشجرة العملاقة بارض المملكة
الرجوع الى أعلى الصفحة اذهب الى الأسفل
مجدى ابوعبدة
مشرف مشاهير الشجرة والحماداب
مشرف مشاهير الشجرة والحماداب
avatar

الجنس : ذكر الاسم كامل : مجدى عوض محمد احمد

الاوسمة
 :


مُساهمةموضوع: رد: [b]كنايات لها تفسيرات باللهجة العامية[/b]   الإثنين 07 يونيو 2010, 4:25 am

ابووجيدة كتب:
أخونا أسامة محمد سيد تحية وتقدير لشخصك بما أتحفتنا به من العامية السودانية ومشتاقين بالحيل رقم انك يمكن ما تتذكر شكلنا لطول هذه الغربة ألعينه والله يدك العافية على موضوع العامية السودانية
لكن بكل أسف نحن هنا ماشين بعامية البنغلاء سيده مني مني وغيرها لمن اللسان أتعوج رقم ان العامية السودانية ثرية لو قعدت مع واحد من الأخوان العرب ودخلت ليه المعني عديل سوف يتعجب، ولي قصة طريفة مع صديق عمل سعودي من كثرة ما بتكلم معه بالعامية السودانية حفظ قصائد شعر بالعامية وفي المساء عنده لموزين وكل ما يركب معه سوداني يديه إشعار سودانية بالعامية الثقيلة لمن بقي مشهور في الدمام وسط السودانيين وعلى فكرة نحن محتاجين لنشر العامية السودانية بقوه


ولك التقدير ولكل الاخوان المتداخلين وابوعبده من اولاد القلوب البيضاء الله يديه العافية

ويديك العافية اخى الحبيب ابو وجيدة وربنا يتم لقانا فى ساعة الخير ان شاء الله .
الرجوع الى أعلى الصفحة اذهب الى الأسفل
 
[b]كنايات لها تفسيرات باللهجة العامية[/b]
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدى الشجرة والحماداب :: المنتدي العام-
انتقل الى: